النهارده عملت مكرونة نجرسكو...بس بطريقتي بقى :)
هو المعتاد انها بتتعمل بالبشاميل
بس انا مش بحط بشاميل عشان تكون خفيفة شوية ومش دسمة :)
المقادير:
كيس مكرونة أقلام
نص كيلو طماطم...أنا بحط اكتر لأني بحب صلصتها كتير :)
بصلتين متوسطين
صدور فراخ...
جبنة موتزاريلا
بهارات وملح
الطريقة :
نقطع البصلة شرايح صغننه...ف الكيتشن ماشين او بالسكينه بس مش مفروم
نضيف عليها زيت او زبدة زي ماتحبوا...ونسيبها فيه شوية تصفر بس مش تحمر
نقطع صدور الدجاج مكعبات صغيرة...ونضيفها عليه
نكون ضاربين الطماطم ف الخلاط كويس ومصفيينها...ونضيفها على البصل والدجاج
ونضيف الملح والفلفل والبهارات ونسيبها تستوي لحد ماتتسبك ...
نكون طبعا احنا سلقنا المكرونة ف حلة تانيه
نضيفها للصلصة الي بقت جاهزة دلوقت ونقلبها كويس
ونقوم قالبينها في صينية ...ومساويين سطحها كدا...ونبشر عليها الجبنة الموزاريلا ونوزعها كويس
ندخلها الفرن شوية يادوب الجبنة تسيح وتحمر من فوق...لان المكونات كلها مستوية مش محتاج تسوية زيادة
نطلعها ونقطعها...وبالف هنا وشفا :)(f)
دوقوها ويارب تعجبكم
مستنية آرائكم وتطبيقاتكم...وتقييماكم :)
