اخواتي الحلوات عضوات عروس
بقالي كتير مش نزلت موضوع في قسم المطبخ
وبصراحه وحشني جداااااااااااااا
وعشان كده جبتلكوا مكرونه جديده سهله وان شاء الله لذيذه
يلا نبتدي
المقادير:
مكرونه مسلوقه بالطريقه العاديه
قطع دجاج مقطعه مكعبات - جزر وفلفل اخضر مقطعه شرائح طويله (زي اصابع البطاطس بس رفيعه زي اللي في الصوره) - بصل مقطع الي انصاف دواير (بنقسم البصله نصفين بالطول ونقطع كل نصف الي شرائح )
كريمه طهي
وطبعا بقي ملح وفلفل اسود
الطريقه:
ناخد الفراخ ونقلبها في معلقه سمن علي النار يعني نشوحها لحد ما لونها يغير
وبعدين نبدا نضيف الخضروات الجزر الاول ونسيبه شويه وبعدين نضيف الفلفل والبصل مع بعض
عشان البصل ما يدبلش قوي ولونه مش يتغير يعني يدوب يطري شويه
نقلبهم كلهم مع بعض لمده 5 دقايق وبعدين نضيف عليهم حوالي نص كوبايه مايه
ونوطي عليهم النار ونسيبهم يستووا ونضيف عليهم الملح (لو المايه نشفت ولسه الفراخ مش استوت بنزود مايه تاني لحد ما تستوي خالص)
نجهز الباشميل بالكريمه
نقلب 6 ملاعق دقيق مع معلقتين سمن علي النار لحد ما لونه يصفر
نضيف مايه او مرقه عليه ونقلب بسرعه عشان مش يكلكع ونخليه بشاميل خفيف يعني بنزود كميه المايه او المرقه لحد ما نحس انه خفيف مش تقيل
وبعدين نضيف مقدار الكريمه (العبوه اللي في الصوره 200 جرام استخدمتها علي مرتين )
ونقلبه
كده بيكون الجزء التاني استوي (الدجاج والخضار )
نضيف المكرونه والخضار والبشاميل علي بعض كلهم ونقلبهم كويس لمده دقيقتين
ونقدمهم في طبق
وبالهنا والشفا
وده لبنات عروس الحلوين اللي هيقولولي رايهم
الي لقاء اخر بقي يا قمرات
