.. || تجهيزات عرائس ( ليبيا ) لشهر ربيع الثاني 1431 - 2010 م / الجزء = 9 || ..

شن رايكن في الكنبة الكبيرة كلون حلو عجبني الصالون الي اخترته نفس القماش قهوي صادة من الاجناب و المخاد و السنادة لون اصفر غريب مخربش بالبني ع العموم انا صالوني نفس طريقة الكنبة هدي بالضبط انفكر اندير نفس اللون ابتاع الكنبة عنده اللون هضا

نرجوسة كان زي اللي في الصورة مش عادي بكل رهيببببب

سؤال
نبي كندرة فيلو عالية وقدمها غليظ وعالي وحتى من قدام عالية بالك في حلوة منكم شافت حاجة زي هكي ؟؟؟؟

عروسة ليبيا;11650533:

نرجوسه

انا نحسه حلووووووووووووووو المكرونه هههههه عارفه لانه موردن وايدير جو مع اللوان متاعك حبوبتي وراهو الابيض والاسود يدخل فيه الاحمر بي قووووووووووووووووووووة

يعني تقردي اتحطي ورد مجفف احمر وادخلي الاحمر ف اى حاجه ف الحمام

علا فكره المريا

متاع الحمام كان عليها رف تقدر اتحطي عليه مفيرش صغيرون وتحطي عليها شيشه او قارورة عطر والله تجي تجنن وانديرو فيها يعني نحس لازم ينحط العطر كا جزء من الاكسسوار للحمام

اسالي علا عطر ماكس تتش التركي كان غلا حقه 15 دينار منظره يجنن وحتى ريحته حلووووووووووة وعلا فكره فيه منه رجالي حلو والله يجننو

وف عطور اقل سعر حلوة ف محلات السلماني عندك محل فرح متاع الخربش الي مقابل حلواني شام ومقابل صفه صيدليه شعب سابقا

معروف محل الخربش هظا ف عطور تقليد بس ريحتها حلوووووووة ورخيصه

ف عطر اسمه فراري رجالي تقليد علبته ف اسود وف احمر

يعني تقدري تشريه وتحطي ف الحمام

ويحطوه لك يوم تفريش عطرين علا سرويس او مريا الحمام

ووووووووووووف عطور تلقيها ب 5 وريحتها مقبوله جدا امشي لي محل فرح وجربي

وفي عطور قنينه متاعت 10 و15 وتلقي عطر لونه احمر يعني عادي يجي يجنن علا المرايه

شوفي هاذووو صور لي صالونات بس احمر ف الاسود والابيض حبيت نوريكم كيف ها 3 الالوان يطلعن جنااااااااااان ونازكات مع بعض

والله انا مع كلام عروسة ليبيا بخصوص الشراء و البتات انا في البداية كنت منكلبة بحاجة اسمها بنشري و بنشري وبندير و توا تزنت و قلت اندير حاجة سمحة اتبان و الحاجات الفترش التانيات انديرهن بعدين و مش حنكتر و اندير الي نقدر عليه لانه راهو الواحد ايخلي مصروفه بعدين راهو الي فلوس الي هناك حطها العزيز في الفرح الواحد يساعد شوية ما يقعدش يلهط وخلاص و جايت طلعات بعد الفرح و كل طلعة تبي راه (( ثورتا - مشروب )) و احيانا هدايا عاد ساعتها شن انديروا ونحنا طالعات مفلسات و هما مفلسين يا ناري :033:

عجبني صالوناتك يا احلي عروسة

لعيونك يا قدرك كبير و كل بنات بلادي من المشرق للمغرب و من الشمال للجنوب انحبكم موت

الكهربائيات :-
1- خلاط كهربائي ((شريته))
2-مضرب البيض ((شريته))
3-مكينة التوست((شريته))
4-مكرويف(( شريته )) (( كوشة )) انا خديت مكرويف لاني نخدم و هو اصلح و اسرع ليا و الكوشة عندي كوشة غاز مع انه بنت عمتي قالتلي بنديرلك كوشة هدية يا اما تاخدي فلوسها و تشري بروحك او تجيبها هي بس انا قلتلها بعد ما ضروري منها الهدية عطيني فلوسها اندير بيها حاجة تانية ناقصتني لاني بنستعمل كوشة الغاز
5-عصارة البرتقال ((انا ما خديتهش بصراحة مش عارفة ليش انحس في روحي مش حنستعملها مخليتها في الاخير ))
6-قلاية البطاطا حتي هي ماخديتهش لاني مش حنستعملها تاخد ليترا زيت توا علي راس ورويس بنستعملها و نشريها و الي يقول ما جبتش خلي ايقول
7- طا جين البيتزا حتي هو ماخديتش طاجين كوشة الغاز كويس ((بس احتمال بسيط ناخده ))هو مش ضروري
8-سخان كتل مياه انا نخدم و نحتاجة في الطبخ انطيب الطعام سريع سريع بيه يعني لا نستني المية تغلي لا شئ ((وحدة مطيورة))
هذين الكهربائيات و بعدين الواحد ياخد الي يبيه و يسيب الي ما يبيه علي قولة خويا قالي شكلك انتي بتفتحي المطبخ العربي ...
9- ست البيت (( شريتها)) ضرورية هدي في الطبخ انحس فيه خاصة للمرأة العاملة ..

قمر الليالي للمونتاج-طرابلس
في مونتاج (صور فقط ) أي من الطفولة إلى انت عروسة بسعر 100 دينار فقط
ومونتاج (صور + فيديو) أي فيديو ان وجد من الطفولة والى العرس بسعر 200 دينار
وصدقوني حاجات وابتكارات جميلة جدا ومعالجة صور بالفوتو شوب وتركيب صور حاجة بدعة من الاخير
والبنية اسلوبها مش عادي بكل حدها تجيبيلها الصور وهيا تكملك تسلمه ليك علي سي دي وتخدم علي جهازها الخاص وتسمع منك كان تبي تحطي اغنية معينة عاجبتك وتعالج الصور القديمة والممزقة واحلا ما فيها انها توريك كل شي قبل ما تاخد منك الفلوس
...اني درت عندها مونتاج عيد ميلاد ولد اختي وعجبني عل الاخر.

واللي تبي رقمها تكلمني علي الخاص واني نبعثلها الرقم

1-طاقم طناجر تيفال.
2-طواجين حرارية ((راهو 2 ايسدن ))انا واخده 2 و احد للعزومة و واحد ليا انا وياه يعني كبير وصغير .
3-طنجرة وكسكاس
4-طاجين كيك تيفال ( انا واخده 2 )) واحد دائري كبير شوية و احد الي فيه الحفرة وسط .
5- براريد شاهي
6-بكارج قهوة
7-سفر استعمال يومي انا واخده للعزايم مرات ايجيني خوه عاد بياكل في المطبخ ع طاولة وكرسي وعاد نحنا الليبين ما تحلنا القعدة الا ع الارض
8-سكريات
9-طقم المغارف و الساقم
10-طقم الكواشيك والامواس كل يوم
11-كبابي مق
12-غربال
13-لقامة الكباتشينو تعرفوا انا ما نستغني عنها سريعة وساهلة
14-مبشرة
15-حفاظات ثلاجة الي بالمغطي
16-كاس امية استعمال كل يوم
17-مناشف مطبخ
18-مسحان
19 سلة الخضرة
20-سلة المواعين
21-سطل القمامة حشاكن
22-حفاظة الخبزة ((خبازة))
23-مفارش اصفر
24-ساعة المطبخ ((انا ما خديتهش ))
25-الفواكه الزينة +((زينة التلاجة مزلت ما حصلت وحدات حلوات))
26-طاسات شاهي استعمال خصي
27-طقم غداء استعمال يومي
28-فرشة المطبخ
29-قراضة
30-حفاظات حرارية
31-صونيتين اكبار للضيوف
32-سبتات خبزة
33-طقم الستارة و الذي منو للمطبخ
34-تباسي كاسترد لو في امكانية بس تقدري اديريهن بعدين لو الفرح بعد رمضان
و ما حد ايقيد روحه بحد راهو يا بنات هضا مش فرض راهو و لا انقولوا ضروري منه و كان ما درناش خلاص راهو الراحة والسعادة لا تنشري بفلوس و لا بالبتات و لا بالتكتير و سيورك اتجدد بعد الولادة ان شاءالله ربي يفرحكن و يعطيكن كلكن ...
بنات هضا الي انا درته والله مطلعة المذكرة ابتاعتي و نكتبلكن منها يعني مجهود شخصي و كان في حاجة ناقصة سامحوني ووقضوني عليها ..

بنات بعد خطرها دورت مفارش الغسالة مالقيتش حاجة تعجبني الا الي يشبهن غطاء التلاجة كان تعرفنهن سؤال ابتاعت العروس كيف شكلهن ووين ايبيعوا فيهن ؟؟؟؟؟؟؟؟؟؟؟؟

خيرات يا حلوات
عروسة ليبيا قوليلى من اللى زعلك بس وتو اتشوفى كيف نخليه واقف فى الشمس
ولا يهمك حبيبتى وسعى بالك وحاولى تشغل نفسك وديرى صداقات مع جيرانك باش متحسيش
انك بروحك
وان شاءالله ربى يونسك بيبى حلو يطلع لخالته بيكاتشو

غدغود يا حلوة
اسمعى مرة فى منتدى لفيت رقم لوحدة تلبس فى الصدرا والبنات يشكروا فيها
سجلت الرقم
كان تبى نبعتهولك وانتى تأكدى لانى مانعرفهاش
بس شكروها هلبه اسمها عايدة

راكن تنسن :-
1- كبابي عصير
2- فناجيل قهوة
3-طاسات الشاهي
4-كاس المية
5- طقم الشوك و الكواشيك والامواس
6-اسفر
7-طقم العشاء الصيني
8- الكريستالات
هذين اطقم لازم ايكونن حلوات وعرايسيات لانهن للضيوف وحاجات اتعبر ع انه الحاجة هدي حاجة عروس

ما تبقي من كهربائيات :
1-المكنسة
2- الحدادة

توا انا نبي تقيم عاد ع مجهودي هضا قيمني

عروسة ليبيا شكرا على الحنة هههههههههههههههههههههه
عجبتنى هلبه هههههههههههههههه