بناءً على طلب العضوات..طريقتي في دجاج مشوي في الفرن ..لذيذ بشهادة الكل

السلام عليكم ورحمة الله وبركاته..

كنت منزلة سفرة عزيمتي لأهل زوجي على وجبة الغداء قبل يومين بالصور ولاحظت الطلب على طريقة الدجاج المشوي بالفرن.. ومثل ما وعدتكم اني راح أنزله في موضوع مستقل وفيت بوعدي..

الطريقة سهلة جداً وتصلح حق العزايم لأنج ما راح تتعبين في الوقفة وعمل الحمصة والإضافات.. مجرد إعداد المقادير في البداية وخلاااااص..



((المقادير)):
*2دجاج حجم 1000جم

*2 كيلو بصل

*قليل من زيت الزيتون

*نصف راس ثوم

*قطعة زنجبيل طازج

*فلفل أخضر حار حسب الرغبة

*بهارات الدجاج الخاصة/ليمون أسود مطحون/فلفل مطحون/كزبرة مطحونة/كركم/هيل مطحون

*3-4 مكعبات ماجي(علبة ونص او علبتين)

*قليل من الملح (أنا أحط رشة بسيطة وممكن أستغنى عنه)

*نص علبة صلصة الطماطم
*****
((الطريقة)):
*نقطع الدجاج بالنصف أو حسب ما تحبين حتى بدون تقطيع او مقطع أرباع.. انتي وما تحبين.. بس أهم شي أنا أنزع الجلد منه.. ناس تخلي الجلد وناس تشيله(حسب الرغبة)..

*نفرم البصل... لا تستغربون من كمية البصل.. لأن يعطي نكهة روووعة.. وعادي لو زادت الكمية الأهم ما تنقص..

*نقشر الثوم والزنجبيل و2 او 3 من الفلفل الأخضر الحار وندقه بالهاون او نخلطه بالخلاط الكهربي مع زيت الزيتون.. ولو دقيناه بالهاون نضيف زيت الزيتون مع الخلطة بعدين..

*ناخذ طاسة عميقة ونضيف كل البهارات فيها نخلطها مع بعض والماجي وخلطة الثوم مع الزنجبيل وصلصة الطماطم ونخليها تتجانس.. ما يمنع ان نضيف لها قليل من الماء لتسهيل خلطها.. بس شوية مااااء مو واجد!!!!

*نخلط الدجاج مع البصل المفروم كله مع بعضه ونبهره بخلطتنا السحرية ولو حبينا نزيد فلفل حار بدون تقطيع ممكن..

*وخلاص نحطها في صينية الفرن ونغلفها بورق القصدير..
ونتركها تتشرب الخلاصة لمدة ساعة على الأقل.. وتقدرين تسوين الخطوات السابقة قبل ليلة وتدخلينها الثلاجة ويوم ثاني تطبخينها

*ندخلها الفرن على درجة حرارة 180-200ْ .. أنا أفضل ال180ْ ونخليها لمدة ساعتين الى ساعتين ونص تنضج على راحة وتصير طرية جداً..

والطعم ولاااا احلى .. صحتين وعافية