سمعو قصت ولادتي بالغالي

بسم الله الرحمن الرحيم

او كل عام وانتوا بمليون خير

قبل ما اقول لكم قصتي بهذر عليكم شوي .........ههههههههههه

سمعوا ...انا لي سالفه مع رقم تسعه

اقول لكم السالفه.........

يوم اللي ملجت{انكتب كتابي}صادف يوم خميس 9,ويوم زواجي بعدصادف الخميس 9

وربي رزقني اول ولد في يوم الخميس 9وولدي الثاني بعد جبته يوم الخميس 9

اما هالمره فان موعد ولادتي باخررمضان واساسا يوم9رمضان يصادفيوم الاحد مو الخميس

فقلت هالمره بدل يوم 9 بيكون شهرتسعه فانا من نفسي قررت ان ولادتي بتكون امايوم6وهو

يصادف اول خميس في رمضان اوبتكون يوم13وهو ثاني خميس في رمضان اويوم20وهو ثالث

خميس في رمضان

يالله الحين بعد هالمقدمه الطويله العريضهحيام سمعوا قصتي ...........

كنا حوامل انا وزوجت اخوي قبلي بكم يوم واختي قبلي بشهر ونص

ولدت اختي بدية شعبان ومت من القهر ابي اولد خلاص وبعدها بثلاث اسابيع ولدت مرت اخوي ااااااااااه صج قهر مع انها ما اخذت من التاسع الااسبوع بس لانها ماشاء الله حامل بتوأم ومن الشهر السادس واهي مفتوح عندها الرحم وحالتها حاله

المهم على هالحاله بقيت بروحي اعاني مافي مشاركه وجدانيه هههههههههه

ومن اول يوم في التاسع واناكل يوم ابي اولد وزوجي يقول لي انا ابيه يتربى في بطنج ان شاء الله تكملين التاسع
بس مع ذالك كنت متوقعه اكمل التاسع وحتى تجهيزاتي ماكنت مستعجله عليها

المهم يوم 6رمضان اول خميس في الشهر قعدت اراقب نفسي انتظر اي بوادر بس ولاشي
وذيك اليوم كان السحور ببيت اخوي عقيقة البنات
طبعا كانت كل الانظار علي ,ها متى بتولدين ...ها مافي اي بوادر .......وي مسكينه بقيتي لحالج ...الله يعينج شكلج منتهيه ....الخ......

قلت لهم لابولد الخميس الجاي ....مصدقه روحي هههه

المهم عدا الخميس وعدا الجمعه وبيوم السبت تبتدي القصه """"""""""""""""

يوم السبت كان يوم عادي العصر دخلت المطبخ اجهز الفطور {طبعا كان الفطور اي كلام ,بيتزا شكلها مايشبه البيتزا وكريم كرمل وفطاير جبن}

طبعا بعدالفطوركنت احس بارهاق تمددت على الارض اريح شوي والعيال يلعبون في غرفتهم وابو العيال يطالع طاش ماطاش

نمت ساعه وبعدها قمت وانا نشيطه ومزاجي عال{طعا كانت عندي الام خفيفه تجيني من الشهر السابع وبهاليوم كنت عندي نفس الالام الخفيفه يعني ماكانت ازيد من كل يوم}

المهم مثل ماقلت كنت رايقه ومزاجي عال قمت تحممت وكشخت وتعطرت وتوني جالسه على الكنب الا احس بنقزه قويه ببطني ,دقيقه الا احس برطوبه قلت يمكن يتهيألي الا احس ينزل ماي هني خفت شوي وقلت لزوجي فلان ينزل علي ماي هني اخترع الرجال وقال لي اش مايه قلت له والله ماي قال لي يمكن يتهيألج وجاب لي فوطه جلست عليها شوي الا بقعه كبيره وكان لون الماي وردي يعي مخلوط بدم

المهم قالي زوجي شسوي الحين؟قومي قومي المستشفى قلت له جيب لي بجامه خل اغير ملابسي ,وساعدني زوجي وركبنا السياره متوجهين للمستشفى
طبعا العيال مانا في السياره بس ما قلنا لهم اني بولد

وصلت الطوارئ وما ادري ليش كنت خايفه وزوجي يطمني ويدعي لي
دخلت الطوارئ وسجلت بياناتي ولما سألت عن الدكتوره قالو انتظري شوي اهي داخل تعاين حامل فيها افلونزا الخنازير
يمه بروحي خايفه بعد فلونزا خنازير

طبعا الماي كان كلش ينزل لدرجة لما وقفت وصل للارض
قلت للممرضه طيب شسوي بعمري مع هالماي قالت لي انتظري الدكتوره على السرير
انتظرت الدكتوره لح\د ماجات اكشفت علي وقالت لي مفتوح الرحم 4سم وكيس الماي مفتوح يالله فوق ولاده
فرحت وخفت في نفس الوقت{انا ولدت مرتين قبل هالمره بس كان بينهم سنه بس واخر ولاده من سبع سنيين ونص }

صعدت فوق وغيرت ملابسي واصروا اسلم جوالي وفلوسي للامانات وبجذي انقطع اتصالي مع العالم الاخر

طبعا كنت حاطه مكياج خفيف ومتعطره ورايقه لا ومسويه روحي متدينه اقرا سورة مريم واكلت تمر واسبح هههههههه ماشاءالله علي ههههههه

وكل شوي يزيد الالم بس كنت اقر اتحمله خاصة انه كانت الطلقات مو متسارعه يعني بين الطلقه والثانيه في وقت

طلبت من الممرضه تفك المغذي والتخطيط عشان اقوم اتمشى قالت لي اوكي بس لاتبدين
وظليت اتمشى واسبح شوي جات الممرضه تناديني ...خصله تعالي ياله وانا اردعليها لا ابي اتمشى بعد ,

وظليت اتمشى وظلت الممرضه كل شوي تناديني وانا اقول لها ابي اتمشى لما انسدح على السريراحس الالم اقوى والوقت اطول ,تقول لي بس لازم احط عليش التخطيط اشوف نبض البيبي ودرجة الطلق
من كثر ما تلاحقني استسلمت ورحت انسدحت على السرير

وبتدا مشوار الالم الجد
طبعا انا لما وصلت الطوارئ كانت الساعه 11ونص ولما صارت الساعه 2ونص جلست انادي الدكتوره ابيها تكشف علي لان الالم صار كلش قوي وابي اعرف كم سم صرت

المهم كل ماناديت الممرضه تصبرني شوي لين حسيت ان الالم صار جااااااااااامد وقتها كنت الساعه اربع الاربع قمت انادي ابي الدكتوره تطلعني على مسؤليتي ابي اروح مستشفى خاص ابي عمليه
الا تجي الدكتوره وتقول لي بكل تعجب ليش عمليه؟مافيج الا كل عافيه وبتولدين طبيعي ان شاء الله
قلت لها لا ابي عمليه ما اقدر اتحمل
والله كانت الدكتوره طيبه طمنتني وسمت علي

كشفت علي قالت ماشاء الله 7سم ووضعج كلش تمام الحين بعطيج ابره تروح الالم وتنامين ولما تصحين بعد ساعتين تقريبا بتكونيين جاهزه للولاده

قلت لها اي تكفين ابي الابره ابيها
عطتني الابره وفي نفس الحظه بديت ادوخ واحس اني بفقدالوعي قالت لي هاذا تاثير الابره
دقيقه الاجاتني طلقه قويه حيل وحسيت بحركه قويه من البيبي كان يمر في الحوض وتوا الالم بيروح الا تجي طلقه ثانيه حسيت ان البيبي خلاص بيطلع

طبعا الكتوره كانت لسه جنب السرير بس ورا الحاجز وكانت بتطلع من الغرفه
طبعا انا هني حسيت اني متوهقه ومو قادره حتى اتكلم بس قلت في فسي ياخصله لازم تستجمعين كل طاقتج وتنادين الدكتوره قبل ما تطلع وتتوهقين صج

المهم الحمد لله قدرت اعلي صوتي شوي وقمت اقولدكتوره طلع البيبي
ثانيه وحده الاالدكتوره فوق راسي اهي وثلاث ممرضات وكانت مرتاعه وتقول اي بيبي اللي طلع
طلت علي وقالت يالله ياخصله صحصحي ولاده ولاده خلاص اول ماتحسين بالم دفعي
طبعا في ثواني بس كانوا الممرضات مجهزين كل شي
بس انا ماكنت قادره ادفع لاني تقريبا مخدره واحس بفقد الوعي خلاص والدكتوره تطق على رجولي وتقول اصحي البيبي بختنق لازم تدفعين يالله ياخصله بس شوي

الحمدلله الله سهل والدكتوره كانت شاطره وطلع احلى قمر بالكون وقبل مايقصون سره سالتني الدكتوره عندج بنات قلت لها لا عندي ولدين ضحكت وقالت لي جاج الثالث{طبعا ماكنت متاكده من نوع الجنيين بس كنت اظن اكثر ان بنت} وحطته على صدري
فرحت وظليت احمد الله واحمدالله ومو مصدقه شلون ولدت
وياعمري كان مثل القمر بس الغريبه انه ماكان يصيح مثل باقي المواليد لا كان صياحه صياح واحد مقهور استقربت من طريقة صياحه بس تذكرت على طول اني طول فترة حملي قضيتها صياح على الفاضي والمليان
وظل ولدي ثلاث ايام كل صياحه صياح مقهور بس بعدين الحمدلله صار صياحه طبيعي

المهم الحمد لله ولدت الساعه 4وعشر دقايق وقت صلاه الفجر بالضبط

ماشاء الله ربي سهل علي وفرحني بشوفة ولدي

سالتني الممرضه اش بتسمينه قلت لها بسميه ؟؟؟؟ قالت مااء الله على اسم العيله قلت لها اي
وبنفس اليوم العصر جا زوجي يزورني ومعاه امي وفرح حيل بالولد وجاب لي ورد هههههههه

بس قلت له بو فلان اذا قلت لك ابي احمل مره رابعه تكفى اكفخني باقرب شي يمك
ضحك وقال لي ممنون

طبعا اليوم لي ثلاث اسابيع من ولدت والحمد لله وضعي زين وكان ودي احط لكم صور ولدي بس للاسف ماعرفت
على العموم سامحوني على هذرتي الزايده والفال لكل الحوامل ان شاء الله .