احتاج مشورتكم ولا يتخذ قرار اندم عليه..

السلام عليكم ورحمه الله وبركاته.. ورمضان كريم عرايسنا الحلوين وربي يعوده عليكم بالخير..اشتقتلكم وايد بس على طول متابعتنكم بس ظروفي النفسيه ومشغولياتي بعدتني شوي..اليوم انا محتاجه لكم اشد الاحتياج لانه نفسيتي تعبت تعبت تعبت..انا ملجت(انكتب كتابي)من شهور قريبه وزوجي والنعم فيه انسان محترم واحبه ويحبني والحمدلله بس بعد الملجه اتغير علي صار يتحكم فيني ويقول لا وايه ويمنعني من بعض الطلعات الي ما تدخل راسه و.و.و. واتحملت وقلت هو الحين ريلي ومب مشكله بتحمله شوي وانا بطبيعتي ما احب التحكم ولا السيطره بس هذي مب مشكلتي.. مشكلتي يا اخواتي انه صار يغار علي بزياده لا وصار يتحكم بشغلي انا موظفه والحمدلله بس مشكلتي دوامي مختلط بس انا انسانه الحمدلله ملتزمه واخاف ربي واتعامل مع الشباب الموظفين ضمن حدود الشغل وبس لكن زوجي قال لي احول الدوام عشان ما يحبني اداوم مع شباب بس

المشكله انه في ترقيه طالعتلي ولو طلبت نقل رح يسحبوا الترقيه مني وانا احتاج هالترقيه لاني مسؤوله عن اهلي واهلي محتاجين وظيفتي..حاولت اتفاهم واتكلم معاه مره بهدوء وعقل ومرات اعصب وانفعل وفكرت بالانفصال كثير بس اتعوذ من ابليس واقول حق عمري انه له حق وهو يحبني ويغار علي ودايما يقول لي انا ما اشك فيكي بس ما اثق بالي حواليكي وانا ما احب زوجتي تتعامل مع شباب؟؟صراحه اتأزم الموضوع وصار دوامي شغله الشاغل حتى انه صار يهددني ويقول لي عندج شهر تحولي دوامك

؟؟لحد ما تاخذين الترقيه وبعدين حولي بس انا لو خذيت الترقيه وحولت رح يسحبوها مني؟؟هذي قوانينهم؟؟شو اسوي تعبت من الضغط النفسي الي انا فيه زوجي صار عصبي من دوامه وراتبه الضعيف وبالتالي اترتب عليه تاجيل العرس ودوامي انا تاعبه اكثر وما صرت اعرف اتعامل معاه ابدا احسه اتغير علي وصار مو متفهم مثل اول ومرات اندم على ارتباطي فيه ؟يمكن تشوفوا مشكلتي تافهه بس لا والله مازمتني وتعبت وايد منها لاني بين نارين انا واهلي وانا وزوجي؟؟وما اقدر اوافقه واظلم نفسي واهلي وما يطاوعني قلبي اخليه هو متضايق وتعبان من دوامي؟؟ارجوكم ساعدوني جزاكم الله خير واسفه واايد ع طول الرساله بس ما عندي غير ربي وانتم..
اخاف اتخذ قرار اندم عليه ساعدوني وعطوني مشورتكم جزاكم الله خير لانه قرار الانفصال يدور في بالي لاني صرت احسه اناني وهمه راحه باله وبس وانا ما تشغله همومي وطموحي ادعولي بالخير والستره وراحه البال..
احبكم في الله