++ قصة حملي الثاني .. دعواتكن يالغاليات ++

السلام عليكم ورحمة الله وبركاته


اشحالكن خواتي الغاليات؟؟

اتولهت عليكن وااااايد

ورجعت لكن بعد هالغيبة والانشغال عشان أخبركن بقصة حملي الثاني


الحمدلله على كل حال


في البداية

للخوات اللي ايحبن ايعرفن قصة حملي الأول


اتفضلن هالرابط

http://www.3roos.com/forums/t265086.html

وهالرابط فيه قصة ولادتي بغاليتي ميثاء

http://www.3roos.com/forums/t322483.html


المهم يالغاليات

أنا عقب الولادة .. حرصت على أني أمنع الحمل (طبيعي) لعدة أسباب


1- عشان أهتم ببنوتتي فديتها وأهتم بأبوها الله يحفظه ويديمه لي
2- لأني كنت أرضع ميثاء رضاعة طبيعية وقت تواجدي وياها (تشرب حليب صناعي خلال فترة غيابي أو انشغالي في الوظيفة)
3- لأني اتوظفت وميثاء صغيرة (6 شهور)


فقلت خلاص كل هالأمور تحتاج تركيز واهتمام دايم


وبسبب الرضاعة الطبيعية .. فال... كانت على طول متخربطة عندي

لكن في شهر ديسمبر ويناير .. انتظمت وكانت على الموعد

يعني آخر مرة .. كانت بتاريخ 22 – يناير – 2009


في شهر فبراير

قمت أحس بآلام فظيعة في البطن وتقلصات تشبه آلام ال ... .. لكن بصورة أكير

وغديت أحس بدوخة بين فترة وفترة

وأنا من صغري أعاني من الأنيميا ونقص الحديد

لكن الحمدلله .. في آخر فترة من حملي الأول .. وصل الحديد لمستواه الطبيعي في جسمي

استغربت من هالآلام ومن هالدوخة

وعلى طول سرت وحجزت عند دكتورة نسائية في مستشفى خاص

سوت لي سونار داخلي

وقالت لي ال ... متأخرة عنج

لو اتأخرت 6 أيام إضافية .. تعالي بننزلها لج

لكن غير عن هالشي .. فالمبايض الحمدلله سليمة وكل شي في جسمج الحمدلله بخير

وسويت تحليل دم .. والحمدلله ما عندي أنيميا

اتأخرت ال ... أكثر .. لكن أنا ما سرت للمستشفى ولا سألت عن الموضوع

في شهر 3 – 2009

وقبل الاحتفال بعيد ميلاد بنوتتي بيوم

يعني في يوم 14 – 3 – 2009

سرنا أنا وريلي نتشرى فستان لشمعة حياتي ونور عيوني .. ميثاء

ودخلنا أكثر عن 6 مراكز تقريباً

وانتن تعرفن ما شاء الله مراكز دبي .. كبيرة وتحتاج مشي

وأنا ما شاء الله علي .. لابسة كعب .. وتعبانة .. وأحس بدوخة كل شوي

لكن أقول ما عليه .. لازم اليوم أخلص كل شي باقي لحفلة بنوتتي



وأخيراً .. حصلت لبتوتتي فستان غاوي

لكن للأسف .. كان المقاس المتوفر كبير عليها

فاتصلوا من المحل لفرعهم في مركز ثاني

والحمدلله كان المقاس متوفر

وبما أنه الوقت صار ليل .. اتلاحقنا أنا وريلي وسرنا عشان ناخذ الفستان

أول ما دخلنا المركز

طلبت من ريلي نسير الصيدلية عشان آخذ جهاز تحليل الحمل

فضحك علي .. لأنه صار لي كم يوم وأنا أطلب الجهاز

فهو عرف أني متوترة

وقال لي أنا بييبه لج عشان نفسيتج ترتاح


وصلت البيت تعباااانة ومنهد حيلي

أبو الشباب طلب مني أسوي الفحص

وأنا قلت له خلني أرتب كل شي وأنظم أموري وعقب خير

بس من دخلت الحجرة .. ركض على الفحص

قريت التعليمات .. ومن بين التعليمات .. أنها النتيجة تظهر عقب 10 دقايق

لكن أنا ما شاء الله ..على طول طلعت النتيجة .. خطين

ما عرفت شو أسوي

تميت أزقر ريلي

وعقب قلت له أنا حامل

ابتسم وهم يتحرا الموضوع مقلب

وأنا من شفت تعابير ويهه (كأنه يعتبر الموضوع مزحة) .. على طول راويته التحليل

وهو من الفرحة .. على طول اتصل بأمه ويدوته يبشرهن



أكيد بعضكن يستصعب الحمل والبيبي بعده صغير

يعني ما شاء الله بنتي كان عمرها 10 شهور يوم أنا حملت

لكن أنا أقول الحمدلله يا رب

كل هدية من رب العالمين ما تساوي أموال الدنيا كلها



حبيت أشارككن بقصتي شرات ما اتعودت دوم

وأطلب منكن الدعوة الطيبة

أنه ربي يحفظ لي ريلي وبنتي الغالية ويتمم لي حملي على خير ويرزقني الذرية الصالحة كاملة الخلق والخلقة من غير زيادة ولا نقصان

آاااامين يا رب العالمين