تطبيقي للماكرون الفرنسي للغالية كتكوته نايمه :)

أبدعتي في ثطبيقك تسلم الايادي

شكلو احلى من الجاهز واكيد الطعم برضو

ماشاء الله مبدعه

ماشاء الله تبارك الله
قممه الرووعه
تسلمين

يسلموووالايـــــــااادي

على التطبيــــــق الرائـــع
,,,

برا يبيعوه ب 2 دولار للحبه الوحده


سوي لك بزنس من بيتك


موفقه

تسلمين حبيبتي... فعلاً يا غالية أبشرج بديت :D

مرحبا اختي ديزي

انا سويتها وطلعت سايله معاي ما ادري ليه

بالنسبة للمقادير ممكن تقولين لي كم بالضبط بالاكواب مو بالغرامات بليز

وبالنسبة للبيض المفروض اخليه برا ولا اكسر البيض واخلي بياض البيض برا كم ساعه

واللوز تنصحيني اشتريه مطحون جاهز ولا اطحنه بالبيت احسن

وبياض البيض لما خلطته ماحسيته مره انتفش معاي

وبالمناسبه كان عندي عزيمه وسويت طريقة المولتن كيك مررره حبوها قلتلهم من عضوه اسمها ديزي في منتدى عروس ماشاء الله ماعمري جربت له طبخه الا ضبطت

وعذرا ثقلت عليج باسالتي

desert_girl;15911064:
مرحبا اختي ديزي

انا سويتها وطلعت سايله معاي ما ادري ليه

بالنسبة للمقادير ممكن تقولين لي كم بالضبط بالاكواب مو بالغرامات بليز

وبالنسبة للبيض المفروض اخليه برا ولا اكسر البيض واخلي بياض البيض برا كم ساعه

واللوز تنصحيني اشتريه مطحون جاهز ولا اطحنه بالبيت احسن

وبياض البيض لما خلطته ماحسيته مره انتفش معاي

وبالمناسبه كان عندي عزيمه وسويت طريقة المولتن كيك مررره حبوها قلتلهم من عضوه اسمها ديزي في منتدى عروس ماشاء الله ماعمري جربت له طبخه الا ضبطت

وعذرا ثقلت عليج باسالتي

حياج الله عزيزتي...

العجينة طلعت سايلة لأنج قلتي بياض البيض ما نفش زين، أو يمكن بعد ما أضفتي اللوز خلطيته كثير لحد ما فقد قوامه...

بالنسبة للمقادير، صعب أعطيج إياها بالأكواب، لأن الماكارون بالذات معاييره دقيقة و من كوب لكوب بيختلف المعيار... اشتري لج ميزان و صدقيني بتستفيدين منه مو بس للماكارون... شوفي محلات بيع الأواني المنزلية حتى سنتر بوينت موجود عندهم و بسعر معقول...

أما البيض، المفروض تكسرينه و تغطين البياض بمنديل و تتركينه برا الثلاجة 3 أيام! ممكن تتركينه يوم و ليلة بس النتيجة غير، و الهدف إنه يتبخر أكبر قدر من الماي و يصير قوامه ثقيل... طبعاً المفروض توزنينه بعد ال 3 أيام لأنه لما يتبخر منه الماي يقل وزنه!

و إذا جيتي تخلطينه خلطيه بوعاء بايركس أو معدن لكن مو بلاستيك! لأن البلاستيك يمسك الدسم و هذا ما يخلي البيض ينفش... و تأكدي بعد إن الوعاء ناشف ما فيه و لا قطرة ماي!
و خلطيه لحد ما ينفش تماماً بعدين أضيفي له السكر بالتدريج و بتشوفين حجمه يتضاعف و بتصير فيه لمعة...

و اللوز شفت أفضل شي إني أشتري اللوز الشرايح و أنا أطحنه، لكن لا تطحنينه لحاله! أوزنيه و أوزني السكر البودرة و اطحنيهم مع بعض... لأنج لو طحنتيه لحاله بيتكتل و بيعجن، فالسكر يمنع هذا الشي... و لا تطحنينه بمطحنة القهوة، اطحنيه بالخلاط الحوض (الفود بروسسيسر) لأنه يدخل له هوا وقت الطحن و ما يصير متعجن...

و لما تضيفين البياض لخليط اللوز و السكر حاولي ما تكثرين خلط، مثل ما ذكرت كتكوته في طريقتها 50 أو 60 لفة بس! لكن إذا بتستخدمين ألوان، قللي الخلط إلى 30 لفة بعدين قسمي الخليط و أضيفي الألوان و كملي عد اللفات و انتي تخلطين الألوان...
و الألوان حاولي تستخدمين الجل أو البودرة عشان ما تأثر في قوام الخليط، لكن إذا مضطرة تستخدمين الألوان العادية السايلة استخدميها بحذر و لا تكثرين لأن كثرتها تعتبر رطوبة زايدة!

شوفي، سر نجاح الماكارون هو الجفاف! كل ما قلت نسبة الرطوبة فيه نجح... و العدو اللدود للماكارون هي الرطوبة! حتى رطوبة الجو تأثر عليه...

اتبعي هذي الخطوات اللي قلت لج عليها و إن شاء الله بيضبط معاج... و بشريني بالنتيجة و أي سؤال أنا حاضرة F:

و عليكم بالعافية المولتن كيك :)

ماشاء الله تبارك الرحمن عيني عليج بارده ربي يحفظج

شنوووووووو ذي كرهتيني في المكرون إلي سويته أمس هذي ثاني محاوله أسويها وأفشل فشل ذريع مو عارفه وين المشكله فرن كهربائي أول مره شغلت المروحه قريت إنه المروحه قويه على المكرون ثاني مره صكيتها أول صينيه يعني صار من غير تشقق بس مافيها قاعده الريول مثل مايسمونها في المواقع أما ثاني صينيه مأساه متشققه متفتته بشكل فضيع يعني لو كنت متعمده إني أسوي طريقه إنه لازم تتشقق ماكانت تشققت جذي :badly:

أحب المكرون وأدمنت عليه كل يوم والثاني رايحه الستي وماخذه منه بس غالي العلبه فيها جمن حبه بـ 5 دينار وشي :lol:

بقولج الخطوات إلي سويتها وتحمليني ترا ماراح أفكج إلين أضبطها

المقاسات كالاتي

كوب سكر مطحون
3/4 لوز مطحون جاهز خذته
3 بياض بيض
رشة ملح
ربع كوب سكر عادي

الخطوات مثلج بس المقادير خذتها من النت جفت أجنبيه مسويه نفس المقادير وطلع المكرون يهبل

مازيدت في الخلط ولفيته بشويش ولمن صبيته في الصينيه شكله كان :thumbs_up: بس لاحظت لمن ظربت على الصينيه يعني بسوي نفس إلي في اليوتيوب عشان أبسط الدوائر :lol: إنه طلع فقاعات فوق سطح المكرون ريحته نص ساعه وخبزته على حراره 150 لمدة عشر دقايق

والنتيجه

فششششششششل ذريع حتى ماتشجعت إني أصوره وأنزل صوره هديته على الشغاله قلت لها بتحشينه بتاكلينه بتقطينه كيفج :(

ههههههههههههههههه ضحكتيني لما قلتي هديته على الشغالة :lol:

شوفي لا يضيق صدرج... صج أنا أول تجربة نجحت، لكن بعدها مرة يضبط و عشرة لأ!!!

أول شي أنصححج و بقوة تشترين الميزان عشان المقاييس تطلع دقيقة... عندكم في السيتي تافولا و في محل ثاني Lakeland مقابل كارفور... هالمحلين غالين حبتين بس أشيائهم حلوة، أنا الميزان خذته ديجيتال من سنتر بوينت كان بشي و 80 يعني 8 دينار و كسر... و بصراحة و لا مرة جربته بالأكواب، على طول أوزن!

بعدين مثل ما قلت قبل، البيض طلعيه من بدري خصوصاً في الشتا لأن الجو بارد بياخذ وقت لين يتبخر منه الماي، أما في الصيف يكفيه يوم واحد بالكثير يومين...

و لما تصبينه بالصينية و تضربينه بالطاولة انتي مو بس تسطحينه، بهالحركة نتعمد نطلع منه فقاقيع الهوا... فلما تشوفين الفقاقيع خذي عود أسنان و فقعيهم :D بيرجع السطح يستاوى مرة ثانية...
و صدقيني في جونا الرطب نص ساعة ما تكفي إن الماكرون ينشف... خليه ساعة و تأكدي قبل ما تدخلينه الفرن إنه ناشف من فوق تماماً... يعني لما تلمسينه بصبعج تحسين عليه قشرة و لا يلزق بيدج...

و حرارة الفرن من تجاربي لقيت إن 300 فهرنهايت هي الحرارة المناسبة... بس شوفي التكنيك في خبز الماكرون... أول شي انتي حمي الفرن على 320 يعني تقريباً 160 مئوي، و أول ما تتدخلين الصينية الفرن، نزلي الحرارة 20 درجة فبتصير 300 = 150 مئوي... السبب هو إن كل مرة تفتحين الفرن، الفرن يفقد 20 درجة من حرارته! و عيدي نفس هالحركة كل مرة قبل لا تدخلين أي صينية...

بعدين إذا صينيتج من النوع الرقيق حطي صينيتين تحت بعض عشان الحرارة تتوزع بالتساوي و لا يتحمر من تحت بسرعة قبل لا يستوي الماكرون...

الماكرون بياخذ له ربع ساعة بالفرن... راقبيه، في الدقيقة الخامسة بيبدا يرتفع و تطلع له الياقة أو الفوت مثل ما يسمونها... و بعد ما يمر نص الوقت فتحي الفرن و فري الصينية... غيري اتجاهها عشان الحرارة تتوزع بالتساوي...


سوي هالخطوات و إن شاء الله بيظبط :thumbs_up:

و أي سؤال أنا في الخدمة F:

قولو ماشاء الله لاتنظلوني :lol:





:badly:



:sick:

:-#

:'(

حبيبتي فديتج ماقصرتي شرحج وايد مفهوم وطريقتج سهله إن شاء الله بروح أشتري الميزان آنه عندي وااحد بس مو ديجتل عندي الميزان العادي ينفع؟؟

هالمحل إلي قلتي عنه في الستي مستحيل أدخل الستي وما أمر عليهم لو ما أبي شي بس أحب أجوف

آنه من عشاق الحلويات ومعروفه في الوسط الفني قصدي العائلي إني الخبيره في طبخ الحلويات عشان جذي مو قادره أتقبل فشلي في المكرون :mad: الشي الي حبيته وأدمنته صرت ماعرف أسويه

تصدقين أمس طلعت بعد بيض إلا تقولي الشغاله madam you will make same sweet :mad:

ذكرتني بالفشل إلي فشلته المرتين إلي فاتو :confused:

جوفي بكون معاج خطوه بخطوه بسوي الطريقه الثانيه إلي أصخن السكر حق الميرانج وإن شاء الله تضبط معاي بس أهم شي خلج معاي مو تطفشين من أسألتي :study:

إلا بسألج ليش كلامج بحريني قح إنتي بحريني؟؟

حياج الله يا هلا... اسألي قد ما تبين بكون معاج خطوة بخطوة إن شاء الله لين يضبط :thumbs_up:

شغالتج شكلها في خاطرها تقول بعد! ما يأستي هههههههههه

قلت لج لا يضيق صدرج... إن شاء الله مرة بعد مرة بينجح و كل تجربة فاشلة تعلمج...

بعلّق على اللي سويتيهم... أول شي السبب الرئيسي اللي يخليهم يتشققون هو الرطوبة! يعني إما من بياض البيض ما طلعتيه وقت كافي، إو إنج استخدمتي ألوان سايلة مو جل!

و الحبات الوردية مبين إنج خلطتيهم أكثر من اللازم أو قللتي وقت الخبز في الفرن، لأن شوفيهم من الوسط فاشين فيهم خفقة، يعني انفشوا لكن ما أمداهم يستوون من الوسط و لما طلعتيهم فشوا...

أما اللي لونهم أخضر، كان يبيلهم خلط زيادة... لأن شوفي ال tip واضح ما تساوى السطح... هذي بالفستق صح! عادةً لما أضيف الفستق يصير الخليط ثقيل فأزيد خلط لحد ما يصير الخليط سايل نوعاً ما... يعني لما أرفعه بالملعقة ينزل مثل الشريط متواصل ما يقطع...

و في معلومة نسيت أقولها لج، الماكرون ما ينوكل أول يوم! يعني مو أول ما يستوي و تحشينهم تاكلينهم... لأ! حطيهم بعلبة بلاستيك و غطيهم زين و دخليهم الثلاجة، هذا بالصيف، أما الحين الجو بارد ما يحتاج، بس خليهم برا يوم كامل... السبب إن بهالحركة نعطي للحشوة وقت يتشربها الماكرون و يصير لين شوي من داخل chewy... و لو تجربين تاكلين وحدة فريش بتلاحظين إنها تتكسر و تتفتت معاج على طول... أما لو تاكلينها ثاني يوم بتصير متماسكة و هشة...

أما عن لهجتي لا أنا مو بحرينية بس يكون لي الشرف و الله فديت البحرين و أهلها... أنا من الشرقية و كلامنا زي كلامكم :D

روعه روعه روعه ما شاء الله عليكـ
ربي يحفظكـ ويحفظ لكـ صححتكـ وتفانيكـ ويزيدكـ ي رب

تسستاهلين التقييم ي ححلوة ..,

ماشء الله


باين عليه عذااب

الله يحفظج ويحفظ ابداااعج

يافنااانه