منتدبات تمكين يتفضلن

سلام شخباركم،،،،
هلا أختي أسيرة البدر بسألش انتين من قائمة 1912 ولا من ضمن قائمة المشروع الجديد؟

وأني أشوف عادي هم ما بيخلونش على طول تسوين مقابلات فترة وبتعدي وبعدين بيعطونش شغلة غير وترى المقابلات عادي بالأخص اذا كان تخصصش اعلام
فكري عدل قبل لا ترفضين

اتصلت فيهم عن الدورات يقولون الى الحين ما سووا ومثل ما قالت سندس نقصوا الراتب بحجة التأمين والله ضايعين ولا ندري شو مصيرنا بعد السنتين ؟؟؟؟؟

هلا عرايس شخباركم في احد اتصلو ليه ترشيح حق مركز رعاية الوالدين وادا اتصلو ليه حق ترشيح متى ينادون عشان المقابلة والوظيفة وفي امل ياخدونا من يرشحونا الي عندها خلفية عن الموضوع يا ليت ترد عشان نطمن بس

خيو راحة بال اني من قائمة 1912.. الشغلة زينة عندي ، لأنها دوام حكومي وقريبة كلش، مااخذ اكثر من 10 دقايق ، لكن اللي مضايقني المهايل في الشوارع خصوصا ياي صييف، واوقات خارج الدوام، يعني اخاف اي وقت يقولون تعالي! والقهر من غير اوفر تايم

الله يوفقك اختي

رحت وياريتني مارحت.. توقعت اني بروح بس عشان اوقع العقد، لكن اكتشفت في نفس الوقت اني راح ادخل مقابلة ثانية، وسألوني اسئلة ماتخطر على البال ، شنو مهام المجلس البلدي، وش الفرق بين المجلس البلدي والمحافظة ، وش راح تسوين اول يوم دوام، لو صار لش هالموقف وش راح تسوين ،، واخرها قال لو قبلناش بنخبر تمكين عشان الاجراءات، كل هالوقعة عشان شغلة فاشلة

اسيرة انتي من الاساس مو مقتنعه بالشغله ؟؟

سندس84;11507597:
وانتين الصادق بعد 6 شهور تزيد قميه التامين ويصير الراتب 276و600 فلس كانه

أسيرة البدر;11520875:
خيوووو بسومة


طوارئ طوارئ طوارئ

محتاجتنش تردين عليي ضرووووووووووري
شنو شغلش بالضبط في المجلس البلدي؟
اني اتصلوا فيني شهر 2 المجلس البلدي ورحت مقابلة، وقلت لهم اوكي موافقة وطلعت ماعجبتني الشغلة واتصلت لتمكين وقلت لهم اني رافضة الشغلة ، قالوا اوكي احنا راح نخبرهم ونشطب اسمش من ضمن المتدربين في المجلس البلدي، لأن الشغلة كانت عبارة عن مقابلات مع اصحاب البيوت الايلة للسقوط ، يعني فرارة في الشوارع وطبعا بسيارتي والبترول واحيانا خارج اوقات الدوام ومن غير اوفر تايم!!! اكيد لازم ارفض صح؟

عاد اليوم متصلين مرة ثانية وسألوا عندش سيارة قلت لهم عندي سيارة مشتركة مو كل يوم عندي.. قال لي اوكي تعالي كملي الاجراءات بكرة!!

خيو انتين بعد صار لش جذي؟ اخاف بس عشان يطفشوني وارفض واخاف اوافق ويكون هذا مصيري، فرارة في الشوارع وفي الشمس!!!

الله يخليكم خواتي، كل وحدة تقول لي لو الموقف لها وش تتصرف؟
حاليا افكر اروح استفسر اكثر، واذا عجبني الوضع وافقت ماعجبني مشيت! انتون وش تقولون؟

هلااااا خيو بسووومة ،،، لا والله عاااااادي

اني تخصصي علم اجتماع، ولما نادوني اول مرة، قالوا لي اسوي مقابلات مع اصحاب البيوت الايلة للسقوط وطبعا اروح البيوت بسيارتي والبترول عليي، واذا احتاجوني خارج الدوام من غير تعويض مادي ، طبعا انا رفضت لكن لما اتصلوا لي وكنت توني قاعدة من النوم قلت لهم اوكي، ولما رحت قالت لي وحدة من موظفات تمكين هناك ، مداومة من شهر 12 عندهم ، تقول حاليا يبون سكرتيرات، لكل عضو بلدي سكرتيرة، وتفاجأت لما قلت لها عن الوظيفة اللي مخبريني عنها، بس اللي استغربت منه لما رجعوا يعيدون ليي المقابلة!!! والظاهر مانجحت فيها لأني اساسا مو متهيأة لمقابلة، قايلين لي روحي كملي اجراءات التوظيف، قلت يمكن توقيع العقد!!

اش دعوة المقابلة ؟؟ احنا بدون مقابلة ولا شي !!

علم نفسك بنفسك!!

وحاليا مخلينا سكرتيرات للأعضاء

الله كريم

اي خيو، اللي اخذوهم قبلي نادوهم واول يوم دوام عرفوا الوظيفة، واني حظي مقابلات 2 والظاهر مافيها قبول بعد

هلا اخواتي ما حد رد علي بليز الي عنده فكرة عن الموضوع يرد تراهم اليوم اتصلو لي لمقابلة باجر وامبي اعرف طريقة المقابلة خصوصا من الي اشتغلو تبع تمكين طلب اخير امبي اعرف الي دخلت مقابلة متى الشغل وفي امل ينادون مباشرة من عقب المقابلة

اذا مهلوا عليش من بعد المقابله اتصلي لهم وهم ما يطولون
الاسبوع الجاي المفروض تبدي دورة في مركزي اللغات البريطاني في بناء الشخصيه واللغه الانجليزيه

هلا اخواتي اليوم رحنا مركزرعاية الوالدين في سترة
من بعد ما اتصلو تمكين انكم مرشحين وترحون حق مقابلة لكن هناك انصدمنا عددنا يتجاوز الست والعشرين خريجة من مختلف التخصصات والمركز يمبي ثلاث لا غير والمشكلة الكبرى انهم ما سو لينا المقابلة مجرد محاضرة تعريفية بالمركز وخدماته وطبيعة الدوام وتخللت المحاضرة اسئلة من الخريجين ولا دخلنا مقابلة بحجة ان ناس واجد جو لينا ومن يشوفون الشغل اويحصلون شغل في مكان ثاني يطلعون وفي الاخير خلونا نكتب الاسماء عشان يعرفون من اليه رغبة في الشغل وهم بيتصلون شفتون اعظم من دي البهدلة بليز اخواتي نداء اخير الي اشتغلو من تبع تمكين امبي طريقة التوظيف وجم العددالي ياخدونه في كل مكان عشان نعرف مصيرنا لاتبخلون علينا بالرد خصوصا اني خريجة دين وصار لي ست سنوات عاطلة

ابتسامة نور احنا كلمنا احمد مطر المسؤول المباشر عن كل هالسوالف
ورحنا تمكين
يعني السالفه يبي ليها شوي طحنه وحركة
واعقتد هم قالوا بيجي مدير للدورات بس للحين ما شفنا !

اتصلوا فيني حق دورة في معهد بريطاني في سار الدورة عبارة عن لغة انجليزية وتقوية شخصية ويوم الاربعاء عندنا امتحان تحديد مستوى في المعهد نفسه لمديتن ساعتين والدورة راح تكون يومين في الاسبوع ومن ثلاث ونص الظهر الى خمس ونص ( ما ادري متى نوصل البيت علشان نروح حدنا نتسبح ونطلع ) والله ذل وهذا مله من حقوقنا

احنا معاكم ال الميامين

اليوم رحنا المعهد بعد طول عناء المسافة لو مسافرين السعودية ما اخذ منا كل هالوقت وثاني شي المعهد مكان ما غوىابليس ولده وبعد ما سوينا امتحان تحديدلمستوى والمقابلة وعرفونا بالمعهد وبرامجه وكل شي انصدمنا بالاوقات ( اذا يومين بالاسبوع من ست ونص الى تسع ونص في الليل متى بنوصل البيت ومن بيجود ولادنا من الصبح الىالليل .؟؟؟؟؟؟؟؟؟
والله محتارة كلش اني اخذ الدورة من الوقت وربي يسوي اللي فيه الخير