زوج: ايه ؟؟ مش هاتشربينى فنجان قهوه النهارده ولا ايه؟؟
زوجه: حاضر يا راجل مانا هاقوم اعمله اهه
زوج: هاتعمليه ايه بس انتى بقالك ساعتين واقفه فى المطبخ ولسه ماعملتيش القهوه؟؟
زوجه:اديك بنفسك شايف انى بقالى ساعتين يعنى ربنا يعينى بقى فى وقفتى دى
زوج: اه موال كل يوم بقى انتى هاتبدأى ولا ايه؟؟
زوجه: ابدا ايه يا راجل يعنى اما اتعب افضفض مع مين يعنى؟؟
زوج: وهو انتى ما بتتعبيش غير لما اطلب منك حاجه؟؟
زوجه: لا حول ولا قوه الا بالله هو ده ال ربنا قدرك عليه تقوله؟؟ مفيش كلمه حلوه الواحده تسمعها فى البيت ده؟
زوج: لاء بقى انتى شكلك عايزه تقلبيها نكد وانا مش ناقص كفايه عليا قرف الشغل وال باشوفه فيه..مش هايبقى النكده بره وجوه كمان
زوجه: انا؟؟ انا نكد؟؟ كل ده عشان ايه؟؟ عشان باقولك ضهرى اتقطم من وقفه المطبخ؟؟
زوج: لاء وانتى الصادقه عشان انا ال استاهل عشان مانزلتش شربت فنجان القهوه تحت مع اصحابى انا استاهل والله
زوجه: على الاقل انت بتخرج تفرفش روحك وتغير مناظر اما انا من المطبخ للشغل البيت للغسيل والعيال لما خلاص تعبت انا حاسه انى مخلعه من بعضى والله وعضمى كله بينشر عليا
زوج : آه هاتقعدى تقوليلى ضهرى وتبدأى موال الشكوى تانى؟؟
زوجه: طيب قولى سلامتك حتى ؟؟
زوج: وانا؟؟؟ انا تعبى طول النهار وحرقة دمى فى الشغل وده يتنطط عليا وده يقرفنى مالهاش عندك اى تقدير؟؟ عمرك قولتيلى سلامتك ولا كلام من ده؟؟
زوجه : ياااااااه دانت صحيح قلبك اسود دانا طول النهار باقولك تسلم يا ابو العيال وربنا يخليك لينا ..ايه مش فاكر لى حاجه خالص؟؟
زوج: ولا فاكر انى سمعتك بتقوليها ابداً...........باقولك ايه؟؟ هاتعملى القهوه ولا انزل؟؟
زوجه: حاضر
زوج: حاضر..؟؟؟ ومالك بتقوليها بمسكنه وذل كده؟؟
زوجه: باقولك حاضر حاضر مش عاجبك كده ولا كده؟؟
زوج:لاء دى بقت عيشه صعبه الواحد مش عارف ياخد حقه فى البيت ده ...
زوجه: طب وهو حد واخد حقه فى البيت ده غيرك؟؟؟؟
زوج:طب والله مانا قاعدلك ...ومش عايز منك حاجه.....
زوجه: ايوه اتلكك عشان تنزل وتسيبنى
طررااااااااااااااااااخ
صوت لرزع باب الشقه ينهى معه المناقشه.....
موضوع بيمس حياتنا اليومية للأسف الشديد ده بيحصلى فى معظم بيوتنا
انا بنقل الحوار و انا بضحك لكن قلبى بجد حزين لان دة المرار و عارفين لو اللى بيدور بينهم الحوار قروا الكلام ده هيعرفوا مدى تفاهت الموضوع اللى عملوا عليه موال و خناقة لو هو من الاول قالها كلمة واحدة حلوة ماشى يا سيتى ربنا يقويكى لما تخلصى ممكن تعمليلى القهوة هى حتى لو مخنوقة من شغل البيت كلامه هيلجمها زى ما بنقول يعنى هتسكت مش هتقدر تتنرفز او تطلع حنقتها عليه بس للاسف هو ده حالنا ربنا يصلح حال أمة المسلمين
منقول من منتدى نور اسلامنا
بقلم : يمنى
انا بنقل الحوار و انا بضحك لكن قلبى بجد حزين لان دة المرار و عارفين لو اللى بيدور بينهم الحوار قروا الكلام ده هيعرفوا مدى تفاهت الموضوع اللى عملوا عليه موال و خناقة لو هو من الاول قالها كلمة واحدة حلوة ماشى يا سيتى ربنا يقويكى لما تخلصى ممكن تعمليلى القهوة هى حتى لو مخنوقة من شغل البيت كلامه هيلجمها زى ما بنقول يعنى هتسكت مش هتقدر تتنرفز او تطلع حنقتها عليه بس للاسف هو ده حالنا ربنا يصلح حال أمة المسلمين
منقول من منتدى نور اسلامنا
بقلم : يمنى
اختكـــم فى الله
جنـــــــى
جنـــــــى