الخيااااااانة

السلام عليكم يابنات بجد ماليش غيركم بكتب وانا بعيط مش قادره فاكرنى انا كنت كاتبنه موضوعى هنا علشان كنت مخطوبه وفسخت خطوبتى بسبب مشاكل من اهل خطيبى وخطيبى قال حينزل اجازة من شغله يصلح كل حاجه وبعدين عرفت انه بيكلم بنات ع النت لما نزل وحاول يصلح الامور كلكوا نصحتونى اسامحه وانسى ونبتدى من جديد وكنت فعلا حعمل كده لانى بجد حبيته وقدرت تضحيته ونزوله من شغله لانه بيشتغل فى بلد عربى وقدرت كل التكاليف دى وقدرت كل حاجه لكن هو طلع مش مقدر مش مقدر اى حااااااااااااجه

خطيبى جالنا اكتر من مرة علشان يحاول يوفق بينا وبين اهله ونتصالح تانى وقعدت معاه قعده كلمته كلام جامد اوى ع موضوع البنات ده وقالى خلاص مش حيعمل كده تانى وهو كان قالى ان البنات مسحهم من ع ايميلاته ولما قلتله طيب افتحلى ايميلاتك قالى بس انا مسحت ع اد مااقدر اصل عندى بنات كتير لسه فى موجودين قلتله مش انت قلتلى مسحتهم قالى حكمل وامسح الباقى بس النت مفصول عندنا لسه حمسحهم قلتله ماشى امسحهم انت انا واثقه فى كلامك مش حقولك هات كلمات السر بتاعتك انت امسح كل حاجه انا واثقه فيك

وانهارده رنيت عليه وكلمنى قلتله يجى يقعد معانا شويه علشان نتكلم انا وهو جه وفضلنا نتكلم على موضوع البنات اللى بيكلمهم ع النت وقالى خلاص نقفل الموضوع ده وننساه ومش حيحصل تانى ولاحيكلم بنات تانى ، وقالى نتكلم فى الموضوع الاهم موضوع الخلاف مع اهله ولقيته بيحكى اللى حصل وهو سامع من اهله طبعا وسمع مننا وكلامنا طبعا عكس بعض وربنا يشهد اننا كلامنا كله صح وهو اللى حصل انا نفسى قلت ادامه وادام اهلى ان خطيبى معذور ومش عارف يعمل ايه بيسمع من الطرفين والكلام عكس بعض لازم يبقى معذور وعذرته قلتله اكيد طبيعى لازم تميل لكلام اهلك ، بس انا لاحظت ان خطيبى نفسه نكر حاجات انا حكيتهاله قالى اول مرة اسمع انتى مش قلتيلى قبل كده وطنشت قلت يمكن ناسى لان الموضوع احداثه كتير ،

ايام المشكله مع اهله بعته ايميل بكل اللى حصل فى اخر قعده قعدناها مع اهله انهارده واحنا قاعدين قالى لا انتى مش قلتيلى كذه قلتله لا انا قلتلك قالى طيب حفتح الايميل ونشوف ، خطيبى قام فتح الايميل ولما فتحه لقيت خطيبى البيه مخصص ملف ل4 بنات شكلهم عزاز ع قلبه قلتله اشمعنى دول عزاز عندك يعنى قالى ماانا لسه حمسح كل حاجه ومخصصلى انا كمان ملف مع البنات دول

بس انا لاحظت فى ملف باسم خطيبته الاولانيه المهم فتحته ادامه لقيتها باعتاله لحد وقت قريب اوى والمفروض انهم منفصلين من اكتر من سنه وبعتاله خلال سنه 2008 دى ايميلات يعنى ازاى سالتوا اده قالى ماهى اللى بتبعت قلتله وانت سايب ايميلاتها عندك ليه ومخصصلها ملف وليه راضى تستقبل منها ايميلات واحنا مخطوبين كمان يعنى انتوا ع اتصال اصلا قالى لا هى بتبعت بس قلتله ياسلام دى بعتاله ايميلات وهو فاتحها وقاريها مادام خلاص انفصلت عنها وخاطب واحده تانيه ازاى لسه ع اتصال ومش ممكن هى بتبعت وهو ساكت عمال يستقبل وبس ولقيت اخر ايميل هى بعتاه ليه فى شعر كله كلام حب بقه وعتاب سالته اده قالى ده شعر كان هو باعتهولها وهى بعتتهولوا تانى لما عرفت انه خطب سالته وعرفت منين قالى ماعرفش وبعتاله كتير من بعد انفصالهم لحد قريب يعنى لسه ع اتصال اتجننت بقه يعنى انا ساكته ع اللى اهله عملوه وحسامح وحسامحه هو علشان كلم بنات عليا ع النت قلت بيتسلى بس بيحبنى انا بس اكتر من كده ايه البيه لسه ع اتصال مع خطيبته السابقه طب اعمل ايه قلتله انا اسمى مابيتحطش جمب حد وكنت عايزه امسح الملف بتاعى هو زق ايدى ومش خلانى امسحه

سيبته دخلت اوضتى وقفلت عليا وهو عمال ينادى عليا من بره وماما تقولوا لو كنت عايز تنسى كنت مسحت كل ده قالها ماهو النت فاصل عندنا ماما قالتله انت بتقول مسحت البنات لكن خطيبتك الاولانيه سايب كل حاجاتها ليه عندك ولسه ليه ع اتصال وماما قالتله ده ادمان وانت كده مالكش امان

فضل يقولهم ينادونى طلعتله وقالى مش تضيعى كل حاجه فى لحظه غضب انا حمسح كل ده ومسح ايميلات خطيبته الاولانيه قلتله لحظه غضب كل ده لحظه غضب وقلتله احنا ماننفعش لبعض قالى لا ننفع لبعض قلتله انا غلطانه انى حطيتك لوحدك فى قلبى وانت حاططنى وسط لسته البنات بتوعك قالى ده اخر كلام انتهينا خلاص قلتله اه خلاص قالى طيب ومشى

ومشى لما نزل طلب ماما قالها انا جيت وكنت ناوى نفتح صفحهع جديده بس هى مش عايزه ماما قالتله هى مش عايزه ايه هى بنتى تستحمل ايه ولا ايه وانت بتعمل كل ده فيها من اولها ليه وماينفعش كل ده وخلاص كل شئ انتهى ع كده وقفلوا

بعدها لقيته باعتلى رساله يقولى اهو الاثبات ع قناة فى التلفزيون بيتكلموا ان النت فاصل وفى مشكله وانا طبعا ولاعبرته ولا حعبره
هو فاكرنى ايه لعبه انا حموت بموت فعلا من جوايا ده الانسان اللى كان باينلى برئ اوى ومفيش زيه كنت مستعده استحمل كل حاجه علشانه كان هو بس كفايه عليا والله دنا يوم ماكلمته بقسوة فضلت مأنبه نفسى بعدها انى كنت قاسيه معاه كل اللى بعمله ده وهو بيكلم بنات وعرفت وقلت عادى غلطه واسامح وانسى بعد كل ده الاقيه لسه محتفظ بكل حاجه لخطيبته السابقه وهو كان بيحبها اوى ع ماسمعت زى مافالى انه حبنى اوى وعمره ماحي غيرى الحب ده وانه يموت من غيرى وانه كان بيحبنى من زمان بس كان حاسس انى بعيده عليه ولما وافقت لما جه خطبنى بيقولى كنت حطير من الفرحه لانى بحلم بيكى من زمان لما كان بيشوفنى وانه وانه كل ده والاقيه حاطط البنات كل واحده فى ملف وانا ضمنهم انا

حاسه انى عبيطه يمكن الواحد لو كان اتخلق من غير قلب كنت ارتحت كتير يارتنى كنت من غير قلب ولا كنت حبيته اوى وبالشكل ده كده يارتنى كنت من غير قلب ماكنتش حتوجع دلوقتى كده عارفين احساس الواحد لما عمال يتنازل يتنازل ويقول لا الانسان ده يستاهل وكويس ويلاقى الانسان ده مش احترمه حتى ياريته حتى احترمنى ده شكله مش حبنى اصلا ازاى كان قادر يقولى كلام حب واحس بيه اوى كده وهو كداب وياعالم حبنى ولا لا
بموووووووووووووووووووووووت

واللى مموتنى انى عارفه مادام بعت رساله انه حيحاول يتصل تانى وانا تعبت بجد خلاص تعبت كل ده واستحمل واستحمل وهو ايه مش حاسس بيا واخرتها الاقيه كده وباعتلى برده انى ظلماه وهو برئ كل ده هو مظلوم