بروود حياتنا وش الحل؟؟؟

إنتي إلي عليج ..,

إنج ما قصرتي

وقمتي معاه بواجب الزوجة إتجاه زوجها , وأزيد بعد من هالواجب

وبالغتي جداً بالدلال والدلع له

لدرجة خلته ما يحس فيج .. ويهملج

ويتمادى في تدليل نفسه

لأنه عارف إنج ما بتقصرين عليه بشي!..

*

أنا ما بقولج تطلقي .. طبعاً هالفكرة كلش بعيدة وشيليها من بالج

هذي تعتبر آخر .. آخر الحلول

وحرام عليج بنتج ما كملت سنة .. وهالفكرة تدور في بالج ؟!!! .. تمهلي يبه

إنتي مب في مصيبة

مشكلتج محلولة بإذن الله

*

أنا بقولج أعطي نفسج قدر من الدلال والدلع إلي مغرقة فيه زوجج

بعض الأحيان الرجل إذا شاف زوجته جذي مثلج

يسترخص فيها وبمشاعرها

لأنه عارف إنها بتم تعطي .. وتعطي .. وتعطي

وما راح تعطي نفسها أي شي

لأن كل شي بتقدمه له !..

*

((( خير الأمور أوسطها )))

وأنتي أبد ما قاعدة توسطين الأمور !..

ما أقولج أهمليه وأهملي نفسج وبيتج .. و و و

ولا عاد تسوين إلي قاعدة تسوينه ,

الأثنين مب حل صراحةً !..

عاملي زوجج بوسطية

لا تبالغين دلالج ولدلع له , لا يتمادى عليج ويركب على راسج

ولا تهملينه وتنسينه وتتجاهلينه , وتخليهم يروح برى يدور وحدة غيرج تعوضه

خلج بالوسط

تقومين بواجباتج على أتم وجه ولله الحمد

بدون أي مبالغة في الإهتمام والدلع

*

تكلمي معاه بهدوء وصراحة

قولي له عن رغباتج , أحاسيسج , واجباته كزوج إتجاهج وحقوقج شنهي ,

ما بيضركم شي

لو قعدتوا مع بعض قعدات صراحة وهدوء

منها راحة أعصاب لج وله !..

بدل هالفتور والتباعد .. حاولوا تجددون مشاعركم , بالكلام الحلو والسوالف عن حياتكم الزوجية

*

وإنتي الله يهداج مب عاطيه فرصة له إنه يشتاق لج ويفتقدج ويفتقد حنانج

حتى وإنتي والدة وفي النفاس

رحتي تركضين له البيت

بدل لا تقعدين في بيت أهلج مرتاحة .. وهو هناك وحداني خله يحس شوي بقيمتج في بيته

مب 24 لاصقة فيه وتبينه معاج !..

هو هني ما بيحس بشوق صوبج , لأن دايم الدوم يمه

يعني وين يشتاق وإنتي ما تفارقينه حتى وإنتي بالنفاس ؟!..

*

وشي ثاني !..

وظيفة زوجج

أعتبري إن لها علاقة بنسبة 40%

من هلي قاعد يصير

يعني يا حرام من الصبح إلى الليل كرف

أحس الشغل بعد مآثر على نفسيته

ومغيره عليج بعدة نقاط

لأنه كل نهاره يضيع بشغله وحتى ليله نصه بالشغل

وما يرتاح إلا حزة نومته

وحتى الساعة إلي يجي تغذى فيها .. ما تعتبر شي مستاهل

حطي نفسج مكانه ؟!.

من الصبح لليل , شغل

شي طبيعي نفسيتج تتغير

أطباعج تتغير

ويمكن جد قلبج يصير أقسى

لأن ما قاعدة تعيشين حياة طبيعية مثل البقية

*

فهو يشتغل كل هالشغل ,

يجي يدور راحته بس

ما يدور عليج ولا على بنته ولا على بيته

كل إلي يبيه الراحة وبسسسس!..

يمكن هذي أنانية منه صح , بس بعد ما ينلام

*

أستحملي وأصبري على زوجج

وراعي وقدري كل الظروف المحيطة فيكم

وأهم شي!..

قللي شوي من مبالغتج في هالحنان والدلع , إلي مكبرة راس زوجج عليج

*

ودامه ولله الحمد

رجل خلوق

وماله بالخرابيط والسوالف

حمدي ربج

مع الأيام والشهور والسنين .. بيتغير , وبيهتم أكثر فيج وبالبيت وبأولاده

الموضوع يبي له صبر منج

وعلى يدج قادرة إنج تغيرينه وتسوينه واحد ثاني

بس مب بالمبالغة في الإهتمام والدلع أكييييييييد!..

*

موفقة :065: