موضوع مهم جدا لكل عروسة :)

السلام عليكم ورحمة الله
الموضوع الي بكتب عنه النهارده...قريته ودورت عليه على النت بس للاسف مالقيتش حاجه باللغة العربية تكون شارحاه بالتفصيل
وحسيت انه مهم لينا كلنا...

بتكلم عن التهاب المثانة اثناء شهر العسل
الشكوى دي متكررة جدا جدا...وللاسف بتسبب الام وحرقان..وبتعوق الاتصال الجنسي
وبكده...العلاقة دي بدال ماتكون فرصة للتعبير عن الحب...هتبقى فيها الام وتعب
وده بيتسبب ف التشنج...ومايتبعه من مشاكل
او حتى الضرر النفسي الي بتحسه الواحده...ويخليها بعد كدا دايما خايفه ومش مستمتعة

المرض بالانجليزي اسمه
Honeymoon Cystitis

زي ماحنا شايفين مكتوب انه ف شهر العسل
السبب ان في فترة شهر العسل العلاقة الجنسية بتكون كتيرة نوعا ومتكررة على فترات متقاربة وممكن تتكرر ف اليوم الواحد
فده بيزود فرصة الاصابة
ولو مثلا القناة التناسلية اصيبت بجروح او التهاب بسيط....تكرار الاحتكاك ده هيزود فرصة الاصابة وانتقال البكتيريا

انا دورت عن الاسباب ... والعلاج
والاهم...الوقاية...ازاي نتجنب التعرض لكدا اساسا
ونوفر على نفسنا التعب والمشقة...والضغط النفسي ف ايام المفترض تكون اسعد ايام حياتنا
نشوف مع بعض :)

الاسباب هنا هي زي ماقلنا
العلاقة الجنسية المتكررة او لمدة طويلة
والسبب هنا ان اثناء العلاقة دي ممكن تحصل خدوش خفيفه في جدار القناة التناسلية...تتنقل عن طريقها بكتيريا معروفة باسم اي كولاي...E coli... وتسبب العدوى دي
والبكتيريا دي بتعيش اساسا ف القناة الهضمية...وبالتالي بيسهل انتقالها للقناة التناسلية او البولية اكتر عن الناس الي بتمارس الجماع ف الدبر...عافانا الله واياكم
وبكدا نعرف حكمة ربنا في تحريم النوع ده...غير طبعا اضرار تانيه كتير بس دي جت كدا بالصدفة يعني :)
وممكن بردو بطريقة غير مقصودة
زي مثلا اصابع ملوثة ...
او التشطيف من الخلف للامام...فنجيب الباكتيريا من الخلف للامام
او العادة المنتشرة بالجلوس ف حمام مية...المية دي بتنقل البكتيريا من هنا لهنا

والاعراض اهي بعد الترجمه :)

الأعراض - ألم شديد أثناء التبول، يصحبه حرقة.
- الشعور برغبة ملحة متكررة في التبول.
- خروج البول بكميات قليلة.
- استيقاظ المصاب من النوم للرغبة في التبول.
- تغير لون البول إلى الوردي، أو يصحبه بعض الدم. - وجود الدم في البول أكثر شيوعاً مع التهاب المثانة.
- ألم في أسفل الظهر. - ارتفاع درجة الحرارة، والحمى، والإصابة بقشعريرة وغثيان وقيء (عند الإصابة بهذه الأعراض قد تكون حالة العدوى انتشرت إلى أعلى، أي إلى الكليتين).

بالنسبة للعلاج فهو سهل
الدكتور غالبا بيوصف نوع مضاد حيوي بيتاخد لفترة قصيرة غالبا يومين .. وبتتحسن الحالة
وخلال فترة العلاج بينصح بوقف العلاقه الجنسية
والتشطيف بمية دافيه...من غير صابون
وشرب المية بكميات كبيرة ...لان ده بيدر البول .. وبالتالي كانه بيغسل القناة


ادينا عرفنا الاسباب والعلاج
نشوف بقى ازاي نتجنب الموضوع ده اساسا
اول حاجه بينصح بصفه عامة بالاكثار من شرب المياة
حوالي 8 كاسات ف اليوم
وده بيجنب الجسم اضرار كتير مش بس دي...لان المية دي بتخرج من الجسم ومعاها السموم الي الجسم كونها

شرب عصير التوت البري مفيد جدا :) بس معرفش بيجيبوه منين

تجنب شرب القهوة

التبول قبل وبعد اللقاء الجنسي...عشان يطرد اي ميكروبات ممكن تكون جت عند القناة البولية اثناء العلاقة

يفضل استخدام مادة مزلقة...معلش مش عارفه اترجمها ايه بالظبط...الي هي lubricant
لمنع الاحتكاك اثناء العلاقة لو كانت كمية الافرازات غير كافية...عشان نتجنب الجروح والخدوش

وينصح بزيارة طبيبة النساء او المسالك بسرعة لو شعرت بأي مشكلة

وفي النهاية... الف مبروك لكل البنات ولكل العرايس...وعقبالي لما ابقى عروسة
انا حسيت ان الموضوع مهم...مش بس للعرايس...لكل الناس
عشان نحاول نوصل لعلاقة صحية..وممتعة..اسعد بيها نفسي وجوزي...وتقربنا لبعض اكتر

لو حد عنده اي استفسار انا ف الخدمة
ولو حد عجبه الموضوع :) يدعيلي مش لازم تقييم يعني