ازيكم يابنانيييييييت
جبتلكم النهارده طريقة أكلة مصرية شهيرة :)
ام علي...
هي كانت اول مرة اجربها
واخر مرة هههههههههههههههههه
بهزر طبعا هي الحمد لله ظبطت بس المشكلة انا اصلا ماباكلهاش ههههههههههه
يارب تعجبكم
المكونات سهله خااااااالص
لفة جلاش
لتر لبن
مكسرات...انا حطيت جوز هند وبندق وسوداني وزبيب
والكمية حسب الرغبة
السكر..وانا حليتها كمان بعسل...وبردو حليها زي ماتحبي
قشطه
الطريقة
اول حاجه بنجيب الجلاش...بنسيبه يفك شوية
وبعدين نقطعه مربعات كدا مش كبيرة ومش فرافيت يعني
وبعدين نجيب صينيه ونحطه فيها ونحطه ف الفرن
ونولع عليه من تحت ونهدي النار خالص...بحيث ان الجلاش ينشف
هنا بقى في مذهبين..الاول بيقول اننا ناخد الجلاش المحمص ونحمره ف زبدة
وده انا ماعملتوش عشان الدايت :)
والمذهب التاني بيقول اننا نقوم طافيين النار من تحت ومولعين من فوق بس طبعا نخلي بالنا عشان مايتلسعش
ونقلب الجلاش كل شوية بحيث يتحمر
وبعدين بنكون محضرين اللبن ومغلي وسخن...نحلي اللبن كويس لان مش هنعرف نحليه بعد مايتحط عليها
فبنحليه مقدما
نجيب بقى الصينيه..نحط نص كمية الجلاش فيها من تحت
ونحط عليها المكسرات
وبعدين نغطيها ببقية الجلاش
نصب عليها حوالي نص كمية اللبن ونسيبها شوية تتشربه
وبعدين نصب بقية اللبن ونحط على الوش القشطة
ونحطها ف الفرن لحد ما الوش يتحمر
وده الشكل النهائي :):)
وبالهنا والشفا
