انا النهارده جايه وجايبالكم اكلتين او طبقين بطريقه واحده
هما مش اكلتين يعني هما اكله واحده.......ايه الصداع ده
ندخل في الموضوع علي طول وانتوا تعرفوا ايه الحكايه
الحاجات دي عندنا في مصر اسمها حلويات عشان بس اللي مستغرب العنوان:wink:
هنبدا بعمل الكبده وطبعا انا طبعا بعمل معاها قلب الخروف المسكين خخخخخخ بنفس الطريقه
الاول بقطع الكبده الي شرايح بالطريقه دي
وطبعا التقيطع ده للكبده وللقلب
وتبقي بالشكل ده
وبعدين نيجي في طاسه كبيره ونحط معلقتين سمن ونسخنهم ونحط القلب الاول تتشوح عشر دقايق لانه بياخد وقت اكتر من الكبده وبعدين نحط الكبده معاهم ونشوحهم وبعدين نوطي النار عليها علشان تنزل ميتها وتشربها تاني ونكون حطينا ملح وفلفل اسود وكل البهارات بتاعتنا اللي بنستخدمها اي حاجه عندك حطيها مش هتقول لا
بعد تلت ساعه تقريبا نحط بصل متقطع حلقات ومعاه فلفل برضه ممكن حار وممكن بارد علي حسب مزاجك
ونكون مجهزين اربع او خمس تومات مدقوقين ودول اختياري يعني مش لازم يتحطوا للي مش بيحبوا التوم ونضيفهم عليهم
ونفضل نقلبهم مع بعض ولو حسينا انها نشفت والكبده ما استوتش نحط ربع كبايه ميه
ونسيبه خالص لحد ما يا يقرب يستوي وطبعا انا بمسكها بايدي واشوف استوت ولا لا
لما احس انها قربت اعصر عليها ليمونه وهي علي النار
واضيف حوالي 3 معالق صغيرين عسل ابيض واقلب برضه وفي خلطه توابل دي بشتريها جهازه كده من عند العطار بحب اضيفها في الاخر بس طبعا مش ضروريه
لحد ما تستوي خالص وانزلها من علي النار
وادي شكلها بعد ما استوت ونزلت من علي النار
وده شكل اقرب ليها
نسيت اقول ان ممكن في المرححله الاخيره مع الليمون يتحط بقدونس متقطع صغير قوي بيدي طعم لحو جدا بس انا ما كنش عندي بقدونس ساعتها
وبالهنا والشفا
واستنوا بقي الطبق التاني بعد ثواني
