semsema005;9702219:
ماشيمارو ياقمر ماشاء الله عليكي وعلي حاجتك تتهني بيهم يارب
تقرير مقفصل رائع بس انا كنت عايزه اسالك بالنسبه للستاير القماش نوعيته بتختلف من حجره لحجره يعني لازم نوع معين لاوضه النوم ونوع للريسيبشن وكده ولا زي مااحب وعلي مزاجي . وعايزه اعرف منك رينجات اسعار الانواع وايه اغلاهم وايه ارخصهم وايه اشيكهم والاهم اشيكهم :D وياريت لو صوره للستاير بتاعتك تبقي عملتي فيا معروف لاني معرفش حاجه في الستاير خالص وخايف لما اروح اشتري ماعرفش واجيب حاجه اي كلام .
انا عندي الريسيبشن بتاعي فيه بالكونه وشباكين . واحد ناحية الانتريه والتاني ناحية السفره دول لازم اعملهم نفس النوع واللون من الستاير ولا مش شرط ممكن اعملهم مختلفين؟ ولازم برده يكونوا قريبين من لون الستاير بتاعة البلكونه ؟
معلش ياقمر اسئلتي كتير ربنا يجازيكي كل خير
سورى يا سمسم فعلا مش اخدت بالى او اكون مش كملت قرايه
بصى يا جميل
الستاير فيها انواع كتيره انا معرفهاش كلها طبعا
بس انا كل اللى جبته ايه؟
جبت قماش اللى هوا خفيف كان شيفون
وجبت قماش اورجانزا وكان فيه رسمه بسيطه ومقلم عريض فى نفسه يعنى مجرد بس القماش الفتله بتاعتها هيا اللى عامله تقليمه خفيفه وتقيله وده كان اغلى نوع كان ب 75
وجبت قطن اللى هوا برنت شوب وفى ماركه تانيه بس مش عارفاها وده اسم المصنع ولما تروحى الوكاله قوليلهم عايزه قماش قطن برنت شوب حيقولك اهو بس شوفى مكتوب عليه من الجنب برنت شوب ولا لا
وجبت تقريبا بتاعت الصالون يمكن تكون تفتاه او اورجانزا بس اعتقد انها تفتاه وكانت ساده خاللللص كانت ب 18 المتر
والخفيف كان بين 20 و 30 و30 ده اغلى قماش بجد شوفته ساعتها وحتى لما بشوف الاسعار البنات اللى بتكتبها بس هوا عموما محل اللى جبت منه الاورجانزا ده عنده حاجات مش عند حد وفعلا حاجته حلوه واغلى من الباقى ومع الاسم مش فاكره اسم المحل :( بس بيشتغل فيه واحد اسمه اشرف لو عايزه اسم المحل قوليلى وانا ادعبسلك على الورق بتاعهم كل الورق لسه شايلاه
بصى الاشيك بقى ده حسب الاذواق وممكن اوى تلاقى فى كل خامه حاجه شيك غير التانيه
الفكره مش فى الخامه بس الفكره انك تلاقى اللى يناسب عنده وتكون الخامه تمشى مع الاوضه وتبقى شكلها حلو هوا ده الشياكه فى نظرى
علشان ممكن الاقى قماشه شيك بس نوعيتها متناسبننيش
يعنى مثلا ممكن الاقى اورجانزا وانا محتاجه قطن .. فاهمانى ؟ ده اللى اقصده
وعموما كل اوضه انتى حاولى تحطى تصور للشكل ... وخلى بالك من موضوع الشكل علشان فى قماش مبينفعش فى بعض الموديلات وده اللى سمعته من البياعين ومعرفش اذا كان صح ولا غلط
بصى موضوع البلكونه والشباكين
فى رايى انا ولو عندى حعمل اللى حقولهولك ده
الاولوان تبقى متناسقققه فقططط ومش مهم لا الشكل ولا النوع يبقو زى بعض
يعنى فى الانتريه عايزه تعملى قطن اعملى بس اللون يكون لايق على السفره مثلا تعملى فيها شيفون كده فاهمانى
رايى اللون وموديل الستاره مش حيفرق كتير خالص بس خلي كله يبقى لايق على بعضه وبس
يعنى مش واحده تعمليها براقع وتكون براقع تقيله وكتيره وكده والتانيه تعمليها سمبل خالص نازله كده بس
يعنى خليها وسط
يبقو لايقين على بعض وخلاص ومعلش معرفتش افهم هيا البلكونه فى انهى ناحيه ولو عرفتى تعمليلى كده رسم كروكى لمكان كل شباك وبلكونه ولو فاصل ما بينهم ارش مثلا او كده ابقى فهمت اكتر واقولك برده نفس الكلام ولا رايى ممكن يكون مختلف
وبجد سورى فعلا على التاخير بس فعلا مش شوفت غير لما بعتيلى (f)
ايه رايكم لو عجبتكم حنزل حاجات تانيه 
