ساعدوني احترت بين اهلي وقلبي

السلام عليكم 00

انا اول مرة اشارك في هذا المنتدى بس من الضيم اللي فيني والقهر ماعدت قادرة اتحمل 00 ساعدوني وحاولوا تفهموني قبلها00


انا سعودية الجنسية بس من اصل خليجي غير السعودي وامي سعودية الأصل00 اهل ابوي كلهم يعيشون بالبلدة الخليجية الثانية 00 وابوي بس اللي كان عايش بالسعودية 00 توفى وبقينا مع امي وكبرنا وتوظفنا وطلعنا من احسن الناس بوظايفنا ومستوانا الإجتماعي00

مشكلتي بدأت مع امي من صغري وهي ماعمرها بيوم مدحتني او ذكرتني بخير قدام احد لا بشخصيتي و لا شكلي ( رغم ان الكل يتكلم عن جمالي رغم اني سمراء فاتحة) والكل يمدح في اخلاقي ومحبوبة من الكل بالعائلة وبرة العائلة بعد00 الا امي مو شايفة فيني اي شئ عدل دايم تتصيد اخطائي واللي انا ما سويته رغم اني احن وحدة عليها 00

ارتب وانظف البيت قبلها عشان اريحها 00 ولا عمرها مدحت او اشكرت فيني بالعكس الا تروح تدور اللي ماسويتة وتسب وتلعن00 اطبخ وانا فنانة بالطبخ بشهادة الجميع وهو من هواياتي لكن لما تأكل ويعجبها ما اسمع لها صوت ولو يزيد الملح شوية طلع صوتها ( اوووو ف شالأكل هذا كله ملح) تحملت سنين لحد ما و
صلت حدي وصرت ما احرك شئ بالبيت لو اشوفها بتطيح من الشغل الا اذا طلعت برة البيت اخذ راحتي بالشغل 00 وصار اخر همي اني اساعدها او ارضيها00


انا انيقة بطبعي واحب البس ويهمني مظهري دايم واتأخر شوي عشان اجهز 00 كرهتني بالتعدل واللبس والكشخة وافقدتني ثقتي بنفسي لحد ماصرت انطوائية لا اروح ولا اجي 00 والسبب كلمتها كل ماتشوفني اتعدل 0-( خلصينا عاد الزين زين لو قعد من النوم والشين شين لو غسل عيونه) و بكم مرة تقولي (هذا لا قالوا اذا تبي تجنن القرد عطه منظرة ) رغم اني والله جذابه جدا بس من كثر ما تقولها لي صدقتها وتدمرت ثقتي بنفسي وكرهتها اكثر لما تقارن بيني وبين بنات صديقاتها انهم احسن منا وسألتها مرة لما انتقدتني قلتلها اذا بتنتقدين مدحي لو شفتي الزين وذمي لو شفتي الشين والا لاتكسرين اللي باقي فيني 00ماترد علي00 قلتلها والا مو شايفة فينا شئ ينمدح 00 قالت لأ -- قلت لها ولا شئ صغير عالأقل قالت لأ 00 ( هذا الموقف تكرر 4 مرات ) وشلته بخاطري

وبيوم تخرجي من الجامعة جيت فرحانة بالشهادة وكنت اول مرة اجيب جيد جدا دايم امتياز بس بسبب ظروف مريت فيها نزل مستواي فشافتها وقالت هذا اللي قدرتي علية جيد جدا ياللة عموما بروك ولا فكرت تحضني حتى00 وكان الجدار اللي بيني وبينها وماقدرنا نكسره للحين الا كل يوم تزيده00

والحين عمري 27 سنه مافي اي علاقة بيني وبين امي الا رسميات وموظفة براتب عالي 00 ماتقدموا لي الا ناس رواتبهم ضعيفة ومستحيل اهلي يوافقون عليهم 00 او متزوجين انا مستحيل اوافق عليهم 00


تقدم لي ولد عمي الخليجي اللي كلهم يشهدون له بالأخلاق والطيب والكرم والدين وراتبة متوسط وبيأخذني معاه هناك 00 وطبعا احنا على علاقة حب قبلها 4 سنوات نظيفةو جدا الى ما يجهز نفسة 00 وفعلا تقدم00


المشكله امي رافضة بقوة انه يأخذني بعيد 00 رغم حبها لشخصيته تقول بأضيع مستقبلي ووظيفتي 00 وماتبي ابعد عنها00

وانا احبة بجنون وهو بعد يموت فيني 00 حاولت اقنع امي لكن قالت لي لو خذتية 00 انسي ان لك ام وانا بأنسى ان لي بنت 00


طبعا ذكرتها بأنها دايم ما كنت عاجبتها وما فيني شئ عاجبها اجل ليه تبيني عندها وهي اللي دايم تقول مالت على اللي بيأخذك 00 ووظيفتي بشهادتي بالراحة اقدر اشتغل بأي مكان ومتأكدة00
الشئ الوحيد اللي عاز على قلبي اني بأعيش من دون اخواني وخواتي 00 الي هم كلهم رافضين عشان اني بأبعد عنهم بس 00 والا هم يحبونه 00 وما يطرونه الا بكل خير وواحد من اخواني اللي هو اعز اصدقائة يقول انا متأكد انة بيسعدك بس المشكلة بتروحين بعيد00


الحين مرت 5 اسابيع ومحد رد عليهم ومحد راضي يتكلم بالموضوع معاي 00 وانا نفسيتي معاه تعبت 00 اختفت ضحكتي وخفة دمي وصرت ا اطلع ولا اكل مثل اول 00 ما اتخيل نفسي من دونه 00 وهو بعد يقول مستحيل اتخيلا اهلك يفرقونا00 وكل هذا عشان هالوظيفة النحس علي وان راتبي قوي 00 مع العلم ان بإمكاني اتزوجة واتوظف هناك بأقل من راتبي 00 بس عالأقل بأكون سعيدة اني مع حبي وماخسرت وظيفتي 00


ساعدوني شأسوي 00 ادري طولت عليكم بس والله مالي غيركم الجأ له 00