عيد ميلاد خطيبي كان من 3 ايام :)
فقولت اعمله حاجات حلوة...ومن ضمن الحاجات الي عملتها تشيز كيك بس كانت اول مرة اعمله بالطريقة الي مش بتحتاج بيض ولا فرن
فلما طلع حلو الحمد لله قولت اوريهولكم بقى :)
اولا المقادير
هي اربع طبقات...فهكتب مقادير كل طبقة
اول طبقة:
2 باكيت بسكويت سادة...انا استخدمت اولكر بسكويت الشاي
قطعه زبدة ممكن 50 جرام مثلا...معرفش لاني مش وزنتها بس وانا بحط بقيت اشوف كدا البسكوت بقى يقدر يتماسك ولا لا :)
نفرم البسكويت ..عملته ف الكيتشن ماشين
وضفت عليه الزبدة الطرية لحد مابقى قوامه ممكن يتماسك
مش شرط تضيفي زبدة لحد مايبقى البسكويت عجينه لانك كدا هتخليه دسم اوي
خليه مش مفرول اوي وخلاص...وهو لما يتحط ف الفريزر هيمسك ان شاء الله :)
نجيب الصينية الي هنعمل فيها
انا كانت صينية التشيز كيك مش لاقيااها فعملت في صينية مدورة عادية بس فردت فيها فويل...ولما جيت اشيلها شيلتها منه وطلعته كتلة واحدة ماجرالهاش اي حاجه
نفرد البسكويت ف الصينية ونساويه وندخلها على الفريزر
تاني طبقة
200 جرام جبنة طرية...انا استخدمت جبنة بالقشطة
باكيت دريم ويب
سكر..حسب الذوق بس انا ماحطيتش :)
حليب لعمل الكريمة
بنعمل الدريم ويب...بنضيف لها الحليب المثلج ونخفقها كويس لحد ماتبقى قوامها كويس..ونضيف عليها الجبنة ونخفقها معاها شوية ونحليها...وبعدين نصبها فوق البسكويت وندخلها تاني على الفريزر
ممكن لو شاكه ف تماسكها تضيفي شوية جيلاتين بودرة..بس هي تماسكت عادي جدا :)
تالت طبقة :)
250 جرام جبنة طرية بردو...وانا استخدمت نفس النوم
باكيت دريم ويب
سكر
وحليب...نفس الطريقة الي فاتت
بس بنضيف عليهم باكيت جيلي...
بعد ماجهز الجبنة والكريمة مع بعض زي الطبقة الي قبلها...بضيف عليهم باكيت جيلي مش متدوب ف مية
يعني بفرغ الباكيت عليهم كدا واقلبه كويس
هيديني لون حلو وقوام حلو كمان...وطعم الجلي هيكسر دسامة طعم الجبنة والكريمة
ونصبها فوق الطبقة التانية وندخلها لتالت مرة الفريزر
رابع طبقة :)
باكيت جيلي
كوبايتين مية واحدة سخنة وواحدة باردة
نحضر الجيلي بالطريقة المعروفة ونسيبه يبرد بس مش يتجمد...يادوب يبرد بس
ونطلع الصينية من الفريزر نصب عليها الجيلي ونذخلها تاني
وادي شكلها لما طلعت :)
وادي من الجنب شوفوا الطبقات باينة شكلها ايه؟
وهنا زينتها...كتبت عليها 26 لانه حبيبي هيكمل 26 سنة ... ربنا يديله طولة العمر ف طاعته ورضاه
وادي قطعتي :)
وده من الجنب
اتفضلوا معانا
اتمنى لو عجبتكم تدعولنا ان ربنا يتمم لنا على خير ويحفظه ويحميه يااااااااارب
وطبعا ماتنسوش التقييم...:) بس الدعاء اهم يعني الي مش عايزة تقيم براحتها بس ماتنساش تدعي
معلش انا كنت يومها مستعجله اوي وتعبانه اوي اوي فمش صورت كل الخطوات ومش كانت متقنه
لكن ان شاء الله اعملها تاني واصورها
وفكرت المرة الجاية اعملها ف كاسات او اطباق خشاف...واعمل كل طبق بنكهه ولون شكل
يعني اول طبقتين يبقوا متشابهين ف كله...لكن تالت ورابع طبقة يختلفوا
اجيب جيلي الوان كتير
واخد لون واخلط نص الباكيت بالكريمة والنص التاني ادوبه واعمله جيلي واصبه عليها وده يبقى لون كاسه
والكاسه التانية نفس الطريقة بس بجيلي لون تاني وهكذا
:)
