***قصه ولادتي بطفلي الثاني أحـــمد***

الحمدلله من قبل ومن بعد

ربي لا يحرم حد من نعمه الانجاب ويرزق كل بنات حواء هذي النعمه العظيمه

الحمدلله ولدت و يبت طفلي الثاني (( أحمد )) يوم السبت 20-12-2008 الساعه 6:45 صباحا بعد معاناه وتـأخير 4 ايام من موعد ولادتي..وطلق كاذب استمر حوالي اسبوع قبل الولاده...

يوم الجمعه رحت بيت اهل زوجي للغدا كالعاده..كانوا عازمين بنات عمهم و كان ماشاء الله زحمه و الكل يقول لي ها بعدج ما ولدتي...و الكل يعلق و يقولي كلي مادري شو يسوي طلق و اشربي مادري شو و من النصايح و القصص ..كنت حديث المجلس خخخخ...وام زوجي و اخته يقولون لي بعده بطنج فوووق...بعدج يمكن حساباتج غلط...المهم...عالمغرب روحوا الناس...و كنت بروح بيتي الا تقولي ام زوجي لا تمي بنشوي برع العشا..الجو حلو...قلتلهم اوكي شو وراي ..خخخخ
المهم عالساعه 10 اتعشيت و رديت البيت...زوجي كان رايح السوبر ماركت...من وصل البيت قمت بحط له العشا اللي يبته له من بيت اهله..حسيت عمري مب قادره من الالم...ياني الم فضييييع اسفل البطن ما قدرت امشي منه..وعقب بدا الم مثل طلق بالاضافه الى الالم الموجود تحت...رحت اتصلت في قسم الولاده قلتلهم الاعراض قالتلي تعالي يمكن بس يبالج مسكن او يمكن يكون ولاده...المهم خبرت ريلي قاللي فيه وقت اتعشى ولا لا...قلت له لا لا اتعشى وانا بسير ارقد حمودي...المهم اتصل في امه مسكينه كانت توها بتنام...عشان تيي و تيلس ويا حمودي و تبات عنده...وعقبها رحنا المستشفى...وصلنا عالساعه 11 و نص في الليل...كانوا يتريوني...حطوني على جهاز التخطيط قالتلي فيه طلق قوي...و قاست لي الرحم كان 4 سانتي...وسألتني شو تبين يخفف لج الالم..قلتلها باخذ ابره الظهر...
قالتلي بس لازم اول شي نعطيج مضاد..لانه يوم سوول مسحه للرحم من قبل قالتلي الدكتوره لازم اخذ مضاد وقت الولاده عشان البيبي ما يصيبه التهاب في الصدر...المهم حطولي المضاد ..والكيس ما رضت تفتحه لانه بيسرع الولاده قالتلي اباج تصبرين ساعتين عشان الجرعه الثانيه من المضاد
و عالساعه 3 خذت الجرعه الثانيه و كنا لازم نتريا ساعه...وعقبها فتحتلي الكيس...
و طبعا ابره الظهر كانوا وااايد مخففين مفعولها ..كنت احس بالالم واقولها زيدي الجرعه..قالتلي لو زدتها ولادتج بتطول 3 ساعات..اصبري عالالم و بتربين في ساعه...
و بالفعل ..الحمدلله كان الالم قااااتل بس الولاده و الدفع حسيت فيه عدل و قدرت ادفع..
و يت دكتورتي قبل الولاده بنص ساعه وكنت خلاص متوسعه كامل...وبغيت اموت ...تقولي القابله وين الابتسامه اللي كانت من ساعه..اقولها اي ابتسامه انا بموووت و اصيييح ...وصدق متفيجه تقولي تبين تمسكين راس البيبي اقولها الله يخليكم خلصوني طلعوووووووه...و عقب تسألني تبين تقصين الحبل..اقولها مابا شي طلعووووووووووووووه...وحتى يوم طلع تسألني احطه على صدرج..اقولها لا مابا اصبروا علي...

وشرف حبيب قلبي الصغير احمد...ربي يخليه لنا و يحفظه و يحرسه هو واخوه من كل عين

طبعا الدكتوره شقت لي..و الحبيب بعد شق من مكان ثاني و هو طالع :(

الخياطه ذابحتنييييييييييي الله يصبرني بس و كله باجره


وهذي كانت قصه ولادتي..وتوته توته خلصت الحدوته :)