مرااااحب بنات شلووونكم
كل مرة اقول بكتبها وما يصير عندي وقت واليوم حاولت اكتبها لكم قبل ما ارجع
بيتي ..انا موعدي على حساب الدورة تاريخ 16/9 بس انا قدمت تقريبا اسبوعين
وما كان عندي اي احساس اني راح اقدم الحمدلله ان الله سهلها علي .
في ليلة 31/8 حسيت حركة البيبي صايرة غييير وااايد نشيط على غير عادته
ابي انام مو عااارفة نمت وهو كان يتحرك بقوة ماشاء الله وانا نايمة احس بحركاته
مو راضي يسكن وما نمت عدل قعدت للصلاة الفجر ورحت بتوضا الا واحس بشىء
ينزل مني كني مسويتها على نفسي ورديت رحت اغسل ونفس الشىء لززج
قلت هذي يا افرازاات او ماي البيبي ورحت اصلي الا ويرد ينزل مني
قمت حطيت لي فوطة وقلت خلاص هذا ماي البيبي لا مفر يعني ولادتي يا اليوم يا باجر
رحت على السرير ابي انام مو عارفة افكر في الولادة وخايفة انتظرت لما صارت 9 ونزلت
السووق خلصت باقي التناتيش وحفيت ورجعت الظهر صليت ولميت اغراضي ولازال الماي ينزل
استخدمت فوط وايد وكلينكس ومصرة ما اروح المستشفى الا ويا الطلق
للعلم معاي الام خفيفة ومحتملة جدا ولكنها غير منتظمة انا اتوقعها ريح استقبال يمكن
لأني اعرف الطلق عدل هذي ولادتي الثالثة
ومر علي اليوم كامل وما في طلق عدل وبحركتي مع اليهال وتبديلهم الماي كل ماله يزيد
وفي الليل اتصلت على زوجي قلت له خل تلفونك مفتوح يمكن في اي لحظة اروح
المستشفى
وقعدت عند امي وزاد الالم لكنه مو منتظم واقدر اتحمله ومر علي اليوم الثاني كامل
وانا نفس الحال كل ما اتحرك يزيد نزول الماي وقلبي معورني على البيبي خايفة ايصير له
واليوم الثاني فطرت اكلت بس رطب وشربت ماي وقمت اقرا سورة مريم وسورة الانشقاق
وطول اليوم امي وخواتي يحنوون علي روحي المستشفى خلاااص مو زين واستسلمت ورحت
الساعة عشر في الليل فحصوووني لقته مفتووح 2 سم وللحين الالم
مثل الام الدورة واقوى بشوي يعني اقدر اتحمله
وعلى طول حولتني غرفة الولادة الساعة 3 الفجر وحطوا علي التخطيط والمغذي وضليت ليوم
ثاني المغرب وانا لا زاد الطلق وهذا حالي قمت اصيح واصيح واترجاهم يطلعوني
انا مافيني شىء خلوووني اروح البيت واترجى فيهم قلت لهم بس طلعوني الجناح
مال الترقيد والله تعبت نفسيتي وانا تفكيري في اليهال كلما فكرت قمت اصيح بزيادة
نفسيتي ساااءت جدا انا لو ما نزول الماي والله ولا اروح لهم وترجيات فيهم ولا رضوا
مع ان الممرضات البحرينات وايد طيوبين واسولف معاهم ما فيني اي شىء
وندمت اني رحت لهم انا ما احب لا تخطيط ولا المغذي وهذ الشىء مللني
قلت للدكتورة ابي اتحرك وشالوا عني وقمت اتمشى في الغرفة وادعي ادعي من قلب
ان الله يسهل علي ويخلصني وكل شوي تجي دكتورة واقولها يا اطلعوني يا طلق صناعي
وجت دكتورة فلبينية قلت لها فحصيني يمكن توسعت قالت ما في طلق شلون افحصك
وفحصتني وشافته صار 3 سم قلت لها دكتورة متمللة وتعبانة نفسيتي ابي اولد
حطوا لي طلق صناعي قالت بتسوي لي توسعة وسوت لي الالم زاد بس ما توسعت
وجت ممرضة هندية ترجيت فيها بعد حطوا لي طلق صناعي ما اقدر تعبت من القعدة جدي
قالت اذا ما في ولادة باجر يمكن يحطون طلق صناعي وقلت لها فحصيني يمكن توسعت
ونفس الكلام اتقول ما فيج طلق لان يبين من جهاز التخطيط وشافته نفس الشىء
3 لان طلقي مو منتظم الساعة سبع حسيته انتظم كل 10 دقايق وللحين اقدر اتحمل الالم
مع ان زاااد بس انا على طول اصلي على النبي واستغفر وسورة الزلزلة وماشاء الله قبل
ما اكملها كان يخف علي الالم كأن سحر سبحان الله
والساعة عشر جى زوجي قعد معاي خمس دقايق وراح وانا ما فيني شكله برد علي
وطلع ورجع الالم حسبته كل خمس اوسبع مو متذكرة وضليت للساعة عشر ونص
قامت هذي الهندية عقب ترجيات مني سألتني تبين اسوي توسعة قلت لها أي
ما علي ودخلت ايدها
قامت تدور وتدور دوختني قالت ماما خلااااص الحيييين يجي ولااادة وانا فررحت ان بووولد
اخيييرا حطيت اعتقاد في بالي يمكن الصبح اولد واشتد الطلق صااار حامي جدا يعني من
10 ونص بدى الطلق العدل
وانا للحين على الادعية وسورة الزلزة واايد خفف علي هالشىء وعقب جتني ممرضة بحرينية
قالت لي اذا وايد تتألمين قولي لي عشان اعطيج ابرة وانا كلما اتألم ما اصارخ
ولازلت مواصلة على الاستغفار والادعية والتنفس بعد والساعة 11 ونص خلاص ما فيني
قوة تحمل عطتني ابرة ودوختني لكن ما قدرت انام الطلق كان حامي شلون انام مع هالطلق
وتخدرت
تماما حتى اذكر فحصتني وانا مرتخية تماما وقالت لي وصلتي 7 وكأني في حلم
بعدها قمت وانا في شدة الألم اقول يا مخلص النفس وبالغصب قدرت اقولها هالعبارة
وهي معاي تدعي كلما شافتني اتألم قامت تدعي وانا قول يالله يالله خلصني
بدون ما اصارخ الحمدلله كنت هادئة
واخر شىء زاد الالم بعد وانا مو قادرة قاعدة اتحرك في السرير وتقول لي اخذي نفس البيبي
يتعب من الطلق لان يصير البطن متحجر واذا ما تنفستي بيقل عنه الاوكسجين
انا خفت عليه يصير له شىء وانا اتألم واقولها صدقيني مو قادرة اخذ نفس كنت اكتم على
نفسي
بس حاولت اخذ نفس والحمدلله مع الكمام قالت لي وايد زين
وقالت انا بوقف عند الباب ومن تحسين بشىء مثل الخروج على طول ناديني
وفعلا حسيت وناديتها تعااالي لياحس روحي بدفع وقاست التوسع قالت خلاص كامل
وقامت بسرعة تتحرك وجوا معاها ثلاث ممرضات بحرينيات كلهم صاروا اربع
بس بعدها ما حسيت بشىء وشفتهم يحاولون يقعدوني وانا مو قادرة اصلب نفسي
والا ترشني بالماي واسمع اصواتهم يالله عشان تطلعين الجاهل وبعدين استوعبت اني
قاعدة اووولد يعني انا نايمة ومو حاسة لنفسي حتى الممرضات ايقولون للي عطتني الابرة
حشى هي مو ابرة الا عطيتينها اياها اكي تخدرت وهي كانت عاطتني ياها على بالها
اني مطولة وما بتوسع بسرعة لكن الله كان رحيييم بي والنعم بالله صدقوني يابنات
اللي يكون مع الله في كل وقت الله يكون معاه في الشدة وبعدين وانا بدفع
جسمي كان خامل شفت يد وحدة من الممرضات قدامي وجودتها بقووة وقالوا لي مع الالم بس دفعي
غير جدي وقفي وانا حاولت ادفع مرتين لكن الطلق برد علي وثالث مرة جاني الم بسيط بسيط
مو حار مثل الطلق ودفعت مرة وحدة وشررررف حبيبي القمررر فدددديته
وحسيته مثل الخيال طالع مو مركزة عليه طلع حتى صياحه ما سمعته
لاني طلعته وغفت عيوووني وانا ايخيطووني نايمة بس كلما احس بالنغزات اقولهم حطوا البنج
وبعدها جابته لي وعلى طووول بسته كان وردي وله خدووود نتفة الله يرزق المحروميين يااارب
وعقب طلعوني لجناح يحطون في اللي توهم والدين ورقدت للصبح الساعة اربعع قعدوني
ونقلوني لغرفتي وكانت هذي اسرع واسهل ولادة من ولاداتي لك الحمد يااااربي
لاني كنت طول فترة حملي ملازمة الاستغفار وسورة مريم والزلزلة والانشقاق
لا تاخذون أي شىء يا بنات مثل الخروع وغيره ذكر الله هو الوحيد اللي بيسهل عليج
واخيرا اتمنى للجميع ولادة سهلة وكانت مدة طلقي اللي ما قدرت اتحمله ساعتين ونص بس
بينما ولادتي الثانية كانت ما يقااارب 9 ساعات من الطلق غير المحتمل وساعتين
طلق عادي .
شفتوا شلون كل ولادة تختلف عن الثانية يعني الساعة عشر ونص كان 3 سم والساعة 1 توسعت كامل
وان شاء الله ما اكون ثقلت عليكم و يااارب تستفيدون من تجربتي ..
وكانت ولادتي تاريخ 3/9/2009 م بنفس ذكرى زواجنا