بسم الله الرحمن الرحيم
السلام عليكم ورحمة الله وبركاته
في ذكرى ال 11 من شهر ذو الحجة 1429
الموافق 9-12-2008
يوم الثلاثاء ليلة الأربعاء
كانت ليلتي المميزة، أحلى يوم في حياتي.. الليلة اللي ربطتني بزوجي وحب حياتي
بعد تقريبا 3 شهور من زواجي حبيت إني اشارككم فرحتي بمجموعة من الصور
وقصة زفافي..
أول ما بدأت إجازة الحج شلنا كل القرابيع حقتي وانطلقنا من الرياض الى جدة بالسيارة، يا زين العروسة وهي تسافر بالسيارة من الرياض الى مسقط رأسها، أول مرة نسافر ونأخذ 13 ساعة بالضبط!! ايش الجنون دا، كانوا الحجاج في كل مكان، ما شاء الله تبارك الله. كل كم كيلومتر في تفتيش وهات التصريح تبع الحج وحالات صعبة.
بس الحمد لله وصلنا الى جدة بعد جهد جهيد، وأول ما وصلنا طلعت مامتي مع خالتها وبنت خالتها يشتروا لي الحاجات اللي تبقت، أما النفسية من جد كانت تعبانة ( بعيد عنكم) ما ادري ليه كل ما اقول شي يقولوا العروسة المفروض ما تسوي ، المفروض ما تختار
!!!!!
اقنعوني ممكن؟
كيف العروسة ما تختار الحاجات اللي تخصها؟
بس الحمد لله عدت بسلام، مع انفجار واحد فقط في وجه الجميع هههههه
قبل الفرح بيوم ودوا الدبش تبعي ( الجهاز – القرابيع هههه) لبيتي، وطبعا انا ما اخترت غير ملابسي، والشنط، الباقي نقته امي وبنت خالتها، ما ادري ليه؟ الى اليوم افكر اقول ايش المبدأ المتخلف هذا؟ ليه العروسة ما تختار اشيائها؟
حتى المسكة انا ما اخترتها، هم اختاروها ليا!!!
وانفجرت وانقهرت وخليتهم يغيروها لانها مررررة ما عجبتني
زعقت عليهم كلهم، امي وعمتي واخواتي وخالة امي وبنت خالة امي
من جد سويت فيلم وقتها، كنت اكتم في نفسي واحاول ما اعصب ولا اتنرفز بس مرة وصلت حدي
يالله الحمد لله على كل حال!
نرجع لموضوعنا
هذه صورة للدبش تبعي بعد التضبيط
3 شنط سفر، صندوقين، سلة ملابس، دولاب لأدوات الحمام وانتو بكرامة، و 4 علب كرتون فيها الملابس الداخلية وقمصان النوم، وحاجات زي كدا..
وطبعا فراش السرير الابيض اللي برضو ما اخترته <<< ملاحظين اني مقهورة على الشغلة هذه
قبل يوم الفرح، رحت للكوفيرة اللي نصحتني بيها وحدة من منتدى عروس
ما عمري جربتها ولا اعرف كيف شغلها، ما كنت خايفة بس خوفوني بالقوة ههههه، قالوا كيف تروحي لوحدة ما تعرفي كيف شغلها يمكن بايخ يمكن مو حلو
عشان كدا قلت لازم بروفة، بس برضو ما امداني اسوي بروفة، لانو ما ودوني عندها الا قبل الفرح بيوم، اسوي ايش ولا ايش؟ صبغت شعري وصبغت حواجبي وعملت دلكة ، وبوديكير ومونكير، كل هذا من الساعة 4 العصر الى الساعة 1 الليل.
رجعت البيت لقيت انو حواجبي ماهي مضبوطة، وبدأت حكاية النرفزة، دقيت على الكوفيرة، قالت لي بكرة تجي وتجيب معاها صبغة عشان ترجع تصبغها تاني، ولقيت انهم اختاروا لي مسكة مرة ما دخلت مزاجي وحسيتها مرة قديمة ومو اللي كنت ابغاه
فظهرت سحاب الود الشريرة ههههه
وقلبت عليهم ولا صرت اكلم احد وحطيت راسي ونمت من القهر
بطاقة الدعوة
اليوم التاني (يوم الفرح) صحيت من النوم وجلست اقرأ سورة البقرة عشان تهدى اعصابي وقررت اني ما اتنرفز من شي واضحك على كل شي عشان ما عندي استعداد انو تصير ليلة فرحي ليلة قهر وعصبية، خلينا مرتاحين ومروقين،والحمد لله بعد ما قريت سورة البقرة ارتحت نفسيا وهديت اعصابي، وقدرت اني ابطل عصبية ههههه
الكوفيرة قلنا لها تجي الساعة 2 عشان تخلص اخواتي وامي وعمتي قبل ما تمسكني
عشان انا اصير جاهزة الساعة 10 ونروح للقاعة على الساعة 11
لانو اهلي كلهم ناويين يدخلوا صكة وحدة، كل اهل العروسة، فأتفقنا مع الكل انو نتقابل هناك الساعة 12 وندخل سوى. وسبحان الله ما في شي يصير على كيفك، انا بدأت تعمل لي المكياج بعد العشا على الساعة 8 تقريبا خلصت من كل شي الساعة 12 ونص!!
ما كنت مقتنعة بالميك اب، بس ما كان في وقت عشان اغيره لان بابا عصب وقال تأخرنا وبدا يستعجلنا، وأنا خفت اني اتنرفز واعصب كتير، فقلت توكلي على الله، وكلهم قالوا لي انو شكلي مرة حلو ومتغير، فمشيت القصة على خير
وصلنا القاعة على الساعة 1 تقريبا وطلعت لغرفة العروسة بسرعة بسرعة
والبسي الفستان، ونادوا المصورة ، وجيبو العريس
من جد ليلتي كانت عجلة ههههه
فستاني
صدر الفستان
الفستان من تحت
انا اخدت الفستانين ودمجتهم على بعض عشان احصل على فستاني
بس ما كان اوف وايت كان ابيض، والطرحة خليجية طويلة 3 متر
هذا لون الفتسان مع الطرحة، كان بياض الثلج، زي ما كنت ابغاه
هههه اللي يضحكني هو ان الشي الوحيد اللي كان على مزاجي هو لون الفستان هههه ولا شكله ما هو زي اللي كنت اتمناه، بس الحمد لله طلع مرة حلو ومشي الحال ههههه
الأكسسوار
كانت السلسلة قصيرة على الرقبة بالضبط
الحمد لله مرة كان حلو مع الفستان وانبسطت منه
الميك اب كان موف، من داخل الجفن موف فاتح ومن خارج الجفن موف غامق على بنفسجي، ويمتد الموف الغامق هذا لفوق الجفن مكون قوس ناعم
انا ما كانت عاجبتني حركة القوس، لما افتح عيوني مرة حلو ما شاء الله ما يبان بس لما اغمض شكلو بايخ، بس اخواتي قالوا لي انو حلو ولا اغيرو، واصلا ما كان في وقت اصلح حاجة
اما التسريحة كانت مرفوعة بخصل، مع خصل نازلة على تحت ملفوفة بالفير، ومن قدام على اليسار في وردة اوركيد بيضاء متوسطة الحجم اطرافها بمبي جنبها 3 ورود صغيرة موف
الوردة
والورود الصغيرة مثل هذه
الطرحة من ورى تجي من اذني اليمين الى اذني اليسار
طبقتها بالنص وصارت طبقتين من ورى
ما حطيت تاج لانو حطيت تاج في الملكة وحبيت اعمل شي مختلف وناعم في نفس الوقت
المسكة كانت موف ، اللون اللي حبيت اعمل الميك اب ، مرة كانت حلوة ما شاء الله، بعد ما خليتهم يغيروها
كانت ثقيلة، بس كويس انها تتعلق على اليد، وارتحت ما شلت هم المسكة والفستان، انا علقت المسكة وقدرت اتحكم في الفستان اشيله واحطه، ومن جد انصحكم تسووا زي كدا، مسكة ما تزعجك وقت الزفة!
الزفة كانت الساعة 3 الفجر!!
لان المصورة تأخرت علينا وجلسنا نستناها لحد ما جات تصورنا
وبعدين لما خلصنا كانت الزفة على طول، بس اللي زعلني هو ان الناس مشيت لانو كان فترة حج وكل الحريم ازواجهم يشتغلوا في الحج ودوامات واللي زوجها مرابط وما تقدر تطول
ففي الزفة ما كان في ناس كتير
الحمد لله على كل حال، انا كنت ابغى الزفة الساعة 2 ولا 1 ونص
بس حماتي كانت تبغى 3 او 4
وسبحان الله صار زي رغبتها!
نظام القاعة بلكونة نطل منها اول الزفة
على اغنية نجوى كرم ( الحلم الابيض)
بدلنا الدبل على البلكونة، ووقفنا نتلكع شوية هههه ( نتلكع = نضيع وقت)
وبعدها ننزل من الدرج ، لكن الدرج مخفي وما نبان ونحن ننزل، وفوق كدا الدرج مررررررة صغير هههه نزلت انا اول وزوجي ورايا ماسك الفستان
اول ما نزلنا قطعنا الكيكة 5 ادوار هدية من القاعة، كنت اتمنى اسوي كاب كيك بدل الكيكة الكبيرة هذه اللي محد اكلها واترمت ( استغفر الله من جد شي يحزن)
بس برضو كانت حلوة ما هي سيئة
الكوشة كانت عبارة عن 4 فراشات في النص بوكيهات ورد
كلها كانت ذهبي وابيض والكرسي واحد عليه تل ذهبي وقدامنا كان في طاولة مدورة عليها بوكيه ورد ابيض
هذه صورة من زاوية
كوشة على ذوق العريس يسعد قلبو، كان عارف اني اموت في الفراشات
على الكوشة شربنا عصير، تقريبا ههههه، ما شربنا العصير بس مثلنا اننا نشرب ، والكاسة برضو من القاعة ما ادري ليه كل شي احمر؟ يا ليت كل شي موف، المشكلة انا ما سويت بروفة للزفة ولا كان قلت لها تسوي كل شي موف، وكنت مسوية فيديو عشان تحطوا قبل الزفة ، طلع جهازهم ما يشغل mp3 فيديو لازم شي تاني نسيت.
( زي ما قلت لكم ما في شي صار على مزاجي هههه بس العريس انا اخترته هههه)
العصير
بعد ما شربنا العصير، جلسنا شوية على الكوشة، بعدين هو طلع للغرفة فوق وانا جلست مع اخواتي وجوني حريم يسلموا عليا وقطعوني من الخوف هههه الله يسامحهم من جد خوفوني انا كنت جدا طبيعية وعادية ما فكرت في حكاية ( الدخلة)
وانا >>> :eek::eek::eek::eek::eek::eek:
من الخوف لما رحت الشقة جلست بالفتسان ما رضيت اغير هههههه
دفتر التوقيع، جبت لوحة رسم كبيرة، وحطيت صورتي انا وزوجي من الملكة في النص، وزينت اطراف الصورة فقط، جبت اقلام ملونة زي الفلوماستر بس صغيرة، وحطيتها في زبدية زجاج
وكل الناس وقعت على اطراف الصورة في اللوحة
مرة طلعت حلوة وملونة وشي مرتب
ما حطيت صورتها لانو كله مليان اسامي والصورة صعب اطمسها
ههههه ان شاءا لله فهمتوا شكل اللوحة
:tongue:
صحيح ان حاجات كتيرة صارت مو زي اللي كنت اتمناها
واجبرت على حاجات كتير ما ابغاها
بس في النهاية اليوم كان يومي
وانبسطت وارتحت نفسيا
وطلع شكلي حلو ومتغير الحمد لله
ناعمة بس مميزة
:15::15::15:
ان شاءا لله تكون الصور اعطتكم أفكار لزواجاتكم
وعقبال ما احط لكم صور سابع البزورة
