ياقلبي اللي عذبوك المخاليق.....
......اليا متى ياقلب وانته بهالحال
لاناوي تصدق ولا ناوي تفيق.....
.....لاقلت لك خانوك جريت موال
عايش على الذكرى وذيك الطواريق...
....ماغير زوله شايفً بين الازوال
ادري جروحك ياخفوقي مفاتيق....
......والفكر لاجله بالهواجيس شغال
بالوجه بانت علتك والمحاريق....
.....الحزن مايخفيه برقع ولا شال
ادري دموعك في عيونك مغاريق....
.....تنثر على خدك من الجمر شلال
ادري حزين وعذبتك التفاريق...
....يغيب عن عينك ويبقى على البال
حتى متى يبقى لحبه عواليق....
.....ياقلبي انسى مابقى غير الاطلال
باعوا غلاك وعشرتك بالمواثيق.....
....وان غربو ياقلب لك طيب الفال
لك عزة ترقا بها للشواهيق...
......فيك الشموخ اللي به النفس تختال
ياقلب ماعاد له بالمعاليق.....
.....خلاص شيله مابقى شئ ينقال
راحت حياتك كل ابوها مساريق....
......بين الطعون وبين تحطيم الآمال
ياقلب ريحني فدوك المطافيق....
....معقول تنهيني على شان رجال
