love kingy;11354800:
ميرو لما تكونى فاضيه ابقى قوليلى طريقه الترايفل انا عملته مره فى الخطوبه بس نسيت الطريقه
لا هقولك قبل ما اقوم علشان مش ضامنة ارجع تانى
بصى انا مامى تحدتنى انى هعرف اقلبه لانها و عندها حق عارفة انى فاشلة مطبخ ههههههههههه
انا جبت الصينية البايركس
عملت الجيلى الفراولة فى حلة على البوتجاز و صبيته و هو سخن فى الصينية البايركس دى و قطعت فيه موز و فراولة و لما هدى دخلته الفريزر
عقبال ما يجمد عملت كستر فانيليا سهل اوى زى المهلبية الكستر يدوب فى لبن بارد و يتحط على النار الهادية لحد ما يتخن كده و لما برد بردو لازم يبرد علشان مش يسيح الجيلى تانى
طلعت الجيلى و فردت عليه الكستر و رجعته الفريزر تانى
و عملت بودينج شيكولاتة
زى المهلبية بالظبط و بزود كاكاو نشا و كاكاو فى لبن بارد لحد ما يدوب كويس رفعته بردو ع النار لحد ما بقى تخين اسيبه يبرد و افرده على الكستر و الجيلى ادى تالت طبقة و ارجعه الفريزر
اخر طبقة بقى
المفروض تكون كيك بس انا جبت بسكوت مارى و كسرته كده حتت صغيرة
و عملت باكو جيلى تانى و هو سخن صبيته على البسكوت فى حاجة عميقة كده
بقى زى السيريلاك كده و رحت فارداه اخر طبقة على الوش ككده
و دخلته الفريزر تانى
بكلم امى بقى علشان اسألها اقلبه ازاى قالت لى مش هتعرفى و المفروض كنتى عكستى الطبقات و خلاص و سيبتيه كده تقدميه زى ماهو خلاص بقى ابقى قطعيه و اقلبى القطع و خلاص فى اطباق التقديم
طبعا انا مش ممكن بعد التعب ده اسكت و اعمل كده
رحت ايييييييييييييه
طلعته و حطيته فى قالب تانى اكبر مليان مايا سخنة لمده صغيرة اوى علشان الجيلى مش يسيح
اول ما الجيلى اتحرك كده قمت قالباه على صينية التقديم و جريت بيه على الفريزر لانه ساح منى شوية نونو
و بس بالهنا و الشفا
كان شكله و طعمه احلى من بعض الحمدلله
و مش تنسى السكر على البودنج و الكستر