:083:
بصراحه كنت افتح المنتدى بين فتره والثانيه بس توني مسجله فيه وحبيت المواضيع الموجوده والمشاركات اللي تفيد وايد من البنات.. وحبيت اشارككم بتقرير عن خطوبتي اللي صارت قبل سنه وشهرين..
((ممنوع النقل والموضوع خاص لمنتدى عروس وبس وما احلل اي وحده تنقله او تنقل الصوره اللي فيه))
اول شي اني سويت حفله جدا بسيطه وكنت ابي يكون كل شي ناعم
فستاني سويته في الزهراء
كنت رايحه ومو حاطه في بالي شي معين بس اني ما احب الالوان واجد وما كنت ابي اسويه اوف وايت لاني ابي اتغير في العرس
فرحت وشفت المجلات هناك واخترت الموديل واللون وسووه لي على اساس انه اول لبسه وطلع عليي ب210 اعتقد ( الذاكره رايحه عليها).. اخترت اللون الوردي الفاااااااتح والشك كان وردي وشووي ابيض واخضر فااااتح وكريستالات رينبو.. لما اخترت اللون سألتهم عن السعر وصاحبة المحل ما كانت موجوده واللي كانت هناك قالت لي بنسويه بس بسعر اغلى لأن الالوان اللي اخترتيها محد يسويها.. يعني قصدها ان محد بيتأجره من عندهم عقبي
طبعا استغربت لأن اللون كلش كان هادي وما فيه شي غريب
بس لما جت صاحبة المحل قالت لي اللون بيطلع كلش حلو.. ورضت تسويه لي بهالسعر
موديل الصدر كان عالرقبه ومفتوح شوي من الوسط وقصة الخصر نازله والطرحه كانت طويله بس ناااعمه فيها شك بسيط من قدام
الحمدلله طلع اوكي بس ما جهزوه لي الا يوم الحفله الصبح والكريستالات كنت مختاره اصغر من اللي حطوهم
ابيكم تشوفون لونه وتعطوني رايكم فيه بصراحه :095:
الباقه سويتها في محل Forget Me Not وما اتذكر بعد سعرها بالظبط بس ما كانت غاليه واجد يمكن 25 دينار
عجبني شكلها بس حسيتها ذبلت بسرعه وطاحت منها ورود مع ان احنا مسويين عندهم باقات من قبل وكانوا اوكي
هذي صوره للباقه ومبين فيها لون الفستان وشوي من الشك اللي فيه
المكياج والشعر رحت صالون الرونق.. الشعر فتحيه لان وحيده كانت مسافره والمكياج عايشه البلوشي
تسريحتي كانت تشبه هذي الصوره من قدام وبعدين ويفي نازل
وكانت الحركه اللي قدام واااجد تناسب وجهي وحطوا لي اكسسوارات بسيطه من عندهم وكرستالات ورديه فاتحه وزعوها على بعض الخصلات
بالنسبه للمكياج كان ناعم بس سمرتني شوي واني ما لاحظت هالشي في البدايه بس بعدين انتبهت وبين في الصور
اهلي وربعي قالوا واجد حلو بس بعضهم كانوا يقولون كلش خفيف ومو مكياج عروس مع انه كان زاهي
مكياجي يشبه هالصوره وااايد
هذي الصوره حصلتها من النت وهي من مكياج عايشه بعد
نفس الطريقه بالضبط بس احس مكياجي كان ازهى شووي
والروج كان لونه وردي فاتح
والتصوير كان في صحاري البديع.. وما عجبني واجد
سوري ادري طولت عليكم واجد
يا ريت تقولون رايكم
واتمنى تدعون لي بالتوفيق وتيسير الامور
