تكلمنا عن كل شي الا الحية بية

عذاري... 06-12-2008 51 رد 5,041 مشاهدة
ع
قبل ايام جا على بالي اني جهزت كل ملابس بنتي للعيد

لكني نسيت شي مهم....

الحية بية

صح انها عادة تراثية قديمة

وصح ان لما كنت صغيرة ما كنا نحتفل فيها

ما ادري ليش :o

يمكن لان ابوي مو خليجي اصلا فما كانت امي تهتم بهالعادة معانا وايد

لكني كنت احبها

واحب اشوف يهال الفريج ياخذونها في بيوتهم لحين ما يقرب يوم العيد حتى يرمونها في البحر

بتسالون : شنو هذي الحية بية؟؟؟

اهيا سلة صغيرونة من الخوص كانوا قبل يسوونها في البيوت ويزرعون فيها نبت اخضر ليما يكبر، وفي يوم الوقفة وبالتحديد في ليلة عيد الاضحى ياخذ اليهال الحية بية ويروحون البحر ويرمونها هناك وهم يغنون:

حية بية
راحت حية
ويات حية
على درب لحنينية
عشّيناك
وغدّيناك
قطّيناك
لا تدعين عليّ
حلليني يا حيتي
وابري ذمتي
مع السلامة يا حيتي


عن جد كنت اتمنى ان امي تنتبه لنا لو سنة وحدة من السنين وتخلينا نسوي الحية بية بس للاسف ما صار هذا الشي ولا باي سنة من السنوات

والحين لما كبرت وولدت بنتي نجد لحيت على ابوها الا يشتري لها الحية بية

ومع انه هو الثاني ما يعرف شنو اهيا لانه هم مو خليجي لكني شرحتها له وراح شراها

وهني بتشوفون صورتها فوق راس نجودة





واليوم الصبح راح زوجي البحر ولقاها مرمية عند الساحل" الظاهر الناس غيروا عادتهم وصاروا يرمونها قبل العيد"


هذي الصور








واخيرا هذي العادة شفتها في البحرين وما اعرف اذا كانت موجودة في بلدان الخليج الثانية او لا




الموضوع جهد شخصي ولا احلل اي شخص ينقله دون ذكر المصدر
أ
تسلمين خيوووو ،،،،موضوع يجزى عليه ،،، والله يعودك بكل خير وسلاااامتصدقين نبهتينني مع اني ناسيه ،،، على قولة اخوانا الكويتيييين
ر
موجودة عندنا في بعض القرى بس تسميتها غير
يسمونها الدوخله..
ر
ما سمعت عنها لكن حركه حلوه

يعطيك العافيه ع المجهود
ا
مشكوره عزيزتي على الموضوع

الصراحه هالمره نسينا نشتري حق اليهال واحنا كنا نوديهم قبل العيد بيوم
ر
ما شاء الله

اليوم شرينا للأطفال
وأحنا عادتنا نرميهم في البحر يو ثاني العيد

أم نجد..
تسلمين عالموضوع الحلو :)
بنتي ودوهم الروضة يوم الخميس البحر
عشان يرمون الحية بية أو مثل مانسميها (الضحية)
*
تسلمين حبيبتي

انا مو بحرينيه .. اني من المنطقه الشرقيه من السعوديه ،،، بس سمعت امي وكانت تقول انها تسويها بس ماكانو يشترونها اول،،
تقول كنا قبل العيد نجيب قوطي فاصوليا ولا اي قوطي ويحطو فيه رمل وشعير ويخلونها تنبت ،، ويسمونها (سعنه)
وكانو لين جو يقطونها يغنو (اسفه امي في الحج واتصلت لها عشان اخذ تفاصيل اكثر بس ماردت)

بس جد العادات التراثيه حلوه مره وحلاتها انها تتمرر حق اطفالنا وحرام تندثر
ا
الحية بية موجود ه في البحرين وهي اني الضحية يرمونها بما بمعني اه علشان توصل للحجاج بيت الله في مكة وهم سنة الجاية يروحون مكة اعتقد هذا معني الحية بيه واحنا كنا قبل نزرع الحية بية بس الناس الحين تشتريها
ع
استفدت من معلوماتكم اكثر

شكرا على الافادة
ض
مدري لها أصل او لا !

لا يكون بدعة والا حاجة معناها مو كويس : )


تحياتي للجميع وكل عام وانتوو بخير
ع
ضي الدنــا;8001166:
مدري لها أصل او لا !

لا يكون بدعة والا حاجة معناها مو كويس : )


تحياتي للجميع وكل عام وانتوو بخير



عزيزتي هذا تراث مو شي احنا استحدثناه
ت
السلام عليكم
أعتقد ان اكثر دوله عند عاده الحيه بيه أو ما تسمى بالضحيه هي البحرين وهي مو بدعه هي عاده توارثتها الاجيال

وعندي لكم نبذه عن الحيه بيه في البحرين

الحية بية" عبارة عن قفة صغيرة الحجم او زبيل صغير جدا يصنعها القرويون من صناع السلال او بعض النسوة في القرى المشهورة بصناعة الحصر والقفف والجفران من خوص سعف النخيل، ويضعون فيه بعض التراب وبعض المخصبات الطبيعية كروث البقر مثلا ويزرعونها ببعض انواع الحبوب كالقمح والشعير وبعض العدسيات كـ "الماش" وتعلق بحبل على عمود مستعرض في المنزل كأن يكون "دنجلة" تصل بين عمودين في ليوان او مطبخ او ممر او عريش او مدخل، ويكون ذلك في منتصف شهر ذي القعدة حيث يتعهد الاطفال بسقاية "الحية بية" كل يوم صباحا ومساء حتى تظهر فيها النباتات وترتفع، يتفاخر الاطفال فيما بينهم بنمو "حياتهم" وحسن تعهدهم لها.
وفي يوم الوقفة وبالتحديد في اليوم التاسع من ذي الحجة وهو اليوم الذي يتجه فيه حجاج بيت الله الحرام بمكة المكرمة إلى جبل الرحمة »جبل عرفات« حيث يقفون على صعيده ملبين مهللين يتضرعون إلى خالقهم طالبين الرحمة والمغفرة، وفي المساء وعندما تطلق اصوات المدافع في البحرين معلنة يوم العيد الكبير يخرج الاطفال من بيوتهم اولادا وبنات برفقة اولياء امورهم متوجهين فرحين إلى "سيف البحر" ويبدأون في مراسيم تقليد قديم ومعتقد ساد طويلا حيث يتجمع الاطفال في مجموعات تصغر وتكبر حسب الحي والمنطقة وقربها من البحر او بعدها عنه ويبدأون في ارجحة "حياتهم" منشدين :

حية بية
راحت حية
ويات حية
على درب لحنينية
عشّيناك
وغدّيناك
قطّيناك
لا تدعين عليّ
حلليني يا حيتي
وابري ذمتي
مع السلامة يا حيتي


ج
هذا ردي اللعام في نفس هالوقت وعن نفس الموضوع

جمـــانة;4826349:
أطفالي في البحر اثناء رمي الحية بية

ولبسهم هذا مخصوص للصبح ,,, وعشان رمي الاضاحي



الشمس في عيونهم مساكين مو متعودين على قعدة الصبح هههههه

وزنوب تجنننننننن تمشي جنها بطة وهي ماسكة الحية بية مالتها
ج
يسمونها الحية بية، الاضحية ،الحيية ( الحجية )

وهي عادة اما تكون ماش او شعير... ( لسرعة انباتهم )

هي شيء رمزي يرمز للاضاحي اللي يذبحونها الحجاج في الحج، وعادة يقوم الطفل على زرعها قبل العيد بفترة معينة من تجميع للسماد ووضع البذور وري الاضحية بالماء يومياً حتى تنبت بالشكل الذي ترونه،
ويوم العيد صباحاً يقوم الاطفال بـ (التضحية ) بها عن طريق رميها في البحر لتأكلها الاسماك، مع ترديد بعض الاهازيج الشعبية مثل اللي ذكرتها فوطة، وغيرها ( بس انا ذاكرتي مييييح ناسيتهم والله )

حجيتي حجية..
وديتك للبحرية..
اكلتك الشعرية..

حجيتي حجيتي
حجي بي حجي بي
لمكة ..... <<<< نست الباقي ههههههه


وانا كنت افكر الخليج كله عنده هالعادة الشعبية وخصوصا السعودية وقطر لأنهم جريبين منا.. توني مكتشفة انه احنا بس اللي موجودة عندنا ...




وهذي صور عيالي بواسطة مصور الاستوديو


وكل عام وانتو بخير...
م
اللاااااااااااااي احب الحية بية :D


امي الحمدلله ما قصرت الين وصلت الاعدادي وهي تحسب حسابي وتسوي لي حية بية مع اخواني الصغار ههههههههههههههههههه وكانت هي اللي تسويهم في البيت واحنا يوميا نسقيهم ماي اتذكر كل يوم نرجع من المدرسة ونبدل ونررررركض ع الحية بية ههههههههه نعطيها ماي ونتأملها واللي تكبر مالته بسرعة يتباهى اكثر خخخخخ

والحمدلله تمسكت بهالعادة بعد ما كبرت وصار عندي عيال .. والسنة كانت في بالي من زمان لكني تأخرت على ما اشتريتها ، كنت ابغي اشتري لهم على ماش لكني ماحصلت ويوم يأست اشتريت لهم على شعير من يومين والحين اخلي عيالي يسقونها وهو حابينها ومستانسين عليها عدل :)


واحنا عادةً نرميها يوم العيد الصبح واذا صادنا ظرف معين ممكن نأجلها لثاني ايام العيد الصبح :cool:



وكل سنة وانتوا سالمين يا رب :wink:
r
فكرة حلوة يا ريت سمعنا عنها قبل و خلينا أولادنا يسووها
تسلمي حبيبتي و يعطيك العافيه
b
الحية بية منتشرة واااااااااااااايد عندنا في البحرين وهذا تراث قديم بس ماسويت لبنتي للحين احس ماتفهم مع انه عمرها سنتين واختي سوت لنتها وقالت لي قلت لها مو فاضة خخخ ةالحين صار خاطري
k
حركه حلوه بس ماهي عندنا
ح
مشكووووووووووووورة ام نجد على هالموضوع الرائع

بصراحة كنت افكر اني انزله بس على قولة المصريين عمرك اطول من عمري
و على العموم رجعتون لي ذكريات زمان،،، عمري ما قطيت الحية بية أو مثل ما نسميها في ديرتنا الضحية مع أن ديرتنا يم سيف البحر بس للأمانة عاذرة الوالدة الله يرحمها يعني كانت بتيود من و بتخلي من :think:مو أحنا كنا قبيلة ما شاء الله :groupwave:

و مشكورين الاخوات اللي ذكروا سبب هذي العادة و وضحوا لي شخصيا الصورة ما كنت اعرف ليش الحية بية و ليش يقطونها بحر ،،، مرة سألتني بنت أختي ليش؟؟؟؟؟؟ و كان عمرها حوالي 9 سنوات وما لقيت اجابة الا اني اقول لها عشان تتعلمون تسوون خير و تقطونه بحر......:D_smil1:

و طبعا اللي صاير ان الناس تشتريها بس من رايي احسن لو نزرعها في البيت عشان الطفل يتعلم شلون يزرع و يتعلم يعتني بالنبتة و يكون مسئول عنها،، بس في نفس الوقت ممكن يتعلق بها و ما يحب يقطها في البحر تحت اي عذر .. و ما ادري عن رايكم يا أخوات
ع
انحنا من يوم صغار امي الله يحفظها تسويها لنا ونقعد قبلها بجم يوم نعطيها ماء واكل ويوم العيد الصبح نقطها في البحر والحين امي اشترت حق ولدي وحده مع اخواني الصغار ان شاءالله يوم العيد او يوم ثاني نوديهم يقطونها

تسلمين ام نجد على فتح الموضوع
X