مشكلتي مع أمي

السلام عليكم

بصراحه وايد متضايقه وحالتي النفسيه التعبانه خلتني أكتب لكم

حابه افضفض يا خواتي وما اعرف اذا عندكم وقت تقرون مشكلتي ولا لآ

حبيباتي الوالده تغيرت وايد من اختي عرست قبل سنتين
وانا البنت الوحيده وعندي اخوان فالعين عليه انا

انا في جامعه مختلطه وهيه بنفسها قدمت اوراقي وشافتها وتعرفت عليها بدون ما انا اعرف ودخلت فيها والحمدالله اموري ماشيه

امي من النوع العصبي وكل يوم مريضه الله يعافيها مره الصداع النصفي ومره بطنها الله يعينها ويصبرها

بس حالات امي المتقلبه هيه اللي مأثره فيه

كل شي انا اسويه ما يعجبها وتنتقد من اكل لبس مكياج كل شي فيه

واذا حبيت أجاملها اقولها مشالله امي محلوه اليوم ولا شعرج حلو تقولي الله واكبر عليج يا حسوده

تخيلوا ما تباني اصادق بنات ويايه في الجامعه
وحتى تتكلم عنهم بشين وتقولي هاذيلا مش اوك ولا تكلمينهم
وانا احط مكياج شي مقبول للجامعه يعني الوان طبيعه مش فاقعه يعني بالمعقول تقولي ماله داعي تتمكيجين انتي في جامعه فيها اولاد وما ادري ايش
قلتلها ما عليه امي مافي مشكله
قمت احط مسكارا وفاونديشن لان ويهي فيه حبوب وبصراحه البنات يعايورني اذا طلعتلي حبه ولا شي
تصدقون انه مش عاجبها تقول الفاونديشن وايد مبيضني وهيه بنفسا شارتنه لي عسب استخدمه وانا صارلي فوق 5 شهور ما غيرته

انزين صرت الحينه قبل لا ارد البيت امسح المكياج صارت امي اتدقق بويهي انتي كنتي حاطه مكياج ومسحتيه قلتلها لا اخاف تعصب ويرتفع الضغط عندها

غير هذا صارلي من كم سنه البس نفس الاستايل يعني اذا لبست بنطلون البس عباه اسلاميه اللي تكون مسكره عالجنب او مسكره وابدا ما البس عباه مفتوحه وتحته بنطلون الا اذا كان القميص الين الركب
من يومين كنت لابس عباه اسلاميه وتحتها بنطلون عصبت عليه ليش لابسه جذي وما ادري ايش قلتها ماما عادي عباه اسلاميه تقوللي لا وتسير تخبر ابويه وتحتشر

الحين بصراحه ما ادري ليش كل هذا تسويه فيه
حاولت اكلمها بس تقول وجهة نظرها واذا حبيت اتكلم واقول رايي تقول انه لساني طويل وما استحي اني ارد عليها

والله فالجامعه تراقبني في البيت تراقبني مب عارفه شو اسوي
انا الحمدالله بنت محترمه وكل حد يتمنا بناته مثلي
وانا من الجامعه للبيت وللبيت للجامعه
تخيلو يا بنات مفتاح غرفه ما عندي حتى اذا كنت اتلبس اخواني يدخلون عليه ومليون مره اقولهم دقوا الباب وينسون
بس من اسبوع اشترولي سلسله تنحط عالباب بعنب الباب يفتح بشوي الحمدالله احسن بس اقفله اذاكنت ابدل


ماعندي صديقات افضفض لهن واختي مشغوله عني ببيتها وزوجها وعيالها
وحتى اني ما اقدر اغير جو قبل لا اختي تعرس كنا نطلع انا واختي والوالده السينما كل خميس ونستانس والحينه ابدا ما اطلع
لانه حتى في الطلعه مخنووووقه ابدا ما أطلع مع امي حتى لو حبيت اطلع معاها السوق ما تباني اروح معاها وهيه عندها صديقتها تطلع معاها وتزورها وانا في البيت محبوسه
اخواني الصغار اذا طلعت معاهم الصراحه ما ارتاح ادخل واتسوق عراحتي وهم يتمللون واذا قلتهم روحوا وتعالو بعد خمس دقايق ابوي يعصب اويفهم الموضوع غلط
بصراحه مش عارفه شو اسوي
بس هالضغط لين متى بعيشه


والله انه ساعات اصيح واتمنى اطلع من البيت واستغفر ربي

والحينه صرت في عالم الخيال اتمنى اني اتزوج واخلص من هالضيق اللي فيه

اقول للبنات اللي معايه في الجامعه ان شاء الله اعرس يقولولي شو تبينه العرس ويع راس وغربال وتحكم الا ماله نهايه

اذا انا مب مرتاحه في البيت شو اسوي

بنات حاولت اتقرب من امي ما في فايده

حتى اني كنت معاها العام في سفراتها للعلاج وتحملت معاملتها وتحكمها واوامرها غصبا عني لانها امي وحاولت اتقرب معاها ماشفت شي منها ولا تذكرت اني وقفت معاها
والحينه ماتبى تاخذني معاها في السفر فضلت اخوي الصغير عليه انا

حتى ما خبرتني ولا قالتلي في موضوع سفرها

قلت ما عليه ايلس في البيت ارحم لي اخذ اجازه منها
ويمكن ارتاح شوي اقدر اتنفس

بنات فيدوني والله الدموع في عيوني والعبره والضيقه ذابحتني


ما اعرف شو اسوي


والسموحه
واشكر كل من يقرا الموضوع