رييفة;9087271:
تسلمين حبوبة عهذا الموضوع....طيب انا بعطيكم فكرة عن أعراسنا عسريع...
طبعا انا عمانية.....ومن صلالة بالتحديد...وبقولكم عن بعض عادات صلالة
نبدا بالخطبة: عادة أول شي يجون الحريم و بعدها الرجال لما يكون رسمية و لما تعلن الخطبة و يحدد المهر فيوم يسمى "الثبوت"
فترة الخطوبة: حسب العيلة....أغلبية العوائل خاصة لو كان المعرس مش من العيلة ما يشوفها فزياراته لحد وقت الزفاف...بس لو كان من اهل عادي....
الملكة أو العقد: يكون عادة قبل العرس بيوم...وله نكهة خاصة فصلالة خاصة للرجال...لأن العقد يكون فأي مسجد يختاروه أهل المعرس و عادة يكون قريب من بيت أهل المعرس...لأن العقد أو الملكة تكون بعد صلالة العصر (على عكس باقي مناطق السلطنة يكون العقد بعد صلاة العشا)...وبيكون فالمسجد جميع الاهل و الاقارب و المعراف يشهدون عقد القران ...
بعد العقد...يتجمعو المعازيم الي حضرو العقد كللللللللهههههههههههم مثل الفوج ويمشون فطريق برع من المسجد الى بيت المعرس برقصات شعبية مثل "البرعة" و "الشرح" و يكون فمقدمة الفوج المعرس كاشخ بالبشت و الخنجر العماني الأصيل...لحد ما يوصلو بيت المعرس و تستمر الرقصات الشعبية...والعادة يكونون الرجال أمام منزل أهل المعرس فخيمة مثلا...
اما الحريم...فلما يوصلو الرجال من المسجد (بعد العقد أو الملكة) يطلون الحريم الي يكونو متجمعات فبيت أهل المعرس من الدرايش او الشبابيك متغطيات ببراقع او غشوات ما تبان وجوهم ويبدون "يبلبلون" عندها بالمحلي يعني "يزغردون" او "يببون" إستقبالا للمعرس الجديد....
ولما يجي الليل,,,يشغلون الحريم أغاني "الطبل" وهي الرقصة التقليدية لنساء محافظة ظفار بشكل عام...ويكون فيها بالعادة كل ثنتين (مثلا كل وحدة مع بنتها او مع أمها او أي وحدة من قريباتها بنفس طولها تقربا) يقومون "يلعبون الطبل" بالمحلي ما نقول "نرقص طبل" الصحيح هو "نلعب طبل"...ووقت العشا تكون في ذبايح قبولي أو كبسة او اي شي...للرجال فالخارج و النساء فالبيت...وللعلم...من العادات إنه المعرس ما يشوف العروس يوم العقد أو الملكة..لأن العرس ثاني يوم...ومحد يشوف العروس هاليوم تكون بيت أهلها...والعادة انه ماكثير من من الرجال من طرف العروس يحضرو العقد أو الملكة فالمسجد...فقط أقاربها من الدرجة الاولى
الحنا: ما في بالعادة فصلالة حفل خاص بالحنا...فقط تتحنى تروح الصالون او عند الحناية او تطلب من الحناية تجي البيت (بس باقي المناطق فعمان يسوون حفلة الحنا)
العرس: طبعا يكون العرس فالقاعة او بالبيت...بس الاغلبية بالبيت
وينقسم الحضور الى قسمين , قسمن من طرف العروس من اقاربها و معرافها و يكونو فبيت اهل العروس (بس ام العروس بالعادة ما تعزم كثير لو كان عرس بنتها بحكم العادات..اما لو كان عرس ولدها تعزم كثير ناس), اما القسم الثاني يكونو فبيت أهل المعرس. وفكلا البيتين يكون في "لعب الطبل" بالاضافة الى اي رقصات ثانية من خليجي و شرقي...الخ.العروس بعد ما تخلص من الصالون ترجه بيت أهلها و محد يشوفها يخبونها من المعازيم وتجلس فاي غرفة.ولما يجي وقت "التحويل" (الي هي زفة العروس من بيت اهلها الى بيت اهل زوجها) كل المعازيم فبيت اهل العروس من الحريم يمرون عليهم رجالهم وينتظرو فالسيارات لحد ما تنزل العروس و تكون مغطينها بقماس ما يبين فيها شي..وتكون سيارة العروس فالمقدمة(وعادة الي "يحول" العروس او يزفها لبيت زوجها يكون اخوها او خالها او عمها او اي احد من المحارم ما عدا ابوها)....وتبدا السيارات فهرنات للاشهار انه هذا "تحويل عروس"...وتكون السيارات ورا بعض بشكل موكب
لما توصل العروس بيت اهل المعرس و معاها المعازيم من طرفها...تنزل العروس و الحريم مغطينها بقماش نفس اول ويستقبلوهم اهل المعرس من الحريم بالترحيب...ويدلوهم على غرفة او جناح المعاريس...وتدخل مع العروس فقط امها وخواتها و اقاربها المقربين....
ويجهزون العروس و يبخرونها..وتكون لابسة الثوب الظفاري التقليدي او فستان ابيض...
بعدا يجي وقت "التخويد" وهذا معناته انه المعازيم يدخلو غرفة العروس و يشوفون العروس و هي جالسة بكشختها....بعدها يدخل المعرس و ينتهي العرس
"المصابحة" أو "ذبيحة الخالة": وعادة تكون ثاني يوم بعد العشا و هي عبارة عن حفل عشا تكون فيها ذبايح ومأدبة عشا من المعرس على شرف خالته (حماته أو ام عروسه)...واهل المعرس يحددون لو يبغون الحفلة بسيطة او حفل كبير نفس يوم العرس على حسب...بس فكل الأحوال...الحريم من المعازيم يصابحون العروس بمبالغ نقدية...وأيضا فبعض الاحيان تهدى العروس ذهب من اهل زوجها...وتكون العروس لابسة الثوب التقليدي الظفاري و يجلسونها فالصالة او فالمجلس.....والعشا نفس طريقة العرس...الحريم داخل البيت و الرجال فالخارج او في خيمة فالخارج امام البيت...ويصحبها بعد رقص مثل العرس...وأيضا معازيم الرجال يصابحون المعرس بمبالغ نقدية وتكتب اسامي الاشخاص و المبالغ فدفتر ونفس الشي للحريم (عشان لما يجي عرس عيالهم يدفعون مبلغ مشابهة) و هذي عادة جميلة فيها مساندة للمعرس و اهله
ملاحظة: مرات يوم الزفاف او يوم المصابحة لما يدخلون المعازيم غرفة العرسان...تكون العروس عارضة كل عطورها و دخونها بطريقة حلوة و مرات تعرض ذهبها...وكل شي مغلف بطريقة حلوة...بس هذا شي اختياري مو شرط
"المخرج": و هي الحفل الي تكون فسابع يوم بعد العرس...والعادات القديمة انه العروس من بعد يوم زفافها ما تطلع من بيت زوجها الا بعد سابع يوم وتروح فيه بيت اهلها...وابو العروس يسوي لبنته ذبيحة و ومأدبة عشاء نفس "المصابحة" ...وتعزم العروس من طرفها و طرف اهلها بالاضافة الى المقربين من اهل زوجها....وحسب العيلة,,,مرات يكون المخرج حفل كبير مثل العرس...ومرات حفل عائلي بسيط
والفرق بين "المصابحة" و "المخرج": "المصابحة" فبيت اهل المعرس و اغليبة المعازيم من طرف المعرس...اما "المخرج" فبيت اهل العروس و اغلبية المعازيم من طرف العروس
بعد "المخرج": تبدا العروس و زوجها بزيارة الاقارب من اهلها و اهل زوجة و كل بيت تدخله يسوونلها هي وزوجها ذبيحة,,,بس لو كانو المعاريس بيسافرو...تبدا الزيارات بعد الرجوع من السفر
سمحوووووولي طولت عليكم...بس حبيت اعطيكم فكرة عن عادات الزواج فصلالة (مع العلم بأن عادات الزواج عندنا فالسلطنة تختلف من منطقة الى منطقة و مرات من ولايو الى ولاية!!!)
وزفافي شهر 5 انشالله...ادعولي بالتوفيق
هلا فديتج .....ومشكوووره عالموضوع الجميل ...مع اني اعرف عادات اهل صلاله بالتفصيل...
لأن ربيعاتي المقربات من صلاله الحبيبه ...ربع الجامعه فديتهم ....والله لهم وحشه ذكرتيني بايام الجامعه....وصديقاتي كلهن عرسن فديتهن ...وكانت اعراسهم بالضبط شرات اللي وصفتيه ...وخاصه يوم يدخلون المعاريس واتكون العروس (قازحه) يا قلبي عليها ...
ونحن بعد شراتكم باليوم السابع من العرس اتسير العروس بيت اهلها وايسوون لها ذبايح ...^_^
واغلب اهل صلاله ياخذون من الاهل والنادر اللي ياخذون من برع العايله ..
وربيعاتي كلهن ماخذات من الاهل ربي يسعدهم
وربي ايوفقج الغلا ويتمملج عرسج ع خير واتكونين قمر بيوم عرسج ..ويفرح فيج ريلج ^_^
وايسر كل امورج ...^_^
اختج راعية المنطوق...كشخه جيرل ..^_^