شلونكم بنات
اول موضوع لي في قسم الاطباق الرئيسيه
خلوني اشهيكم شوي .. يم يم :D
معكرونه بالبشاميل واللحم بالبطاطا
مقادير البطاطا:
6 بطاطس مسلوقه عدل
1 علبة قشطه
2 ملعقه جبن كرافت سائل
2 ملعقة مايونيز
نص ملعقة صغيره ملح
ربع ملعقة صغيره فلفل اسود حسب الرغبه
نخلط المقادير مع بعض فالخلاط يتجانس الخليط بيكون ثقيل شوي
ونخليه على جنب
مقادير البشاميل :
اللي تعرف تسوي البشاميل على طريقتها بيكون احسن واسهل لها .. واللي ماتعرف ..هذي طريقتي ::wink:
نص كوب طحين
ربع كوب زبده
3 ملاعق زيت
حليب بودره نذوبه في ماي ساخن تسوين تقريبا لتر وكثري من الحليب البودره عشان طعم الحليب
ملح وفلفل اسود
طريقتي بدون ماجي :)
نقلب الطحين مع الزبده لمدة 5 دقايق لين تذوب الزبده بعدين نحط عليه الحليب الساخن شوي شوي ونضربه بالمضرب او الشوبك بسرعه لين يتجانس الخليط.. ونخليه على جنب..
حشوة اللحم المفروم:
1 لحم مفروم
3 بصل مفروم
2 طماط مقطع صغار
ملعقة ملح
نص ملعقة بزار
نص ملعقة فلفل اسود
نص ملعقة ليمون اسود مطحون
ربع ملعقة كركم
4 ملاعق معجون طماط
نجيب جدر متوسط نحمر البصل مع شوية زيت لين يصير لونه ذهبي وتحملو تحرقونه عشان يروح ريحة الزفر اللي فاللحم ... نحط اللحم المفروم نحركه لين يستوي اللحم عدل ونحط عليه البهارات والطماط ومعجون الطماط ونحط عليه فنجان ماي ونسكر عليه بغطاء الجدر ونخفف على النار ونتركه يستوي لمدة 5 دقايق لين ينشف الماي بس وطفو النار ..
نحضر معكرونه مسلووقه
..الكل يعرف طريقة السلق طبعآ..
( والحين نجي نحط المكونات اللي سويناها قبل في بايركس)
الطبقة الاولى:
نحط المعكرونه فالبايركس ونضيف 5 ملاعق بشاميل ونحرك المعكرونه
الطبقه الثانيه
اللحم المفروم اللي سويناه نحطه على الطبقه الاولى (المعكرونه)
الطبقة الثالثه
نصب باقي خليط الباشميل على اللحم فالبايركس
الطبقة الرابعه
نجيب الملعقه اللي نغرف فيها الايس كريم
نكور البطاطس بالملعقة مالت الايسكريم ونصف الكور جنب بعض على الباشميل
الطبقة الاخيره:
وهي احلى شي
جبن مازرولا مبشور على الوجه وكثرو منه انا حطيت كيس ونص من الصغار
وندخلها الفرن على درجة حراره 175 أو 350 لمدة ربع ساعه من تحت و5 دقايق تقريبا من فوق
وهني وعافيه
شرايكم بنات
هاي الطبخه لعيون daisy ash
يلا ابي ردودكم الطيبه :cool:
