متى طلعتي مع مولودك أول مرة بعد الولادة؟

حلمي الرشاقة 22-01-2009 18 رد 6,732 مشاهدة
ح
السلام عليكم أمهات حلوات شخباركم و أخبار الكتاكيت؟ :)

سؤال و أتمنى كل وحدة تفيدنا بتجربتها،،

بعد ما رجعتي من المستشفى إنتي و البيبي بالسلامة الحمدالله،، أكيد أول أسابيع جداً متعبة بالذات إذا أول مولود و مو متعودة... وطبعاً الوحدة تكون خايفة تطلع البيبي من البيت لأنه بعده صغير بالذات إذا الجو بارد أو غيره و تكونين على طووول في البيت.. مادري بس هذي من تجربتي و للحين ما عندي خبرة..


متى طلعتي مع البيبي بره البيت سواء لوحدك أو مع زوجك أو الأهل،، يعني بعد كم يوم أو أسبوع أو شهر؟ أو لما البيبي كان عمره كم؟


و قصدي بالطلعة يعني على المجمعات أو السوبرماركت أو الأماكن العامة و غيره .. بحيث إن تاخذين البيبي بالعربانة ...

و ليس الزيارات البسيطة بين البيوت و الأهل..


بصراحة أنا ما عندي خبرة و كله خايفه بنتي عمرها شهر الله يحفظها و ياريت تخبرونا عن تجاربكم و موفقين حبيباتي و الله يحفظ أولادكم و بناتكم (f):)
ا
هلا فيك أختي

أنا أول مره طلعت بنتي تقريبا عمرها 45يوم
رحت فيها مجمع وبعدها ماطلعتها الا لما كملت شهرين ونص تقريبا بس مأطلعها
الا في الضروره .....
ح
الله يخلي لك البنوتة و تسلمييين عالرد حبيبتي :-)
ا
انا اول مره طلعت مع بنت عمرها 40 يوم ورحت معاه مجمع
.
انا اول مره طلعت بولدي كان عمره 45 يوم رحت فيه لأهل زوجي عندهم استراحه وكان صيف بس لبسته اشياء قطنيه واكمامها طويله ولها شراب وطربوش لأن اللي بالعمر هذا يتقبل البرد بسهوله لو هواء خفيف ...
وبالنسبه للطلعات للمراكز والمجمعات والمطاعم مابديت آخذه معاي الا يوم كان عمره خمس شهور وسافرت حتى السفر ....
و
انا في البدايه ماطلعت معاه الا الزيارات الخفيه وجا البرد اخاف عليه واجداحين 5 شهور
بس لما اتسوق او مكان عام اخليه مع والدتي الله يخليها
احس اريح للبيبي واطمن عليه من البرد لان اقل شي يمرض البيبي
د
يعتمد على الجو اذا كان بارد اخاف ما اطلع الطفل
ض
االسلام عليكم ورحمة الله مادري ليش عندنا هالموضوع حساس ويخوف وامهاتنا مايرضون انطلع الياهل من البيت لين يكمل 40 يوم .... مع انه الاجانب واعذروني ما اقصد اي شي بس كاهم يطلعون عيالهم من اول يوم وما شاء الله ما يصير فيهم شي وحنا من كثر ما نخشش فيهم ونلبس نجيب لهم العين ويمرضون

المهم انا عادي اطلعهم معاي في اي وقت بس اذا كان فيه ضرورة يعني اول ولادة لي كنت وايد اتملل في البيت لان طبعي ملولة وحركية فكانت جلست البيت والتقييد تذبحني مو معناته اني احب الدوارة لا والله
بس كنت احس اني مخنوقه وثاني شي كنت مشتاقة اني اتمشى وانا في يدي البيبي مستانسة لاني صرت ام هههههههههههههههههه عاد من ينقص شي طيران انا وزوجي لاي مجمع بس احاول طلعاتي ماتكون في اوقات الزحمة
ع
انا طلعت معــاه كان عمــره شهرين ونص
بسسس كنت خااايفـة لا يصيييج ويبهدلني ..
وعلى طوووول اشتريت الي ابغــاه وشررده للسيــارة...
B
انا اطلع من بعد الاربعين عادي بس كنت محتاسة معاه يعني لما يبكي في المجمع والسيارة مااعرف كيف ارضعة لانه يرضع طبيعي بس مع الوقت رتبت اموري
ن
انا طلعت مع ولدي تقريبا بعد شهرين ونص ... صج كنت خايفه عليه لكن الحمد الله كان هادي وايد ...
ب
انا عمري بنتي تقريبا شهر ونص

ومفكرة اليوم نطلع طلعة عائلية ان شاء الله

بس واجد متخوفة من البرد خصوصا انها مزكمة
م
أول مرة طلعنا كان له 3 أسابيع رحنا بيت أهل زوجي لأن أم زوجي ماجافته الا بالمستشفى وهي ماتقدر تمشي وحطيت على روحي ورحت وأذكر يومها طاحوا خيوطي (مادري من الحركة يمكن بس الحمدلله أفتكيت).. بس طلعة لبرع أذكر كان له 3 شهور خواتي أصروا إن نطلع يكون يحطونه بالعربانة وهواش من يدز العربانة متخرعين أول بيبي بالعايلة... والحمدلله آنه أفتكيت بس كنت قاعدة... لكن كانت أكبر غلطانة صج الأمهات أول مرة مايعرفون شي.. لبسته الشبك الكامل بس ماخذيت معاي لحاف وحسيته بردان المسكين وبس من يومها خذيت درس...
أ
امم انا طلعته معاي يوم كان عمره شهرين تقريبا وكنا في الصيف بس دفيته عدل

وترى نصيحه يوم تعودون الياهل ان اطلعونه من يوم هو صغير يتعود على الناس ويصير اجتماعي
ا
طبعا احنا هني ماكو عندنا امهات يصبرون لبعد 40 يوم كلهم مستعجلين على الطلعة

انا اول طلعة طلعتها مع ولدي كان عمره 45 و رحت عرس صديقتي

طبعا ما تتصورون شكثر كنت مترددة يعني وصلت يم القاعة و بغيت ارد لان كنت خايفة و كنت بروحي مع اختي و هيه بعد ما عندها خبرة

بس الحمد لله عدت على خير

شكرا لك اختي على الموضوع الحلو
ح
(f)حبيبااااتي

أم الودر

أم علي

ورود ناعمه

درب الأمل

ضحكة كذوووووووووبة

عروس جنان

Blossoms

نور الدنيـا

بسمة أطفالي

رانيا البحرينية

أحلام صغيرة

ام عمار القمر


تسلموووون يعطيكم ألف عافية عالردود الحلوة و مشكووووووورين :)
م
هلا اني بنتي طلعت معاها وهي عمرها اربعين يوم رحت معاها مجمع نشتري ليها
ثياب وفقعت الدنيا من الصياح وماعرفت ويش اسوي ليها وطلعت وماشتريت ليها شي
ههههههههههههه
ر
اول ما اولد اكون عند الولاده وبعد رجوعي البيت ما اطلع معاهم بيت اهل زوجي الا بعد الاربعين

اما الزيارات ما اروح الا اذا صار عمرهم فوق الشهرين وطلعات بسيطه جيران او شيء مثل كده

اما الاسواق اتركهم عند امي لين يصير عمرهم سته شهور او اكثر



هذا مو خوف عليهم لاني ما احب اطلع مع الجهال الصغار اصلا احتاس فيهم واولادي يبكو كثير

ما اعرف اتصرف معاهم امام الناس
ا
الصراحه طلعت مع بنتي يوم عمرها 19 يوم راحت زواج خالتها

يعني كانت عند عمتها بس اخر الليل جابوها الي الصاله
X