استفسار عن قطر

kuwaitia mamlo7;12041664:
السلام عليكم ورحمة الله وبركاته


حابه اروح قطر واول مره اروح لها ابي اعرف احسن المجمعات وشنو الفنادق اللي يمها مجمعات ؟؟؟

ابي محلات عبايات ؟؟

شكرا :))))

هلااا حبيبتي وحياج الله فديرتج الثانيه ..

احسن المجمعات امم .. عندج اللاند مارك حق التسوق في فتره الضحى .. حلوو وهادي .. وفيه العاب للاطفال ومحلاته رايقه .. وعندج فيلاجيو كبير وفخم فيه انواع المقاهي و محلات التسوق حق كل الاعمار وهم في قسم خاص للماركات فيه كثير ماركات مثل لوي فيتون وفندي ودي اند جي ودولتشي اند غابانا وو برادا و رالف لورين ولوي وهم بعد اممم ديور وتودز ومارك جايكوب وبوتيغاا وغيرهم ..
وفيه مدينه العاب اسمها جندولينيا روووووعه وهم في صاله تزلج رووعه احذا قسم المطاعم ..
وهم فيه سينما .. وووو بعد شنو اي شسمه .. اللؤلوه لاتطوووفج رووووووعه ..
فيه بوتيكات من ارقى الماركات بالعالم مثل هيرمز وارماني وغيرهم ..
وفيه كوفيات اتجنننننننن شي شي .. وهم فيه مطاعم حلووه بس صراحه مارحت لها ..
واذا رحتي لاتطوفين مطعم غوردن رامزي مادري شسم مطعمه صراحه بس لاتطوفينه اعتقد انه بطلووه الحين .. وهم في المول وحياه بلازا فيه مدينه العاب اسمها جنغل زون حلوووه لليهال .. وفيها جاينت ستور وفيها بازارات رايقه .. ووهم واااااااااااايد محلات ..

اما عن الفنادق عندج فندق دبليو .. والفور سيزن .. والانتر نقي اللي يعجبج كثير فنادق بصراحه .. ومحلات العبي .. امممم فيه محل اسمه ربشه وجنبه محلاات نفس النمونه بنفس الشارع اعتقد انه بشارع المنتزه او شي جذي وااااااايد فخمه تييج بالف واكثر ..
وهم فيه بنمطقه العزيزيه بس ماعرف بالظبط وين .. اهو شارع كله محلات عبي ،. بس الاحسن تروحين لربشه ارقى واحسن منهم ..


ردي بصراحه سريع سريع .. اتمنى بنات قطر فديتهم يجوون يردون عليج بتفصيل اكثر لاني احسج مااستفدتي من هذرتي شي خخ ..
بالتوفيق وحياج الله مره ثانيه F:

cold
مشكووررررره واااييد الصراحه اجابتج عجيبه :)


بس بخصوص العبي ابي عبي مستوى عبايات المتحجبه واسعارهم اقل من 1000 درهم .. اريت الل تعرف تفدني

اللؤلؤ ؟؟!! مجع ولا منطقه ولا فندق ؟؟

up
up
up

اختي كولد ماقصرت وانا بقوول لج ..

بالنسبه للمجمعات اختي ..

عن نفسي حق التسوق افضل شي مجمع ( اللاندمارك ) .. فيه المحلات المعروفه والمعتاده ,

فيه ألعاب وسينما .. ومطاعم الفاست فود المعروفه

وتقدرين في يوم واحد تزورين مجمع ( حياة بلازا ) + ( فيلاجيو ) لانهم جنب بعض

حياة بلازا مجمع بسيط فيه محلات معدوده لانه من طابق واحد ,, فيه مطاعم الفاست فوود .. وافتتحوا فيه ناندوزر بعد

فيه ألعاب مناسبه للاطفال اكثر .. وفيلاجيو مجمع راقي وفيه محلات راقيه وماركات

فيه العاب حلوه ومناسبه لجميع الاعمار .. وفيه سينما وصالات عرض افلام ثلاثية الابعاد .. السينما جديده وحلوه ان شاء الله تقدرين تزورينها وتشوفين

وفي مجمعات ثانيه مثل ( المول ) و ( السيتي سنتر ) واللي هو مجمع غني عن التعريف كبير وفيه متعة التسوق والعاب وسينما ومطاعم طبعا .. ( فيلاجيو والسيتي سنتر فيهم صالات تزلج )

وتقدرين تزورين .. ( رويال بلازا ) .. مجمع هاادي وحلو ,, فيه محلات وسينما ( وحتى السينما هاديه وااايد .. هو عموما مافيه زحمه بكثره )

بالنسبه لسؤالج عن اللؤلؤه .. هو مشروع لؤلؤة قطر ,, مشروع مثل فلل وشقق مطله على البحر بتصميم شكل لؤلؤه وسط البحر .. < للحين ماجهزت بشكل كامل

فيه محلات مثل ماقالت لج اختي كولد .. يعني هو للحين المشروع ماكمل بشكل نهائي بس تقدرين تروحين تتسوقين والمحلات هناك ماركات وكشخه

عن نفسي بصراحه ماشفت المحلات ومادخلتهم

..

بالنسبه للفنادق ماعندي فكره كافيه بس في فندق الفور سيزون راقي وحلوو اكيد .. بس مادري عن الاسعار

وعن محلات العبايات .. شارع المنتزه فيه محلات عبايات وااايد جنب بعض .. مادري اذا تدلين او ممكن تلقين احد يدلج

جنب مؤسسة الشاهين ومكتبة ابن القيم في المنتزه .. ذيك المنطقه كلها محلات عبايات .. محلات عاديه طبعا وبأسعار متفاوته \ محل ريم الامارات عنده موديلات حلوه \

وبعد في بمنطقة الاسوااق تقدرين تشوفين سوق فالح وسوق الديره .. داخل هالسوقين في محلات عبايات واايد ونفس الشي اسعارهم متفاوته تقريبا تبدأ من 400 وشوي ولج الحسبه طبعااا \ محل " زينه للعبايات " مبنى سوق فالح .. المحل ع الشارع وكبير .. عنده موديلات حلوه وتفصيله ممتاز \

( انا قاعده اقول لج عن محلات عاديه اذا حابه تشوفين موديلاتهم وتفصلين .. )

+

في محل في شارع السد خلف مجمع رويال بلازا . اسمه ( روعه للعبايات ) . هالمحل شفت وحده مفصله عنده .. عنده موديلات رااقيه وحلوه

لو زرتي المجمع تقدرين تلقين عليه نظره بنفس الوقت

....

** اذا ناويه تزورينا ان شاء الله .. انصحج تزورين ( متحف الفن الاسلامي ) متحف جديد ومميز ويمكن سمعتي عنه

فيه تحف اسلاميه نااادره وتصميمه حلو ..

ولو رحتي تتمشين في نفس الوقت ع الكورنيش وع البحر وحديقة البدع .. منطقة الكورنيش اذا انتوا عائله بتكون حلوه بالنسبه لكم مساحه خضرا وهوا .. بس الحين حر شوي ههههه .. وحديقة ( دحل الحمام ) ..

ولو مطولين وحابين تروحون مثلا منتجع وشاليهات .. تقدرون تزورون منتجع سيلين والا شاليهات الغاريه

....

اذا عندج اي استفساار تفضلي اختي ..

وحيــااج الله بتنورينااا

:f:

عزيزتي..

أنصحج بالنسبة للعبايات..

ترى الموديلات الجديدة تنزل بالسعودية والامارات قبل الدوحة..

هذي نقطة..

والنقطة الثانية..

مثل ماقالوا لج الخوات عن اماكن العبي من سوق فالح وغيره..فعلا يبيعون عبي بأسعار ارخص بوايد من المتحجبة وداري وغيرهم..

وعندج غير محلات في المنتزة..في محلات عبي بمنطقة العزيزية..وإذا تبين تعرفين وين بالضبط..قولي لي وبخبرج..انا تعاملت معاهم مرة وحده..فصلت عباية وشيله

لأني شفت حريم مفصلين من عندهم وعجبتني العبي..وكانت تجربة زينة من ناحية الخياطة والموديل والقطعة بعد..

في الستي سنتر اعتقد الطابق الثالث في صوب كلها محلات عبي وبموديلات حلوة..وأسعارها مناسبة..

وبالنسبة للفنادق..مثل ماقالوا لج البنات..بس الشي الوحيد اللي ازيد عليه..فندق رتاج الريان..ماقد جربته بس سمعت عنه واايد وانه نظام اسلامي..

ومثل ماقلتي تبين فنادق قريبة من المجمعات..تقريبا مجمع الستي سنتر قريب منه فنادق كثيرة لأنها قريب الكورنيش..

أتمنى ان افدتج بشي..

احب اضيف على الخوات


سوق واقف كتمشية بالليل وللعشاء

جلساته قريب من شارع السوليدير بلبنان .. فيهم ممشى ومقاهي ومطاعم وتحفة صراحة دايما يكون فيه عروض وجلسات ..

وفيه انواع المطاعم اللبناني واليمني والرعراقي والنوبي والمصري والقطري الخ

والعبي بصراحة اذا انتي متعنية للعبي انصحج بالبحرين والامارات وممكن السعودية

شكراااا وواااايد على تجاوبكم كفيتو ووفيتو :)))

هلا حبيباتي و بعد إذن صاحبة الموضوع لأني ناوية الأسبوع الجاي أزوركم... شلون الجو هالأيام؟؟؟ معاي بنتي 6 سنوات وولدي شهر و نص وودي نتمشى في الدوحة يومين ... شتنصحوني فيه؟؟