لكل اللى بيسال يا بنات عن منتجات جولدن روز انا هقولكوا اللى جربتوا منها
الاول عايزه اقول كل سنه وانتوا طيبين ومتجمعين ع الخير يا رب
ويا انوش يا قمرايه انتى بنت زى العسل وبجد انا استفدت كتير من خبرتك وعارفه انى زهقتك باسئلتى بس معلش استحملونى يا بنات لحسن انا ببقى محتاجه اخد راى حد لو هشترى حاجه بدل الفلوس اللى كنت مضيعاها على شرا حاجات وبتطلع وحشه فى الاخر وتترمى
وبقول لاميره الاموره كل سنه وانتى طيبه عشان عيد ميلادك انا عرفت انك برج القوس زيى يعنى وانا متبعاكى من زمان اوى وبموت فى خفه دمك وتلقائيتك...ولاد برج واحد بقى;)
انا عايزه اقولكوا اللى جربته فى مكياج جولد روز..انا يومها لما شفت الاستاند بتاعهم كنت فى المنصوره ليهم هناك فروع كتيرالرئيسى قدام كليه الطب والتانى ع البحر فى الاخر كده وهو تجمع محلات بيتنزله بسلم لتحت
المهم انا فضلت واقفه ع الاستاند يجى نص ساعه اجرب فى ده وامسح فى ده لدرجه انى فكرت ابقى اعدى عليهم اتمكيج قدام الاستاند وامشى واهو توفير برضه:D
المهم ان ارواجهم تحفه الملمس ناعم وكمان الوان تهبل
اشتريت جلوس اسمهmega shine &volume lip gloss
هو لونه حلو وبيدى لمعه جميله بس مشكلته زى اغلب الجلوسات انه مش بيقعد كتير بس اهم حاجه انه مش بيعمل الطبقه البيضه اللزجه اللى بتتبقى بعد ما الجلوس يروح..لا بالعكس ده مش بيلزق الشفايف اصلا ومكتوب عليه non sticky
السعر 35 جنيه
تانى حاجه جربتها هىULTRA BRILLIANT VOLUME TUBE LIPGLOSS
بس ده بقى معجبنيش اوى هو المفروض فيه لمعه بس بيلزق ..الاول احلى
ده بقى ب25جنيه
BEAUTY MULTICOLOUR DIAMONDS LIPGLOSS
ده بقى يا بنات جامد جدا فيه لمعه مش اللى هى بتاعه الجلوسات العاديه..لا دى لمعه كريستاليه كده وبيبقى تحفه لو اتحط فوق روج
وده كان ب36
SILKY TOUCH COMPACT POWDER
دى بقى جبت رقم 2 منها تحفه بتدى للوش اضاءه ونور بس هى تغطيتها خفيفه بس انا اصلا بكون عايزه حاجه توحد لون البشره مش اكتر وميزته عن باقى البودرات اللى استعملتها انها ناعمه جدا وعمرها ما تجير معاكى ابدا
الايشادو اللى اربع الوان مع بعض على شكل نص كره ده جربته ع الاستاند بس مشترتوش بس لونه حلو اوى وناويه اجربه لما اروح المنصوره تانى لان معندناش هنا فى اسماعليه
هى اسماعليه كده لا فيها بشر ولا فيها محلات يلا هنعمل ايه
اه نسيت اقولكم جربت كمان كرات اللؤلؤ عندهم من التيست بس مشترتهاش بس معجبتنيش عشان لمعتها اوفر يعنى كنت بدعك الكرات بايدى واشوف اللون الاقى لمعه بتطلع بس
بنات ممكن تفيدونى انا نفسى اسكراب عدل للوش ..ايه احسن نوع اللى بعد مستخدمه احس وشى بينور من النظافه
انا سمعت عن استيفنز بالمشمش ياترى حلو واجيبه ؟اللى جربه يقولى
انوش..انا شايفه انك حاطه صوره لارواج بتاعتك فيهم واحد من اماندا لونه على بينك فاتح عاجبنى اللون اوى ممكن تقوليلى بكام وهل فعلا حلو وناعم وبيثبت
نفسى فى روج ناعم وبيثبت..عشان انا مش عندى ارواج خالص وكله جلوسات لان ملقتش نوع روج عدل فيدونى يا بنات..
معلش بقى طولت عليكم اوى وصدعتكم
دى صور الحاجات اللى جربتها
