الرضاعة الطبيعية و الصناعية،، سااااعدوني

حلمي الرشاقة 05-01-2009 21 رد 14,648 مشاهدة
ح
السلام عليكم أخواتي العزيزات،،

أنا صار لي والدة من أسبوع و خمس أيام.. طبعاً بعد الولادة في المستشفى كان مافي حليب في صدري و كنت أحاول أحط بنتي على صدري عشان تتعود ، لكن اضطريت يعطونها صناعي لأن مافي حليب.. و اللبأ الشفاف البسيط ما يشبعها طبعاً ..

و لما رجعت البيت بدأ ينزل قطرات أكثر و كنت أحطها على صدري و الحمدلله ترضع بس للأسف الكمية قليييلة و غير كافية ،، فأضطر أكمل لها صناعي.. و لحد الآن أعطيها صناعي و طبيعي بنفس الوقت و أحس إن الطبيعي قليل..

هذا غير إني أكون أحياناً جداً مرهقة و تعبانة و أحياناً حلمة الصدر تكون متهيجة و تعبانة فما أقدر أخليها طول الوقت طبيعي .. مع العلم إني أحط كريمات معالجة للحلمة و أستخدم الشفاطة بعد...

أدري إن كل ما رضعت من الصدر أكثر ينزل حليب أكثر، و أنا احاول جهدي مس ما أقدر طول اليوم رضاعة طبيعية بسبب التعب والألم، و الحليب مازال قليل فتصيح بنتي من الجوع..

لا تقولون لي شربي حلبة لأن ريحتها سيئة في الجسم تطلع.. أحياناً أشرب الكراويا ، و الحمدلله أشرب وايد سوائل و آكل أكل صحي و مغذي..

نفسيتي وااايد تعبانة و حزينة و أحس إني ما راح أقدر أستمر في الرضاعة الطبيعية :(

هل في وحدة مرت بنفس تجربتي،، و هل هناك مشكلة كبيرة في الحليب الصناعي أم أن الناس يهولون الموضوع..

و كم جلستي اختي و انتي ترضعين طبيعي و هل كان متعب؟

أفيدوني جزاكم الله خير أنا جداً حزينة .. الحمدلله على كل حال ..
ق
اول شي الحمدلله على سلامتج


ثاني شي يعني مافي مشكلة كبيرةفاصناعي بالعكس ترى يفيد بس مابيفيدة نفس طبيعي

يعني حلوو ان تعطين بنتج طبيعي وصناعي وستمري على هشي لان لو ضليتي تعطينها طبيعي مابيشبعها لان اتوقع انه خفيف ومايكفي

وانا عندي لج حل بسيط يعني لما تحبين ترضعينها اول شي عطيها من طبيعي وبعدين سوي لها صناعي وهذي طريقه حلووة وبتستفيد منها وايد
وان شالله قدرت افيدج
ح
مشكووورة عالرد حبيبتي قطرية و فعلاً هذا إلي أسويه إني أعطيها أول طبيعي و بعدين أكمل صناعي بس مشكلتي إني ما قدر على هالشي طول الوقت خصوصاً في الليل :-(
ب
حاولي قد ماتقدرين تعطينها طبيعي

ولا تفكرين انه مايكفيها بعدهيه صغيرة والله سبحانه وتعالي وضع لها حليب على كفايتها وكل ماتشرب يظهر لها حليب جديد

وخلي لها رضعة صناعية وحدة فقط في اليوم بكون افضل لها
أ
انا ولدت بتاريخ 30-11 ورضعت بنتي طبيعي لمدة اسبوع بس مثل ما قلتي ما كانت تشبع, فدخلت معاه الصناعي وشووي شوووي اتهاونت بالموضوع والحين ما صرت اعطيها من صدري
أختي لو الحليب خفيف رضعيها صناعي بس لا تقطعين الطبيعي لاني الحين متندمه بس خلاص صدري مافيه حليب ابد
ترى الحليب الطبيعي يفيدها كثير لو حتى خفيف
س
اول شئ الحمدللة على سلامتك وبعدين اقولك الرظاعة الصناعية تجيب المغص والطبيعية وحدها ماتكفي انا رضعت طبيعي الين 7اشهر وجاء لولدي نقص كاليسوم ولين شديد في العظام وفقر دم لازم ترضعين الطبيعي وصناعي في اليل اعطى طفلك صدرك اسهل وفي النهار الرظاعة هذا نصحية لايجى لولادك نقص كاليسوم ترى مرة مو كويس انا بنتي والديجاهم تشنجت وانكتم نفسها علشان الكالسوم انتبهي
ر
طبعاً بعد الولادة في المستشفى كان مافي حليب في صدري و كنت أحاول أحط بنتي على صدري عشان تتعود ، لكن اضطريت يعطونها صناعي لأن مافي حليب.. و اللبأ الشفاف البسيط ما يشبعها طبعاً ..


اختي اسمحيلي بكلمه

و ان شاء الله ما تاخذي على خاطرك مني

مين قالك انه البأ او الصمغه الكولستروم ما يشبع ؟؟؟؟

تعرفي انه يشبع و يفيد اكثر من أي شي

و مين قالك انه حليبك ما يكفي و شو السبب انه ما يكفي هل يا ترى تاخذي ادويه تنقص الحليب

للأسف في مجتمعنا صايره الأمهات أحينا يقنعوا بناتهم انه صدرهم لازم ينفخ و تحس بألم علشان تتأكد انه فيه حليب


و إلا ما عندها حليب و طفلها ما يشبع أصلا الطفل لإي اول أشهر بيصيح شبع او لا


اختي الشي الوحدي و الأكيد اللي يدل انه ما عندك حليب هو وزن الطفل إذا وزن الطفل ما يزيد فهذا معناه انه يا اما ما عندك حليب كفايه او انه انتي مانك قادره تعرفي ترضعيه زين

اختي هالفتره مهمه جدا في ارضاع الطفل و المفروض يرضع منك انتي و فقط و غير محتاج لشيء غير حليب امه

حاولي اقطعي الصناعي و بس رضعيه و اسألي إذا حبيتي خبيره رضاعه
ر
سرر الجاذبية;8328257:
اول شئ الحمدللة على سلامتك وبعدين اقولك الرظاعة الصناعية تجيب المغص والطبيعية وحدها ماتكفي انا رضعت طبيعي الين 7اشهر وجاء لولدي نقص كاليسوم ولين شديد في العظام وفقر دم لازم ترضعين الطبيعي وصناعي في اليل اعطى طفلك صدرك اسهل وفي النهار الرظاعة هذا نصحية لايجى لولادك نقص كاليسوم ترى مرة مو كويس انا بنتي والديجاهم تشنجت وانكتم نفسها علشان الكالسوم انتبهي



أختي أبدا اسمحيلي كلامك مو صحيح

الرضاعه الطبيعيه وحدها تكفي وولدك جاه نقص كالسيو لأنك ما عرضتيه للشمس الطفل اللي رضع طبيعي يا اما يتعرض للشمس يا ماما ياخذ فيتامين د علشان تثبيت الكلسيوم
ر
على فكره انا ما تاكلم من فراغ انا اخذت دوره من مستشفى الكونيش في ابوظبي في الرضاعه الطبيعيه و كنت احدى اعضاء مجموعات الدعم في الرضاعه الطبيعيه و اتكلم لمصلحتكم و الله و مصلحة اطفالكم

ما فيه شي اسمه ما عندي حليب إلا للي تاخذ ادويه او في حالات اقل من نادره
ر
اختي
نعم هناك مشكله في الحليب الصناعي فالحليب الصناعي ليس إلا حليب ابقار مسحوب منه بروتينات عسره الهضم على الطفل و مضاف له بعض الفيتامينات و روحي قارني بين انواع الحليب بالسوق و شوفي انه ما فيه فرق بينهم

و للأسف بعض الأطباء ياخذو عمولات من شؤركات حليب الأطفال عند وصفهم نوعيه معينه من الحليب

اما حليب الأم و فإذا نسينا كل شي لا ننسى انه مضاد حيوي بحد ذاته و كل المناعه الموجده لدي الأم تنتقل للطفل بالحليب عن طريق الأجسام المضاده

إضافه لأنه دسم اكثر من الحليب العادي بكثير و كميه السكر فيه مناسبه و يحتوي على اجود انواع البروتينات وفيه ماء و الكثير الكثير
ر
قطـ ذوق ــرية;8326388:
اول شي الحمدلله على سلامتج


ثاني شي يعني مافي مشكلة كبيرةفاصناعي بالعكس ترى يفيد بس مابيفيدة نفس طبيعي

يعني حلوو ان تعطين بنتج طبيعي وصناعي وستمري على هشي لان لو ضليتي تعطينها طبيعي مابيشبعها لان اتوقع انه خفيف ومايكفي

وانا عندي لج حل بسيط يعني لما تحبين ترضعينها اول شي عطيها من طبيعي وبعدين سوي لها صناعي وهذي طريقه حلووة وبتستفيد منها وايد
وان شالله قدرت افيدج


يا بنات حرام تقولوا شي ما عندكم علم فيه مين قال خفيف و ما يكفي

الانسان محاسب على كل كلمه يقولها
B
الحمدلله على سلامتج اختي ومبروك ما جاك

اختي حاولي تحطين البيبي على صدرج وتسمين عليه وتقرين ما تيسر من القرآن الكريم وان شالله شوي شوي ان شالله بتتعود

انا مشكلتي عكسج تماماً.. بنتي صار عمرها الحين شهرين ونص ومو راضية تاخذ أي رضعة من أي حليب صناعي.. تعبت وانا اغير لها... ومو راضية حتى تمسك الحلمة الصناعية..حتى الماي اشربها بالقطارة.. المشكلة ان اجازتي قربت تخلص ومو عارفة شسوي..الدكتور يقول شفطي لها طبيعي.. حاولت اجرب بس للأسف ما صار حتى أونص واحد

a
حمدلله على سلامتك في الأول
أنا مؤيدة جداً لكلام الأخت ريم لأن حليب الأم لوحده كافي حتى سن 6 أشهر
أنا ولدت من 5 أشهر وحالتي كانت نفس حالتك بالظبط والكل يقولي لبنك خفيف ولازم لبن صناعي لكن أنا تابعت مع الدكتور وماسمعت كلام أي شخص والحمدلله مااحتجت للصناعي أبداً وبنتي ماشاء الله وزنها طبيعي
لبن الأم بعد الولادة بيكون خفيف شويه ده شئ طبيعي وطبيعي ترضع كتير
أختي تعالي على نفسك شويه في شرب الحلبه لانها مفيده جدا واذا ماقدرتي فالدكتور وصفلي حبوب طبيعيه مصنوعه من الحلبه اسمها لاكتوماكس والحمدلله فادتني جدا
ح
خواتي الحبيبات أشكركم جزيل الشكر على ردودكم الطيبة و تشجيعكم و نصائحكم و إن شاء الله الله يقدرني و جميع المرضعات على الرضاعة الطبيعية .. و احتمال اروح الدكتورة إذا ما حسيت بتطور و إن شاء الله ما احتاج و تتحسن الرضاعة يارب..

و أشكر اختي ريم81 على تشجيعها و بالعكس ما ازعل من أي نصيحة و الله يسهل يارب ..
م
الحمدلله على سلامتك اختي
الله يبارك لج في ذريتك
انصحك اختي بحبوب الحلبة
روحي اي صيدلية مثل نيوتريشن
واسالي عن حبوب الحلبة هي عبارة عن كبسولات مالها اي ريحة في الجسم
تاخذين في اليوم من 3-6 حبات
والنتيجة بتظهر عقب كم يوم
يعني لا تستعجلين عليها
وبعد في حبوب الموتيليوم اللي هو عبارة عن دوا للغثيان
بس من اثاره الجانبية ان يزيد كمية الحليب
طبعا هذا الدوا لازم تستشيرين فيه دكتورة
لانها هي اللي بتحدد لج الكمية اللي تاخذينها

وكثري من السوائل
والله يعينج
ح
مشكورة حبيبتي مياسة العود و إن شاء الله بسأل عن الحبوب في الصيدلية و يعطيج العافية :-)
~
ماعليج شر ان شاء الله

شكرا اختي الريم على المعلومات الحلوه
ح
شر ما اييج حبيبتي أم سويرة و مشكورة عالمرور :-)
m
يعطيج الف عافية
أ
دائما في البكر تصير مشاااااكل
بس ع الثاني تكون الأمور احسن
X