الكل يحب البان كيك على الفطور... عن نفسي البان كيك شي أساسي في فطوري... و كنت دايماً استخدم الكراتين الجاهزة... و حاولت أجرب أسويه في البيت و كل مرة تطلع الطريقة فاشلة...
لكن هالمرة غير، و السبب إني لقيت الطريقة الممتازة و اللي ما أتوقع أحد يجربها و ما تعجبه... و الفضل يرجع ل Nigella Lawson... بالصدفة حطيت على برنامجها و شفت طريقتها و جربتها على طووول...
أحلى شي في طريقتها إنكم تسوون خيط المواد الجافة و تحتفظون فيها في علبة، و كل ما جا على بالكم تسوون بان كيك، خذوا مقدار من هذا الخليط و حطوا عليه بس زبدة و بيض و حليب!!!
و نبدأ بسم الله مع الطريقة و المقادير...
للمواد الجافة بنحتاج:
3 أكواب طحين
ربع كوب سكر
3 ملاعق كبيرة بيكنج باودر
2 ملعقة صغيرة بيكنج صودا (بيكربونات الصوديوم)
ملعقة صغيرة ملح
نخلط هذي المقادير مع بعض و نحطها في علبة ضاغطة للهوا، و نحتفظ فيها في الفريزر و نطلعها وقت الاستخدام...
الحين نجي للبان كيك نفسه... انتبهوا معاي...
أول شي جيبوا مقلاة تيفال (أو أي مقلاة غير قابلة للإلتصاق) و حموها على نار أقل من الوسط، في الوقت اللي تجهزون فيه الخلطة...
لكل كوب من المواد الجافة (المقدار يكفي 2-3 أشخاص)، بنحتاج:
كوب حليب
بيضة
ملعقة كبيرة زبدة ذايبة
و للنكهة ممكن تحطون فانيلا أو بشر برتقال
نخلط هذي المقادير مع بعض بالمضرب السلك لحد ما تندمج المقادير مع بعض، بس لا تكثرون خلط!!!
يعني بس تختفي كتل المواد الجافة وقفوا خلط على طول... و انتوا بتلاحظون إن الخليط بدا ينفش معاكم...
الحين بتكون المقلاة حامية، و نبدا نصب البان كيك بملعقة كبيرة، و بيكون حجم الأقراص بحجم راحة اليد... و إذا استخدمتوا الملعقة الصغيرة بيكون شكلهم حلو للأطفال، أنا ولدي يحبهم صغار و يقولهم (يا حليله دادا) J
الحين نعد 1 2 3 4....10 و نقلبهم، ما ياخذون وقت... بسرعة يحمرون و ينتفشون و تطلع لكم فقاقيع عالوجه... و لاااازم ما تخلونهم ينشفون مثل القطايف!!! يعني بس تشوفون الفقاقيع و الوجه للحين سائل اقلبوهم...
هنا دخلت في المقلى علشانكم J شوفوا شلون نافشة...
حطوا أقراص البان كيك في حافظة طعام أو صينية الكيك و غطوهم لين وقت الأكل...
أنا هنا قدمتهم مع مربى التوت... صنع البيت و بحط لكم الطريقة تحت...
و هنا مع النوتيللا... و يا سلاااام على الطعم... أحسن بكثير من الميبل سيرب...
و هنا صورة للبان كيك من داخل... شوفوا شلون مبين خفيف و هش مثل الكيك :)
و للتغير، تقدرون تخلطون معاه دمعات الكاكاو chocolate chips... أو أول ما تصبونه في المقلى، حطوا عليه شرايح موز أو فراولة بعدين اقلبوه... يطلع طعمه خطير... خصوصاً الحجم الصغير، كل قرص أحط عليه شريحة موز أو فراولة :)
هذي طبعاً بس أفكار و انتوا و ذوقكم...
أما بالنسبة لمربى التوت... طبعاً هذا سويته أيام الشتا على موسم التوت، لكن ما فضيت أنزله...
بنحتاج (هذا المقدار يكفي يعبي برطمان من الحجم الصغير):
3 أكواب توت
نصف كوب ماء
كوب سكر
عصير نصف ليمونة صغيرة
و في بادية صغيرة نخلط:
ربع كوب ماء
ملعقة كبيرة نشا
الحين في قدر كبير، نخلط التوت و الماء و السكر و عصير الليمون، و نرفعهم على النار و أول ما يبدا يغلي، نخفف الحرارة إلى أقل من النص و نخليه يغلي بهدوء لمدة 10 دقايق...
بعدين نجيب مصفى و نصفي التوت اللي غليناه، و نضغط عليه علشان نطلع العصير منه...
ناخذ العصير اللي صفيناه و نرجعه للقدر و نخليه يغلي على حرارة عالية لحد ما يتبخر نصفه تقريباً، أو تشوفونه صار قوامه ثقيل مثل الشيرة... بعدين نرجع التوت للقدر مع مقدار النشا المذوب في الماء و نحرك بسرعة على نار عالية لمدة دقيقتين... بتلاحظون إنه مسك معاكم و قوامه صار ثقيل... طفوا عنه النار و جيبوا الآلة اللي تهرس البطاطس و اهرسوه على خفيف، أنا أحب أخلي فيه شوية قطع كاملة J
نغطيه و نخليه يبرد تماماً قبل ما نعبيه في البرطمان، و ما ننسى نعقم البرطمان أول!
إن شاء الله عجبتكم أطباقي و عليكم بألف عافية (f)
