موقف بسببه كانت بتموت أختي

جلست أنا وأختي نتذكر المواقف المضحكه الي صارت لنا <<<< جان تموتني من الضحك على موقفها
اقرؤه وأبي اسمع تعليقاتكم....... الموقف كالتالي

في الجامعه ..

وصلــت متأخره الجامعه كان باقي عشر دقايق على المحاضره ..

المهم وصلت المبنى .. دخلت .. رحت صوب اللفت لأن المحاضره فوق..

لقيت بنتين ماعرفهم قاعدين على الكرسي اللي مقابل اللفت .. سلمت..

وردوا السلا م ..دخلت في اللفت..
قبل لايتسكر باب اللفت كانوا البنات يطالعوني ..
اكيد كاشخه وشحلاتي ..
مايحتاج اوصف لكم شكل البنت في الجامعه..

عطيتهم ابتسامه تسكر اللفت وانا لين الحين مبتسمه ..

ضغطت على الزر رقم 2 ..!! << لين الحين مبتسمه .

تأخر اللفت شسالفه .. احس انه ماتحرك ..

ضغطت مره ثانيه ,,<< وكملت ابتسامتي..

ماتحرك !! شسالفه امبيييه .. << انطفأت الابتسامه .

فيه فتحه صغييييره في اللفت اشوف منها النور ..

طليت من الفتحه !! قعدت اصوٌت .. على اساس فيه بنات برا.

بكل نعومه ناديت : بنـــــات .. بنــــــــات .. بنـــــــــــــات << فيها نوع من الدلع..

طق طق طق << ادق الباب بكل نعومه ..

في هاللحظات كان قلبي يدق بسررررررعه ..

حاولت اضغط على الأزرار مره ثانيه .. مافيه فايده ..

شفايفي اللي تحت ترتجف << طبعا تعرفون شلون ترتجف بداية بكاء ..

بعدين شفت السالفه طولت .. صرخت بنااااااااااااااااات << وقف الدلع ..

طـــــق طــــــــق طــــــــــق << بكل قوتي يدي صارت حمرا بعد.

لاحيــــاة لمــن تنــادي ..!!

طــــــــــــــــــــــــق طـــــــــــــــــق طــــــــــــــق .. بنااااااااااااااااااات .<< بصوت مافيه ذرة انوثه.

وابكي واصارخ بناااااااات اهي اهي اهي بناااااااااات ااااااه ياراسي << ابي اكسر خاطرهم.

بعدين تذكرت تلفوني واطلعه من الشنطه بسرعه
مادري ليش في هاللحظه مافي بالي
الا رقم 999 الشرطه << مادري شدخلهم ..

واخذ الموبايل لقيته خارج التغطيه . واقعد ابكي زيااااده وزيااااده ومحد سمعني ..
مرت 4 دقايق وانا داخل اللفت ومحد درى عني ..

وانا ابكي طبعا في بالي اني بموت خلاص .. وبكيت بكيه قدييييييييمه اخر مره بكيتها يوم كان عمري 9 سنوات ..
اللي هي وانا ابكي اقول يايييييمممممممممااااااااه << يايمه مع اللحن ..

بعدين اخذ نفس عميييييق واكمل.. ياييييممممممممممممماااااااه .. << مع نفس اللحن.

فقدت الأمل اني اعيش وارفع يدي للسماء وادعي يارب
تسامحني..يارب تسامحني ..
ياربي انا اسفه سامحني على كل شي ..

وقررت اصلي ركعتين وداع للدنيا ..

قبل لاصلي شفت تلفون معلق في اللفت نفسه .. واحذف الشنطه على صوب وامسك التلفون..
اول ماشليت السماعه رن تلقائيا ..
وعلى طول طلع هندي..

هلوووو << هذا الهندي راااايق حده ياحظه .

قلت الو الوووووو الوووووووووو << كأني هنديه مكلمه اهلها ..

قالي شنو فيه شوي شوي كلام ..

انا بهاللحظه شفتوا الياهل اللي امه اول مره تهاوشه في حياتها

شلون يصيح ومايعرف يقول كلمتين على بعضها ..

قلت رفيق انا انا انا انا انا انا في في مووت .. انا انا انا من
زما ا ا ا ان داخل لفت . << اصيح واتكلم مع بعض..

قالي وين مبنى ..

قلت له اسم المبنى .. قال صبر شوي 5 دقيقه يجي..

قلتتتتتت لاااااااااا رفيق 5 دقيقه واااااايد انا مايقدر ..

قالي صبر صبر الهين يجي.. << الهين يعني الحين.

قلت انزين واصك السماعه ..

بعد ثانيتين بالضبط شليت السماعه مره ثانيه ..

وطلع لي نفس الهندي ..

قلت انت لين الحين في موجود انا في موووت واصيح واصارخ عليه..

قال . صبر انا كلام نفر خلاص نفر يروح .. الحين يجي .

قلت زين واصك السماعه ..

بعد ثانيه ونص شليت السماعه رفييييق انا في موووت مافي حد يجي..

بعدين بينت له ان انا حاسه بضيق تنفس واقعد اتنفس بصعوبه

واقول له رفيق مافي هوا انا مووت والله مووت انا يبي يشوف

ماما . رفييق انا موووت ..

قالي لايسوي كذاب فيه مروحه << انحرجت ..

انا مرييضه من زمان ..مروحه مافي فايده قال صبر صبر الهييييين يجي لايسوي خوف..

توني اتناقش معاه وصلت فرقة الانقاذ صكيت السماعه بوجهه..

وفتحوا لي اللفت عشر طعش هندي ..
انا من وانا صغيره فيني عقده من الهنودوالباكستانيين
بس هالمره الهنود والباكستانيين احسن من لفت خربان ..

واطلع لهم ابكي عكس الشكل اللي دخلت فيه وووبس ويتجمعون علي بنات..

فشيله اول مره ابكي قدام الناس .. عمري ماسويتها ..

وووبس .. نصيحه لاتركبون لفت الا معاكم حد على الأقل اذا خرب عليكم فيه حد تسولفون معاه .. خخخخخخ.

حبيت اضحكم معانا شرايكم في موقفها