قصة ولادتي بولدي,, حمود

سلام الى احلى صبايا بأحلى منتدى
اليوم حابه اكتب لكم قصة ولادتي بولدي حمود ربي يحفظه من كل سوء
طبعا هاي اول مشاركه لي بموضوع اكتبه الباقي كل ردود:D
ان شاء الله اكون خفيفة ظل معاكم..
المهم ابتدي سناريو ولادتي الجميله:D
..
اني وولدت باخر يوم من شهر رمضان وهم عطوني 15 او 17 شوال ..
توني متفرغه اكتب قصة ولادتي..:p
المهم
بدء الالم معاي على الساعه عشره بالليل وواصل معاي الى 12 والالم ما كان يمزح ابد
جدي من البدايه :'(الم قوي وكنت اصيح من قوته كان من نهايه بطني الى نهاية ظهري الم شديد
يشبه الم الدورة بس على دبل دبل:(
وكلمت زوجي وقلت له الالم معاي زايد تعال لان هو كان طالع تعرفون رمضان الوقت توه بدري 12
وجاء لي وقال لي ها الالم عدل منتظم معاش متأكده(( لان قبلها بأسبوعين رحت كان الم بس اخف من هذا وكان منفتح واحد سانتي وقالت لي الدكتوره اذا زاد الالم تعالي وطلعت وجلست اسبوعين))
المهم قلت له شوف حالتي واحكم .. بجد ما اتمسخر هالمره عن جد الم ما يمزح ولدك بيطلع خلاص:)
وظليت بالبيت الى الساعه 2 الفجر
وقررت خلاص بروح لان الم متواصل والم الم عندي
تونا بنطلع الا اتصال امي ربي يحفظها :L:من كل شر حاسه فيني تقول لي ما فيش الم ولا شيء
قلت لها عندي الم اشوي وداني رايحه قالت خلاص اذا فيش ولادة كلميني قلت لها اوكي
رحت المستشفى وكشفت علي الا الرحم مفتوح 4 سانتي اقولها شنو يعني ولادة قالت ايه
من الفرحه قعدت ابكي ههههه والله حتى من الوناسه اني بولد خف الالم ههههه:lol:
وكلمت امي عطول وقلت لها .. قامت تدعي لي واشوي الا هي جايه لي المستشفى مع ابوي
ومن شفت امي قمت ابكي (( وكانت جنبي ممرضه هنديه تسحب من دم الا تقول لي ما فيه كوف مدام هذا انتي الكل يعرف هنا ما فيه كوف ))
المهم جلست معاي امي اشوي والالم البايخ خف ما فيني الم خفيف بس من الوناسه الظاهر
وقلت لها امي روحي ريحي وتعالي بعدين شكلي مطوله
المهم راحت امي
علىالساعه خمس جت كشفت علي الا تقول خمس سانتي والالم خفيف
جدا وبعدين انعست الصراحه ما فيني الم زايد وكان احط راسي وانام ومسكين زوجي معاي على الكرسي جالس
ونمت الى الساعه تسع الصبح والالم ما فيه والرحم وقف خلاص مو راضي يفتح اكثر على خمس وبس
خلوني الى الساعه 11 ونصف وحط علي طلق صناعي ابره عطوني ..
سريعه المفعول بدء الالم بدء يزيد يزيد خلاص قامت الحفله عندي وزوجي مسكين يطالع فيني وما عارف يسوي لي شيء وفيه الصيحه واهو ايقو لي اتصبري ما عليه واني ابد:'(
اشوي على الساعه 1:00 جت وفتحت لي كيس الماي وكان الرحم 6 ونصف
اشوي ازيد ازيد بعد نصف ساع ودخلوني غرفة الولادة والرحم 7
وجلست في غرفة الولادة ساعة بس كل ما تجيني الطلقه احس ابي اروح الحمام واقول لها ابي اروح الحمام واهي تقول لانش بتولدي عشان كذا اقولها مالش شغل وديني الحمام
واهي تطالع فيني تبتسم وتسكت الظاهر متعوده على هالاشكال :D
المهم جت لي الدكتوره وقالت لي يالله الحين انفتح عندش الرحم عدل يالله ترا الشعب يستانش برا
افكر عن جد امي وابوي وعمتي ووووو
طلع بس ابوي وامي وزوجي المهم بصراحه شجعتني لما قالت لي وصرت ادفع ادفع وهي تقول شاطره شاطره يالله يالله (( حسيت روحي زي الطفله ))
المهم ما علينا وي الدفع الا طلع حموده بالسلامه
وخلاص ارتحت وعطول ذكرت امي اقول ياربي امي تعبت ابي كذا وجتني الصيحه..
ومن طلعت من غرفة الولادة شفت امي قدامي مع ابوي وزوجي وبست يد امي وابوي عطول
وخلصت قصتي ..
ان شاء الله عجبتكم..
ادعو لي اجيب بنوته وودي بالقوي مع انه ولدي صغير بس اني احب الاطفال وايد ادعوا لي اجيب بنوته
واكتب لكم قصة ولادتي ببنوتتي ان شاء الله
..
اختكم..
امل