قصيدة ( نور الفضا )

شاعر أنا قد حطيت رحالي عندكم



واغلى ما املك هي قصائدي التي تخرج من قلبي إلى قلوبكم



فرفقاً بها




......





نور الفضا







على ضوّ القمر جاني خيالٍ للمهاة يزور
وانا ماكان في يدّي ارده وامسح الصوره

انا ماكنت احسب اني بهيم في حبها مجبور
واتاري الحب لي منّه تمكن هام مجبوره

غريبه قصتي معها وما دامت ثلاث شهور
ولكنّ الهوى لحظه يذيقك من حلا جوره

رجف قلبي على نظره .. وهذي نظرة المسحور
وانا يمكن سلبت اللب منها مير مغروره

تعّلقت الهوى منها ..وبان الخافي المستور
دخلنا عالم الاحباب , وتهنا باوسط بحوره

جميلة كامله بالزين .. وانا في وصفها معذور
خذت نور الفضا كله وصارت للفضا نوره

عيون لو تناظرها تموت وودها محظور
تجمّع في طبايعها صفات الحسن وشعوره

انا لا زارني طيفه تغانمته وانا مجبور
وساعة مايغيب الطيف ماينفعني حضوره

خذتنا عن بعض يازين , وصرت الهاجر المهجور
ظروف وللبعد يازين في صفحاتنا دوره

سرى ليلي على ذكرى بقايا خافقٍ مقهور
ونفسه في ظلام الليل منسّيه ومهدوره

يموت القلب وشعوره .. وتسكن بالغرام دهور
حشا روحي فدا زينك ليال العمر وشهوره






الرومانسي