Cute Mother;13491896:
اليوم متصلين تمكين ع تلفون زوجي
حق وظيفة ادارية بمدرسة خاصة؟!
وقالو له اذا ابي اتصل لهم
ولا اتصلت؟!
خيوو لا تتهاونين
اتصلي و جوفي
حرام تضيعين الفرص من ايدش
اني وياش الاشغال كرف و تعب و المعاش ما يسوى
بس شي احسن من شي
و مثل ما يقولون عصفور فاليد و لا عشره ع الشجره
يمكن يكون عرض افضل من العروض القبليه
يمكن مدرسه قريبه منش .. يمكن موظفينها و ادارتها زينين
و بعض المدارس يعطون معاش من عندهم زياده
يمكن تكون فرصه لا تعوض
و بخصوص بتلكو
ترى الدفعه الجديده عاطينهم عرض حددده كشخه مو مثلنا على الله يا زرع الله
احنا دخلنا باختيارهم .. بتلكو هي اللي خصصت لنا الاقسام اللي احنا فيها
الجدد عاطينهم مطلق الحريه يختارون القسم اللي يفضلونه من ضمن كذا قسم فيه شواغر
و عندهم فتره تدريب تمهيديه من 10 ايام الى شهرين في القسم اللي اختاروه عشان يتعرفون على الشغل و اسلوب العمل في القسم اذا عجبهم وقعوا عقد تدريب السنتين ما عجبهم ينتقلون الى قسم ثاني
و فوق هذا بمجرد ما يداومون 5 ايام من فتره التدريب التمهيدي ينزلون لهم معاش شهر
و كأن سمعت انه معاشهم بيكون اكثر من 300 دينار
الصراحه عرض هالدفعه جداً مميز
و اذا ما تبين الهمله بعيد انتي طلبي و تشرطي و روحي السلمانيه .. هالمره مدلعينكم الراي رايكم و الشور شوركم :thumbs_up:
ع العموم اتمنى لج الخير و الله يرزقج الوظيفه اللي تتمنينهم
من اخت لاختها اقولش لا تضيعين عليش اي فرصه حتى لو ما بتروحين اتصلي استفسري و جوفي الشغله و الدوام يمكن يكون لش رزق فيها
الله يوفقش و يوفقكم كلكم و اسمع منكم خبر توظيفكم وظايف ثابته ..
F:F:F: