واتمنى بعد انكم ترحبون فيني لاني عضوة جديده في المنتدى
خلال تصفحي للمنتدى لاحظت ان كثير من البنات عندهم مشاكل في الشعر ابتداءا من تساقط الشعر وانتهاءا بالشعر المحروق والمتقصف....
ما اخفيكم الخبر انا وحده مثلكم وحالي من حالكم ان ما كان اردى, انا ما اذكر وقت في حياتي ما كنت فيه اعاني من مشاكل في الشعراللي اتعبتي وحيرتني في حلها فحبيت ابين لكم تجربتي في علاج تساقط الشعر من الألف للياء واتمنى اني اقدر افيدكم.....
من لما كنت صغيره ما كان شعري ناعم وايد مثل خواتي وامي وباقي الاهل وكنت ببراءة الطفولة دايما ابيه ناعم وحلو وطويل لكن للأسف الواقع شي ثاني, فلما كبرت شوي لاحظت ان شعري يتساقط بشكل اكبر من باقي البنات اللي بسني.
من اول ما لاحظت او لاحظت امي بالأحرى اني اعاني من مشاكل في الشعر ما قصرت معاي وابتدت تحاول تعالج في شعري, ومثلكم عارف ما خليت لا حنه ولا سدر ولا خلطات ولا زيوت ولا مساج للشعر ولا كورسات لعلاج الشعر في صالونات محترمه الا وجربتها ولكن بلا نتيجه......
اكره موقف من الممكن انه يمر علي هو لما اروح الصالونات عشان السشوار او القصات. دايما اتضايق من تعليقات الكوافيرات عن شعري ان يا مدام شعرج خفيف ولازم تاكلين زين ولازم تعتنين فيه و تعالجينه( حزتها يصير ودي ازنطها و اقولها لو تدرين شكثر انا عانيت عشان اعالج شعري ما تكلمتي) وما اجذب عليكم انهم دايما يستغلوني ويحاولون يبيعوني منتجاتهم وخلطاتهم مع وعودهم بتحسن حالة شعري اللي كنت دايما اشتريها ورجولي فوق راسي مثل ما يقولون لاني وصلة لمرحلة اليأس....
وفي الاخير لما وصلت لمرحلة الحضيض كنت تعبانه وايد نفسيا ومتأزمة جدا بمسألة الشعر قررت اني ما استسلم واني احاول اعالج شعري بأي شكل من الأشكال واني اترك اليأس وراي واحاول اني اوجد حل جدي للمشكلة مهما كلفني الامر من وقت وجهد وفلوس فتوكلت على الله وبحثت وسالت ودورت عن أحسن دكتورة في هالمجال لين ما وصلت لمرادي...
في أول جلسه مع الدكتورة شرحت لها مشكلتي من الالف للياء وهي شخصت مشكلتي على انها حاله وراثية بالأضافه لأحتمال ان المشكله سببها خلل هرموني فطلبت مني تحليل دم, فما اخفيكم الحال حزتها نشف دمي في عروقي وخفت يكون فيني شي جايد وابتلش ....
على العموم وصفت لي الدكتورة محموعة ادويه انا استغربت من كثرها وقسمت لي العلاج على مراحل اولها ايقاف تساقط الشعر وبعدها انبات الشعر وفي مايلي الأدوية اللي وصفتها الدكتورة لي واللي من الممكن انها تفيدكم....
أولا الكروموسيم
هو عباره عن زجاجتين وحده لليل ووحده للنهار اما عن طريقة الاستخدام هي انج ترشين 10 رشات من الدواء على راسج وتعملين مساج عشان فروة الراس تتشرب العلاج والعمليه تكرر مرتين الصح وفي الليل.
ثانيا الفيجي
وهو امبولات تستخدم مره كل يوم وترك ومع المساج طبعا
ثالثا فيتامينات الشعر
تاخذين حبه وحده كل يوم مع الفطور
واخيرا شامبو فيتان
والله يا بنات هالشامبو روعه ملمسه وايد حلو على الشعر ولطيف جدا على فروة الراس وحسيته ينعم الشعر بعد لكن للامانه يا بنات انا تعبت وايد لحد ما حصلت هالشامبو لان غير متوفر في كل صيدليه
وفي الختام يا عرايس اتمني اني قدرت افيدكم ولو بالشيء البسيط وان شاء الله اذا حصلت ردود حلوة راح اعلمكم عن النتايج
ويا ريت لو فيكم احد استخدم واحد او اكثر من المنتجات اللي عرضتها قبل شوي يخبرنا عنها عشان تعم الفايده للجميع .
ونصيحه لكم خواتي العرايس قبل لا تحطون أي شي في شعركم استشيروا الطبيب خصوصا لو كانت المشكللة مستمرة من فترة طويلة لانه هو اعلم باللي يفيد حالتكم بالضبط
وتحياتي لكن يا عرايس
اختكم البحرينية الأولى