السلام عليكم ورحمة الله وبركاته
حبيت اوريكم طريقتي ف عمايل الشوكليت رولز...هو ف الاساس المعتاد ان يتعمل سينامون رولز بس انا واخويا مش بنحب طعم القرفة...بنفضل اكتر الشوكلاته..فقلت اغير فيها:)
وادي النتيجة :D:D
اول حاجه المقادير
مقادير العجينة:
2 كوب دقيق
قطعة خميرة
ماء دافيء وسكر للخميرة
ماء دافيء او حليب للعجن
1/4 كوب زبدة
بيضة صغيرة..او ممكن تستغني عنها
لو مش هتعجني بحليب ممكن تحطي حليب باودر
معلقتين سكر عشان العجينة نفسها يبقى طعمها مسكر
ذرة ملح...دي ف اي حاجه حلوة بتكسر الطعم الحلو وتخليه مايجزعش :)
مقادير الحشوة:
شوكلاته خام نسيحها ف حمام مائي ومانخففهاش :)
مقادير الصوص:
3 مربع جبنة كيري...وجربتها بالمثلثات بردو نفعت :)
تلت كوب حليب
سكر...حسب الحاجه...انا بحب اعملها مش مسكرة اوي لاني مبحبش الحاجه المسكرة
ونضربهم ف الخلاط سوا...انا بحط الجبنة ف المايكرويف شوية عشان تطرى ولما اضربها تدوب ماتتكسرش وتعمل كلاكيع
لو لقيته سايل اوي ممكن احطه ع النار شوية بيتقل
الطريقة :
اول حاجه بسيب الخميرة تخمر او تفور...بحطها ف مية دافيه وسكر واغطيها واسيبها شوية
اكون انا نخلت الدقيق...ومعاه السكر وذرة الملح وشوية البيكنج باودر..والحليب البودرة
النواشف كلها يعني
لما الخميرة تفور بعمل حفرة ف وسط الدقيق واصبها فيه واعجن العجينة كويس
ازود مية لو العجينة ناشفه وازود دقيق لو بتلزق ف ايدي لحد ماتبقى بتطلع من ايدي وعامله كورة
واضيف الزبدة
افضل اعجن فيها شوية...حوالي 10 دقايق وبعدين ادهن الطبق الي هسيبها فيه زيت واحطها واغطيها واسيبها تخمر
لما تتضاعف وتبقى جاهزة للاستخدام اخدها
وافردها بالنشابة على شكل مستطيل..
اجيب الزبدة من التلاجة..لازم ماتكونش سايحة...هنا ف الصورة كانت الزبدة طرية فلما فردتها ساحت...لكن لما عملتها النهارده عملتها بزبدة جامدة مش سايحة وده الافضل لان لو سايحة هتطلع من العجينة وتبوظ الدنيا
بحط الزبدة ف وسط العجينة واطبق عليها العجينة وافردها
واراعي اني افرد ف اتجاه واحد طول الوقت عشان ماطلعش الزبدة من العجينة من جزء معين
واطبق تاني وافرد واكرر العمليه دي لان ده بيكتر عدد الطبقات
وبعد ماخلص اسيب العجينة ترتاح شوية ف التلاجة حوالي نص ساعة
ف الوقت ده اطلع الشوكلاته الخام اسيحها ف حمام مائي او ف المايكرويف
وماخففهاش...لاني عايزاها تمسك ف العجينة وماتنزلش منها وهي ف الفرن لان لو نزلت هتتلسع وطعمها هيتغير
وادهن الصينية الي هحط فيها واجهز نفسي
لما اطلع العجينة افردها تاني مستطيل متساوي
وافرد الشوكلاته عليه بس اسيب حوالي 1 سم في كل الاتجاهات عشان الشوكلاته ماتطلعش منها وكمان عشان تعرف تقفل كويس ماتفكش ف الفرن
والف العجينة على شكل اسطوانة
وبعدين اقطعها دواير عرض الواحده حوالي 2 سم
وارصها ف الصينية واسيبها تخمر تاني شوية
ف الوقت ده اشغل الفرن عشان يسخن
حوالي على 200 او 220
بعد ماتخمر وترفع شوية احطها ف الفرن
لحد مالونها يبقى دهبي كدا...لو لقيتها احمرت من تحت ولسه من فوق ماستناش عليها لانها ممكن تتلسع بسرعه
اشغل الشواية احمرها من فوق
واكون محضرة الصوص اول ماتطلع من الفرن اصبه عليها
وبعدين اجيب شوكلاته من الي كنت مسيحاها اخففها شوية وازينها بيها
وده الشكل النهائي :)
بالهنا والشفا
ملحوظة مهمه :)
انا عملت الصنف ده اكتر من مرة فهقولكم الغلطات الي وقعت فيها
1-لما الشوكلاته بتسيحيها زيادة عن اللزوم او تسخن اكتر من اللازم...بيطلع منها الدهون والسوائل الي فيها وتبقى مرملة كدا او مكتكته...ولما تيجي تفرديها مش بتبقى حلوة...فياريت نخليها تسيح مش تغلي
2-العجينة طول ماهي مش ملساء يبقى محتاجه تتعجن زيادة...اعجنيها وهتلاقيها بتنعم معاكي
لو بتلزق يبقى محتاجه دقيق لو ناشفه يبقى محتاجه مية
احسن قوام للعجينة لما تكون مش بتلزق وطرية ف نفس الوقت
3- الشوكلاته لو سايله هتنزل ف قاع الصينية مش هتستحمل درجة حرارة الفرن العالية...فهتتلسع وطعمها هيغير وهتلسع الرولز من تحت فتبان زي المحروقة
4- الصنف ده اساسا هيبقى مسكر...فخلي بالك وانتي بتحطي السكر للصوص.ولازم الصوص يتحط والصينية لسه طالعه من الفرن
اممم...مش فاكرة بس لو افتكرت حاجه هقولها :)
ويارب يعجبكم :)
ولو عجبكم ماتنسوش التقييم ياقمرات :)