تجمع حوامل وامهات ( قطر ) لشهر جمادى الاولى لعام 1431 هـ ؛ 2010

امونتي

انا عن نفسي عرفت جنس البيبي اخر اسبوع من الرابع وفي الخامس بديت شوي وللحين باقي لي اشياء , وخواتي يقولون لي لا تاخذين الا في السابع والحمد لله اني بديت لاني ماقدر امشي بسرعة اتعب , وملابس التايني مكتوب عليه على حسب كل محل وماركة تختلف عن الثانية دوري وبتلقين مكتوب عليهم , وعن الكبت اليوم ريلي راح يشوف كباتة سوق الحراج , والسرير الصغير شكلي ما باخذ لان اختي بتعطيني سرير عيالها

ومحلات اليهال قصدج ملابس ؟

عندج نكست ومذركير وبي اج اس

((بدر البدور));12022233:
مساء الورد ماميز ..^_^


شلونكم وشلون الحلويين ..؟




أمونتي

أنا دخلت السادس وتوني باديه اجهز شريت لي كم قطعة بس بعد
احس نفسي ضايعه وابي كل شي ..



ماميز

محتارة من وين اخذ سرير البيبي بقولكم الاماكن اللي رحتها

جيكو ( حلوين بس حسيتهم مب عمليين )
محل مجابل لايف ستايل في الستي ( يهبل وراقي افكر اخذ منه )
بابز اند مامز ( حلوين بعد بس احسهم كبار وااايد )
مذركير ( احسهم خفاف خد جربهم من قبل ؟؟)

مـرحبـا ماميــز

بدوره فديتج انا ماخذه من ماماز اند باباز حلوو ماشاءالله واستعملته حق ولدي لين 8 شهور :thumbs_up:

عليه بالعافيه البيبي


بروح البيـت .. تصبحـون على خير ..

امونتي

اتش اند ام اللي في فيلاجيو عندهم ملابس للبيبيز
بريناتال في اللاند
تشيكو وتوك توك في السيتي
وصوب الماركات في فيلاجيو اسمع خالتي امس تقول في محل للبيبيز < من زمان ما رحت فيلاجيو..

بالنسبة لاغراض البيبي لان اول بيبي تكونين ضايعة وماتدرين شسالفة وشنو الاشياء اللي تحتاجينها..
انا كنت نفسج.. بس رتبت كلشي في دفتر وكتبت كل اللي احتاجه والعدد.. حتى كتبت كل محل وشنو الاشياء اللي باخذها من المحل..

اخذي لج كبت فيه ادرج.. خذت من مذركير كبت مو عملي وايد.. التعليق ماخذ المكان اكثر شي وفي درج واحد بس فالملابس ما تبين وايد مرتبه في التصفيف.. اما في الامارات خذت من ايكيا كبتين واحد طويل بو ارففف حطيت فيه الفوط والصدريات .. الخ
وكبت له 3 ادرج كبار.. درج للملابس الداخلية الفنايل البيض.. ودرج لملابس البيت والبيجامات.. ودرج لملابس الطلعات والبدل.. واذا بعلق شي اعلقه عندي قي الكبت مثل ثوب حمود..
سوالف الاسرة والكبتات لا تاخذين من مذركير لان وايد غاليين الصراحة.. اخذي من بيبي شوب والا تشيكو وتوك توك عندهم اشياء وايد زينة وكواليتي..واسعارهم معقولة..

بدر البدور

اخذي سلة موسى حق بيت امج ( خذت من ماماز اند باباز.. في النوع اللي ينهز بعد)
وبيتكم السرير العود.. (بالنسبة لي خذت اللي في قطر من مذركير واللي في الامارات من بيبي شوب)





بنات حمود توه يقوم من الرقاد حصلته مزكم وايد .. ذكروني شنو لازم اعطيه اذا قام من النوم بكرة ؟ عشان يخف نسيت بخاخ الخشم في الامارات..

امونتي

التايني تحصلينه
في ادمز-مذركير-بيبي شوب-نكست-وماركس بتحصلينه سايزup to 1 month

والمحلات وايد
عندج الراشدي حق المهادات
بيبي شوب
مذركير
آدمز
جاكادي السد
بووري الستي مقابل لايف ستايل
كارترز حياة بلازا
اوركسترا حياة بلازا
ماماز اند باباز فيلاجيو
نكست
ماركس اند سبنسر
بي اتش اس
ماكس


بدر البدور

اذا السله
انا خذت مالت ماماز اند باباز
خذت لون محايد
وماشاء الله حق الكد
انا استخدمته 4 شهور واختي استخدمته حق ولدها
وبعد بتخليه لبيبيها الياي ان شاء الله

والسرير الكبير مال بيبي شوب حلو وعملي
وبعد عندج مال مذركير

بوري تلبيساتهم حلوة
وحتى مهاداتهم حلوه وخفيفه وبارده على الياهل



اخليكم الحين

تصبحون على خير

موزان

يعطيج العافية على اللستة يبي لي امر هالمحلات اللي ذكرتيهم


والكبت اللي حصله ريلي كله ارفف وانا بعد فلت له ما احتاج التعلق الحين

مزمز

مادري اذا في دوا ينشف الزكام
بس احسن شي قطور شيكو والشفط
والله يعينج اخس شي الزكام للبيبي
انا اتضايق اذا بنتي زكمت

الي تدور سرير وكبت

اليوم شفت في تشيكو الستي سنتر

سرير لونه بيج وعليه زخارف بالسوارفسكي السلفر
ومعاه طاولة تبديل نفس الشي
وكبت بعد مزخرف بالسوارفسكي رسمة دبدوب
واااااااااااااايد راقي

وبعد في قاري كحلي وعليه سوارفسكي سلفر

حلووو حق هديه وحق الماميز الي يجهزون


وخلاص تصبحون على خير مصختها لوولز

بسومة

ما شاء الله عليج ما قصرتي بسجل المحلات اللي ذكرتوها الله يجزيكم خير

وانتي من اهله

بس بس

اي انا وايد متضايقة الحين..
ماحب كل لما يزكم لان احاتي ينزل في بلاعيمه عقب..
الله يعين..

نور

الله يعافيج..
مري القي نظرة عالمحلات عقب كتبي لستة حق كل محل..

تصبحون على خير

انا كتبت شنو ابي والعدد ما كثرت كلش وكل ما اشتري شي ارجع البيت واراجع الدفتر واشطب اللي خذته ومن وين


وانتي من اهل الخير وما يشوف شر حمودي

دوحانية;12020640:
امونتي :
الحين تقدرين تشترين اشيا وايد , خلينا نمشي على هاللستة :



** الملابس :
- الفنايل الداخلية > 6 قياس نيوبورن / 6 قياس 0-3 شهور ..
( اذا بتاخذين من بيبي شوب اخذي من الباكيتات اللي فيهم 3 مع بعض , من تجربتي هم أحسن نوع )

- الأوفرولات : اللي هي البدلات الكاملة و ريولها مسكرة > 6 قياس نيوبورن / 6 قياس 0-3

- القبعات : نسقيهم مع البدلات و بتلقين في بيبي شوب أطقم كاملة بس اخذي الاوفرول مع القبعة و المهاد او الملحف حق فوق المهاد " انا ما اشوفه ضروري بس في ناس يلفون الياهل بملحف فوق المهاد خاصة اذا بيشيلونه بدون سليب باغ " ..

>>> الحين بيصير عندج : 12 بدلة / 12 قبعة أو أقل حسب اللي تلقينه / 12 ملحف .. حلوو ؟ نكمل ..

- مهادات بيضا : هم الأساس و اللي بتلفين فيهم الياهل اللي خذتهم انا من الراشدي > اخذي 6 / في ماميز ياخذون المهادات من بيبي شوب بس انا ما جربتهم ..

- سليب باغ > 1 عملي ( خذته من بيبي شوب ) / 1 عملي و كشخة ( خذته من جاكادي )
لاتكثرين عن 2 لأن السليب باغ حق كم شهر عقب بترفعينه ..

- صداريات : تحتاجين 12

- ثياب مريحة : اللي يسمونها ثياب العافية تلقينهم في الراشدي بس انا ماخذت منهم .. اذا بتاخذين 4 كفاية ..

- الفوط : 3 كبار للسبوح / 3 لتبديل البامبرز / 12 فوطة صغيييرة تلقينهم في باكيتات في بيبي شوب كل باكيت فيه 6 ..



بارجع لباقي الأشياء عقب , باطلع الحين ... ب ر ب ماميز ..

نكمل و إن شاء الله اذا نسيت شي يكملونه الماميز :)

**الأم :

- قطن الصدر : استعملت نوعين بس اشوف شيكو أحسن تلقينه في الصيدليات و بيبي شوب
و محل شيكو في فيلاجيو ..

- قمصان النفاس : تحتاجين 3 للاستقبال في المستشفى / 4-6 ناعمين للبيت او اذا حد بيزورج .. ( طبعا شوفي شنو الافضل لج تفصلين و لا تاخذين جاهز )

- ملابس داخلية للرضاعة : 6 ستيانات الرضاعة انا جربت من مذركير واشوفهم اوكي

- فوط صحية : فام الحجم الكبيير ( خليه مع لستة الجمعية او الصيدلية )

- المشد : شيكو لفترة النفاس و عقب في نوع في دبنهامز اسمه spanx او مشد بوتس

- باقي لستة الام من العطر لين المشط مش مهمين الحين ينفعونج لما تجهزين شنطة المستشفى ان شاءالله


** العناية :

- اغلب الموجود بيكون في لستة الجمعية


** الرضاعة :

- المراضيع طول فترة النفاس بتحتاجين المراضيع الصغار ( انا خذت افنت : 4-6 صغار / 2 متوسطات ) مع الحلمات المناسبة ..
طبعا الماركة اللي تريحج , اغلب الماميز هني يمدحون بيجون القزاز بس عاد انا خالف تعرف خخخخ ..

- فرشاة تنظيف المراضيع : ام فرشاتين صغيرة و كبيرة , جربت مالت مذركير مب شي , عندج مالت بيبي شوب اووكي



- جهاز تعقيم المراضيع : انا شريت ماركة افنت من مذركير :



و عندج ماركة مذركير بعد اوكي و لها نفس الوظيفة و نفس الغرض بس يفرقون في السعر :



- دلال للماي : للبيت عندي 2 المانيات و للطلعات خذت ترمس من تافولا أخف من الدلة ..

- سخان الماي : اولريدي عندي واحد من قبل ما استخدمته كلش , اذا حابة اخذي فليبس و اذا عندج واحد استخدميه ..

- جهاز الشفط : ما اقدر افيدج فيه .. بس ان شاء الله ماتحتاجينه لوول


** الأثاث :

- مبدأيا من ذي كله , تحتاجين سريرين : واحد صغير حق فترة الأربعين و بتخلينه في بيت هلج عشان وقت ماتزورينهم :





و الثاني السرير الكبير اللي بيخدمج أكثر ( ممكن تأجلين تشترينه لين عقب مش ضروري الحين , انا نقلت السرير الصغير وياي البيت و نفعني لين عمر 7 شهور عقب شريت له الكبير من بيبي شوب ) و طبعاً بتحتاجين للسرير تلبيسة كاملة + لحافين خفاف


- خزانة لملابس البيبي : انا شريت دريسر عادي من هوم سنتر وخليته في بيت هلي .. وااايد نفعني ..

- طاولة التبديل : بصراحة انا ماخذتها ولا تحسفت عليها .. بس وايد ماميز يمدحونها ..

- باقي الأشيا ماراح تحتاجينها الحين و ممكن بعضها تجيج هدايا .. و لين وقت استخدامها يصير خير ..





*** اللستة هذي ناقصة شوية اغرااض .. باكملها لج إن شاء الله ..




تم بحمد الله , بس باروح اشرب زعتر و بارجع عندي كم نصيحة ..:cool:

بدورة :
المحلات اللي ذكرتيها جودة بس اسعار مرتفعة , تلقين في بيبي شوب ( مش دايماً ) نفس الجودة بس بسعر أقل ..



نصوفه :
العوضي في بالي ابي امر عليه بس كلش مافضيييت زحمة افكار و مخططات في راااسي ..
بس وشو صناعتهم ؟


موزان :
اشتري له بخاخ الخشم ( الأملاح ) من الصيدلية ..
و اذا ماعندج شي .. اخذي عود اذن و غمسيه في زيت زيتون و نظفي خشمه فيه .. زيت الزيتون بيخليه يعطس و تطيح السدادة على قولة امي خخخخ

السلام عليكم


شخبااااااااااركم

الورد99;12024219:
السلام عليكم


شخبااااااااااركم

و عليكم السلااااام ..

أخبارج مع السهر ؟ و أخبار العسولة ؟

دوحانية

<<< تم التسجيل ويعطيج العافية

دوحانية;12024239:
و عليكم السلااااام ..

أخبارج مع السهر ؟ و أخبار العسولة ؟

الحمدلله تمام


اي والله اذبحتني سهر فاليل ونوم بالنهار عاد انا كلش مو متعودة على هالنظام بس شسوي صرت ام مااعرف ارقد اذا اهي ماارقدت مع ان ماكنت متوقعه اني بتعلق فيهالهالدرحة

مدام بنوتي نامت الحين اقولكم تصبحون على خير