الحمدلله ,, ولدت وافتكيت من الثقل

مساء الحب يابنات
طول فتره حملي وانا اقرى قصص ولاداتكم واقول ان شاء الله لما اولد راح اكتب القصه
الله يسلمكم انا موعدي تاريخ 16-12
ومستانسه على روحي ان موعدي بعيد وماكنت متوقعه ابدا اولد قبل ,, حتى اني قبل يومين بس من ولادتي جهزت شنطه المستشفى
في يوم4-12 كان زوجي مسافر عنده اجتماع لمده يوم واحد في الكويت وكان راح يرجع بالليل,, قبل لا يروح المطار قالي وهو يضحك اسومه تحملي تولدين اليوم ,, قلت له لاتخاف تو الناس ....
الساعه 10 ونص كنت قايمه من النوم واشوف ماي ,, مادري شنو السالفه وماكان في اي الم
تفطرت وقعدت على النت وغسلت الثياب ونشرتهم خخخخ وكان فيني الم يروح وايي
بعدين الالم زاااااااد وصار شي فظيع قمت اناقز وانا منبطحه ههههه اتصلت في زوجي على باله كالعاده اتدلع بس يوم شاف صوتي قال لي نزلي تحت حق امي خلها تتصرف لان شقتي فوق بيت عمي ,,
انا قلت مابنزل واخرع عمتي عالفاضي خلني اروح اخذ لي دش ساخن لاني سمعت انه يفيد وقت الطلق ,, وانا اتسبح ياني الالم وحسيت اني بموت ومره وحده رجعت ,, الالم كان يجي كل نص ساعه وانا مادري ان هذا طلق على بالي الم عادي ....
شنو اوصفه لكم الم يصير مثل الشد في اسفل البطن والظهر مايخلي الوحده تقدر تتحرك او تسوي شي ,, الله يساعد امي مسكينه يوم ولدت فينا انا وخواتي ....
يوم زاد الالم نزلت تحت لعمتي وشافت ويهي تخرعت قامت سوت لي زعفران وماي ورد وقالت لي اذا هذا طلق راح يتعدل لج واذا مو طلق بيروح الالم ,,, شربت الزعفران من جهه وقمت اعفر من الالم من جهه ثانيه وكان مافي احد في البيت وعمي طالع وفي منطقه بعيده ,, قامت حماتي قالت انا بوديج ورحنا المستشفى وانا كنت متأكده انها مو ولاده ...
في المستشفى زاد الالم عن حده والممرضه تقول لي انتي يبي لج 24 ساعه ليما تولدين ,,, مره وحده رجعت للمره الثانيه يوم شافتني رجعت خافت وقال لي خلني اشيك لج كم سانتي ,,,
طلعت 6 سانتي زفتني زف وقالت لي انتي من متى فيج الالم قلت لها من الصبح هاوشتني لاني ما رحت الا جريب المغرب وتحملت الالم وانا في البيت مع اني حسيت اني بموت بس انا من طبعي صبوره احم احم ...
على طول اتصلت في الدكتوره الي كانت في اجازه وقامو الممرضات يحومون ومو عارفين شنو يسوون وكل ساعه يدخلون لي طاوله عليها مشارط واداوت للولاده وفوط ومادري شنو ,, وصلو امي وخواتي وانا كنت محتاجه زوجي في هالوقت واتصلت فيه وانا اصيح وقلت له بولد اهئ اهئ اهئ ,, قال لي انا الحين في المطار ويبي لي ساعتين على ما اوصل البحرين وايي لج المستشفى...
يات الدكتوره وشيكتني وتمت يمي ,, صج دكتوره حنونه جدا , اسمها فرح في مستشفى البحرين التخصصي انا ما اسوي لها دعايه لكن وايد بنات متخوفين منها ووايد يطلع عليها كلام انها ماعندها ذمه ومادري شنو انا اقولكم ومني الضمان اخلاقها رووووعه وهي تولدني كانت حنونه علي مثل امي تسمي علي وشغلت لي سوره مريم وانا اولد ..
طبعا الولاده مايحتاج اقولكم شنو استغفر الله حسيت روحي بمووووت ,, الهوا يخلص والصبر يخلص وكل شي يخلص ههههههه
وانا اولد حسيت راسي واطرافي تنمل وكأني في غيبوبه شعور ياربي ما اقدر اوصفه بس صج الجنه تحت اقدام الامهات ...
بعد معاناه مريره ولدت وشفت ولدي بردااااااان ويرجف لونه ازرق على بنفسجي وخشمه شكبره وعيونه منفخه وبراطمه طايحين هههههههههه
خذوه ونظفوه وعطوني اياه على صدري شعور غريب ما اقول الا الله يرزق كل محرومه يااااارب بحق هالايام الفضيله ....
رجع زوجي من الكويت وانا ولدت ,, سافر من البحرين بدون عيال ورجع وعنده ولد هههههه
طبعا ولدي صياح مجنني يصيح 24 ساعه ويطنه كله يعوره واول فرصه صارت لي دخلت قلت لكم قصتي ....
ادعولي يروح مني الام الولاده لاني حتى ظهري ما اقدر احركه وادعو لي الله يهدي ولدي ويحفظه لي ........
اي سؤال عن المستشفى او الدكتوره انا حاضره يابنات :15::15::15: