وامس سويتها لأني مرتبه حق حفله صغنونه بكره يستانسون فيها اليهال ..بمناسبة انتهاء المدرسه ويوم ميلاد بنتي فطومه ..
بس قبل كل شي بغيت انبهكم
لاتسوون هالحلاوه بوجود اطفالكم فالمطبخ لأنها ساااااااااخنه تغلي وخطر يكونون اليها معاكم
الكميه تكفي ل12 مصاص حجم وسط الى كبير
المقادير:
كوبين سكر
ثلثين كوب شراب الذره (اختاري الشفاف لأن في انواع ..انا ماكان عندي حطيت من شراب السكر كأنه شيره لقيته في سوبرماركت يبيع المستورد من الخارج مثل شوب رايت)
ربع كوب ماي
الوان ونكهات
اعواد
الطريقه :
افرشي قصدير على سطح المطبخ ..على الرخامه مثلا..
وادهنيها بالزيت وصفي الاعواد الخاصه بالمصاص..
حطي السكر مع الشراب والماي في قدر صغير وخليه يطبخ على نار وسط تقريبا 10 دقايق مع التحريك المستمر
اذا تبين تعرفين ان جاهز للصب جيبي كوب ماي بارد فيه ثلج وصبي شوويه من السائل في الماي اذا شفتيه جمد وتيبس أول مايلامس الماي البارد يعني صار جاهز..اما اذا شفتي ملمسه طري وينزل لقاع الكوب ويذوب فالماي يعني مااستوا انطري عليه 5 دقايق بعد
وبحركه سريعه صبيه في اواني صغيره وحطي لكل اناء نقطة لون ونكهه واخلطيه بعود اسنان
(انا حطيت الاحمر فراوله ..والبنفسجي توت ..والاصفر منجا ..والاخضر بدون نكهه)
صبي كل لون على عود المصاص اللي بيكون عالقصدير ..شكلي من كل الالوان
(القدر خليه على الفرن والفرن بيكون مسكر ودافي وكل ما خلصتي من الكميه اللي في الاواني او الملال حطي زياده ولاتنسين النكهه)
انتظري 5 دقايق علشان يبرد
فكي القصدير من المصاص وقدميه للأطفال