زوجي أمس ضربني

أبداً مو من الرجولة ..,

إن الرجل يمد يده على حرمة

هذا عيب ونقص فيه!..

*

وحطي في بالج إن إلي يمد يده مرة .. بيمدها آلف مرة!

فما بالج الجرآة في ضربج قدام الخادمة والأولاد ؟!..

*

وسكوتج عنه ضعف لج وقوة له

إنه في كل مرة , يضربج , ويضربج , ويشتم بعد

ويمكن في المستقبل يسبب لج عاهة لا سمح الله

*

لا تسكتين عن حقج

وأحنا بزمن 2009

مب في زمن الجاهلية , علشان يجي ويضرب - يعل يده الكسر -

*

لا تروحين للشرطة ..,

إحتراماً للعشرة إلي بينكم و إحتراماً لأولادكم

وأنا أبد ما أؤيد وصول الخلافات الزوجية والمشاكل العائلية للشرطة

هذي خصوصيات وتنحل بين الأهل

ودخولج للمخفر علشان تشتكين عليه

بيخلق بينكم حاجز كبير لا يمكن ينهدم

*

كلمي أهلج وأهله!..

إنتي بنت ناس وعزيزة نفس

مب ماخذج من الشارع

شنو يضربج قدام الخادمة وقدام الأطفال

ترى مردهم بيكبرون

وبيفهمون

شنو بيكون موقفج لا صار أولادج كبار ويشوفون أمهم تنضرب وهي ساكتة عن حقها ؟!

وخادمتج شلون بتقدم لج الإحترام وإنتي مالج إحترام من زوجج

*

تكلمي حق أهلج , وخل يكلمون أهله

قولي مدها مرة وسكت عنه

بس كونه يمدها مرة ثانية .. لا وآلف لا

لا تقبلين على نفسج الذل والإهانة أبداً .. أبداً

مهما كان يعني

*

وإذا ما تاب ولا جاز

رديها له وحدة بوحدة

يعني قبل لا يمد يده .. مدي يدج و جودي له يده

منعيه من ضربج

*

حبيبتي لا تستخفين بالموضوع!..

ترى مو لعبة يهال

أنتوا كبار ومتزوجين وبينكم أطفال وعشرة

ضربه لج مرة وحدة فقط

هذي باب لأنه يضربج مرات , ومرات .. لين لا سمح الله يضرج أو يآذيج

*

تخيلي نفسج تعيشين معاه على وجل ؟!.

كل مرة تختلفون تتمين خايفة لا يجي يمد يده

كل مرة يكون معصب تتحاشينه خوفاً من مدة اليد

كل مرة تبين شي وما يرضى وتتناقشوا .. مدة يد

*

شنو هالحياة ؟!.

ترى الحياة الزوجية أكبر من جذي بوايد

*

كلمي أهلج بشكل مستعجل .. و خل يكلمون أهله

و يوقفونه عند حده

*

وإنتي لازم تتغيرين عليه

لا تبين له إنج راضية ومرتاحة .. حسسيه بالقهر والغضب إلي بداخلج

خله يحس بالندم .. وتآنيب الضمير

علشان ما يكررها مرة ثانية

ذكريه بربه وعقابه وحسابه .. خل يتقي الله فيج

*

والله يهديه إن شاء الله