مختصر مفيد لكل متاخره بالحمل ..

اخواتي الغاليات المتأخرات بالحمل حبيت اشرح لكم بعض الاشياء اللي كتير منا جربها عشان الحمل وكتيره الاسئله عنها ومتكرره..



المعلومات الموجوده هي من واقع تجربتي مع تأخر الحمل والموضوع كتبته حصريا لموقع عروس ولقسم المتأخرات تحديدا ..



خلينا نبدأ بأول مراحل العلاج وبأول زياره للطبيب عشان تأخر الحمل ..



ينصح بأن تكون الزياره الاولى بعد مرور عام على الزواج ..




* اول شي يقوم به الطبيب المعالج عندما تزوره المرأه هو فحص عادي وروتيني بالألترا ساوند ليطمئن على الرحم والمبيضين .











** بعد هيك ممكن يطلب الطبيب فحص للهرمونات متل البرولاكتين والتيستستيرون وغيرهما وعادة يتم هذا الفحص عن طريق اخذ عينه من الدم باليوم الثالث للدوره ..




وكذلك في فحص هرمون البروجيستيرون وهو الهرمون اللي بيبين اذا كان في تبويض خلال الدوره اولأ واذا حصل حمل أو لأ .. عاده هذا الفحص بيكون باليوم ال 21 من الدوره ..





*** اذا كان فحص الهرمونات سليم وما في اي مشاكل بيلجأ الطبيب الى الاشعه الملونه او الاشعه الصبغيه ..عشان يتأكد من سلامة قنوات فالوب انه ما فيها انسداد او التصاق.










يقوم الطبيب بعمل الاشعه الملونه بعد الانتهاء من الدوره الشهريه عن طريق حقن ماده زيتيه بتساعد على مشاهده تفاصيل الرحم وقناتي فالوب ..



كتير مرات بتساعد هالاشعه على فتح الالتصاقات اذا كانت موجوده لا سمح الله ...





**** اشي تاني غالبا معظم المتاخرات بالحمل بتستعمله هو الكلوميد او كلوموفين ..










وهو زي ما بنعرف كلنا منشط بيعمل على تنشيط المبايض وتحفيزها على انتاج بويضه او اكتر .. ويستعمل في حالات ضعف التبويض او التكيس ..



يبدأ استعماله ( بوصفه طبيه اكيد) ابتداء من اليوم التاني او التالت للدوره ولمدة خمس ايام ..ولازم يكون في متابعه للتبويض مع الطبيب المعالج ..



ممكن يحصل حمل في اول شهر لأستعمال الكلوميد في بعض الحالات ..



والحد الاقصى لأستعماله هو ست شهور اذا ما صار حمل خلالها بينتقل الطبيب الى مرحله جديده من العلاج باستخدام الابر المنشطه ..



استخدام الكلوميد بدون متابعه طبيه ممكن يعمل تكيسات لا سمح الله ..واحتمال يحدث حمل بتوأم نتيجة استعماله .





***** في حالات معينه بيعطي الطبيب المعالج للمرأه مع الكلوميد الابره التفجيريه ..



الابره التفجيريه هي ابره تؤخذ بوصفه طبيه بعد متابعه للتبويض :



بعد المنشطات بيكون صار في بويضه او اكتر بحجم مناسب للتلقيح ..الابره التفجيريه تساعد البويضه على الخروج من الحويصله المحيطه بها وبالتالي تلقيحها بأذن الله .. يحدث التبويض بعد 32 الى 36 ساعه من أخذ الابره وبالتالي يتم اللقاء بين الزوجين بعد هذا الوقت حتى يتم تلقيح البويضه بأذن الله .



ومن الأسماء التجاريه للابره التفجيريه البريجنيل او اوفيتريل


Pregnyl – ovitrelle









****** اذا كان التبويض ضعيف وما مشي الحال مع الكلوميد لتنشيط المبايض وبعد ست شهور من العلاج به ممكن يوصف الطبيب الابر المنشطه كمرحله جديده للعلاج ...




الابر المنشطه متل الجونال اف او المونوجون او انواع تانيه (بتختلف الاسماء التجاريه من منطقه للتانيه)..



العلاج بالأبر المنشطه بيكون فعال اكتر من الحبوب وامكانية تكون اكتر من بويضه اكبر... وبالتالي احتمال الحمل بتوأم بيرتفع ..



اكيد لازم يكون في متابعة تبويض مع الطبيب المعالج بفترة العلاج بالأبر.. بيحدد الطبيب خلال هالفتره الوقت اللي تؤخذ فيه الابره التفجيريه ومتى يكون اللقاء بين الزوجين ..




******* عادة اذا فشل العلاج بالأبر المنشطه وما صار حمل بعد ست شهور من استعمالها بينتقل الطبيب لمرحله جديده بالعلاج وهي التلقيح الصناعي ..




يتم عمل التلقيح الصناعي من اربع الى ست مرات واحتمال نجاح العمليه بيرتفع كل مره ...


بحالات كثيره بتنجح العمليه من اول مره وممكن تفشل حتى بعد اربع او ست مرات .. كل شي بأمر الله ...




******** اذا ما نجحت عملية التلقيح الصناعي بعد عدة محاولات بيوصل الطبيب لأخر مرحله بالعلاج وهي اطفال الانابيب او الحقن المجهري ..




وان شاء الله بموضوع تاني بشرح تجربتي معهم بالتفصيل ..



طبعا قبل القيام بكل الخطوات السابقه بيكون الزوج عمل فحص للسائل المنوي عشان يعرف الطبيب حالة الزوج واذا عنده مشكله او لأ ..




بتمنى اني اكون وصلت لكم المعلومه بطريقه مبسطه وسهله ..




مع دعائي الى الله العلي القدير ان يرزق كل اخت لي بالقسم الذريه الصالحه والحمل السليم المعافى عاجل غير اجل ..




ما تنسوني من صالح دعواتكم ..
الصور مجمعه من اكتر من موقع بالانترنت ..
والموضوع مجهود شخصي يرجى ذكر المصدر عند نقله