السلام عليكم
أقدم بين أيديكم قصة ولادتي بحبيبتي وأميرتي ابنتي الغالية
(ملاحظة: قصة ولادتي طويلة وأنا حابة أذكر تفاصيلها علشان تعيشون اللحظات مثل ما عشتها )
بدأ المشوار يوم الخميس بتاريخ 6/11 اللي كان آخر موعد لي مع دكتورتي وآخر مهلة أعطتني إياها للولادة لأن أنا عندي سكر حمل بالإضافة أن المشيمة صار فيها تكلس وبدت تشيخ وقالت إذا ما ولدت لهذا الموعد راح تحولني للطلق الصناعي في هذا الموعد فحصت الدكتورة عنق الرحم عندي وشافت إنه فاتح 2 سم وقالت لي احتمال كبير إن تجيني آلام طلق وأولد في نفس الليلة لأن كل شيء مهيأ عندي وإذا ما صار هالشي اروح للطلق الصناعي يوم ثاني .. بعد هالكلام أنا تحمست وانطلقت للمشي طبعاً بعد الفحص نزل علي دم وصار عندي ألم خفيف وبعد المشي زاد الدم والألم بس لما رجعت البيت وارتحت خف الألم علي ورغم محاولاتي عن طريق شرب الدارسين والزعفران إلا أن الألم ما زاد .. يوم ثاني اللي هو يوم الجمعة لاحظت نزول الدم ممزوج بمخاط لونه يميل للأخضر وكان المفروض اروح للطلق الصناعي في هاليوم بس أنا قلت راح أعطي نفسي مهلة أكثر وعدا يوم الجمعة وجاء يوم السبت 8/11 واتخذت قراري إني أروح للطلق الصناعي بعد صلاة المغرب بعد ارتياحي إنه الخيار الأنسب وهذا اللي صار .. في المستشفى تم ترقيدي على أساس يحطون لي الطلق يوم ثاني الصبح ليلتها ما قدرت أنام جلست أقرا قرآن وأكلم زوجي في التلفون .. صباح يوم الأحد 9/11 تم تجهيزي للطلق الصناعي اللي حطوه لي على الساعة 10 ونص والمفروض إني ما اتحرك لمدة ساعتين وأنا على السرير بديت أحس بالآلام تجي وتروح وبعد انقضاء الساعتين كان عندي ألم منتظم يجي كل 5 دقايق تقريباً وبعدها صار يتقارب أكثر لما شافت الممرضة وضعي مع الألم قالت بتفحصني بس أنا قلت لها تصبر علي شوي وبعد الغذاء رجعت لي مرة ثانية وأصرت إنها تفحصني لأن الألم كان متقارب وبعد الفحص قالت لي لازم ندخلش الولادة الحين سألتها كم فاتح عندي قالت 3 سم يعني توسع والألم عندي منتظم ومتقارب واتصلت خبرت زوجي اللي استانس (على باله بولد على طول) وخبر الكل .. دخلت الولادة الساعة 2 ظهراً وكانت غرف الولادة مليانة ما شاء الله ودخلوني غرفة مع وحدة ثانية أنا انصدمت في البداية المسكينة كانت بكر نفسي ومطولة وكنت أشوف معاناتها مع الألم وصراخها بين فترة وفترة .. بعد ما ركبوا علي الأجهزة استمر عندي الألم على نفس الوتيرة وبعد حوالي ساعة دخلوا لي أختي وقمت أصيح عندها وأقولها شالسالفة يعني أنا متى بولد (بكر وما تدري بالدنيا) وهي تحاول تهديني واطمني وظليت أتألم وادعي ربي يسهل علي وعلى اللي معاي .. أنا وضعي استمر مثل ما هو لبعد صلاة المغرب واللي معاي توسع عندها الرحم لـ8سم وزاد صراخها وأنا زاد توتري وبكائي ووسط هذه المعاناة ولدت زميلتي في الغرفة وأنا خف ألم الطلق عندي والممرضات شالوا عني التخطيط وخلوني أدخل الحمام وقمت أتمشى بين ممرات غرف الولادة وأطالع المواليد الجدد وطلبت الاتصال بزوجي وأختي اللي دخلوا لي على الساعة 9ونص ليلاً وزوجي طاح تصوير فيني وأنا أقوله صدق إنك فاضي ومو داري باللي فيني .. بعد ما رجعت لغرفتي جلست أسولف مع الممرضة المناوبة وجابوا لي عشا تعشيت وفي هالأثناء كان الهدوء يعم غرف الولادة (الكل ولد وخلص إلا أنا) وحطوا علي التخطيط مرة ثانية وتقريباً الألم اختفى مني وطلبت يشيلون عني الجهاز والممرضة قالت لي حاولي تنامين وترتاحين علشان وقت الولادة يكون عندج طاقة وبين غفواتي البسيطة صرت أسمع أصوات الصرخات في الغرف الثانية وكانت الساعة حوالي 1 ونص بعد منتصف الليل كان في وحدة تصرخ وتطالب إن يسوونها عملية قيصرية ما تبغي تولد طبيعي بسبب الألم اللي تحس فيه والدكتورة تقولها إنتي بتولدين خلاص شلون أسويج عملية!! أنا هني نفسيتي ما قدرت تتحمل أكثر وصرت أبكي بطريقة هستيرية ولما مرت علي الممرضة وشافت وضعي صارت تكلمني وتهديني بس أنا تعبت من طول الوقت والصراخ اللي اسمعه وفي نفس الوقت آلامي اختفت تقريباً قلت لها أنا ما أبغي أظل هني ما عندي ألم ليش خاليني في هالعذاب طلعوني أبغي أروح البيت .. الممرضة صارت تقولي إن شاء الله بس بنخلي عليج التخطيط ونشوف وضعج وبعدين ممكن نرجعش الجناح (تاخذني على قد عقلي) وطلعت تضحك علي عند باقي الممرضات بعد فترة جت لي الدكتورة وشافت التخطيط وصارت تقول لي إنتي ما يهمج من اللي يصارخون لا تسوين مثلهم بس أنا نفسيتي كانت جداً تعبانة قلت لها إي أنا علي من نفسي ولأن ما عندي ألم أبغاكم تتصلون لزوجي علشان أرجع البيت وصارت تقول لي ما يخالف بنرجعش الجناح (ما ليهم إلا يقصون علي) .. في هالأثناء كان الصراخ مستمر في الغرفة الثانية وجميع ستاف الممرضات التموا على زميلتنا اللي كانت مصرة على العملية ما كانت تستجيب لأحد و لا تحاول تساعد نفسها عن طريق الدفع الدكتورة عصبت عليها والممرضات صاروا يقرون عليها ولكم أن تتصورون حالتي وأنا أسمع كل هذا وبعد معاناة وتلف أعصاب ولدت الزميلة وأنا ارتحت وكأن أنا اللي ولدت وجت الممرضة تبشرني بولادتها خخخخخ .. في هالوقت جابوا مريضة ثانية معاي في الغرفة وأنا عطوني إبرة ترخي العضلات وتساعد على الولادة ورحت في شبه غيبوبة ما أدري عن اللي حولي بس اوتعيت على صرخات زميلتي والممرضات حواليها يساعدونها على الولادة وولدت قبلي وهني الممرضات التفتوا لي وقالوا فلانة الدور جاي عليج (جاك الموت يا تارك الصلاة) وأنا ما عاد عندي طاقة من التعب والابرة المنومة قلت لهم إنتوا شتقولون شلون تولدوني أنا ما عندي طاقة للولادة وغبت عن الوعي مرة ثانية وما التفت إلا الكل حوالي فحصوني وبعدين دخلوا لي شي مثل السيم وصار الماي ينزل مني (فتحوا كيس الماي) ولأن مثانتي كانت مليانة فرغوها لي وأنا صرت أصرخ مع كل هذا وبعد دقايق جتني الآلام القوية وزاد صراخي والممرضة تطلب مني إن آخذ نفس وتقول لي منساعة كنتين تصيحين ما عندج ألم والحين صرتين تسوين مثل غيرج .. كنت لما يجيني الألم أصرخ وأخربط في الكلام وأدفع لفترة بسيطة لأن ما عندي طاقة للدفع ولما يروح الألم تغط عيني مرة ثانية بعدين حاولت أركز كل الطاقة اللي عندي في الدفع وأدعي ربي بالسهالة وعلى رابع دفعة ما حسيت إلا الآلام اختفت وشي طالع مني وحاطينه علي صرت اصيح مو مستوعبة أقولهم يعني هذي بنتي !! معقولة !! وهي واعلي صوت صياحها كان كلش ضعيف تعبت معاي
وهذا اللي كان شرفت أميرتي على الساعة 7 ونص من صباح يوم الاثنين 10/11 بعد معاناة 17 ساعة ونص في غرفة الولادة،، الله يحفظها ويجعلها من الصالحين الأتقياء (على اسمها تقى) ويرزق كل من يتمنى الذرية.
وكان يوم الملتقى بأميرتي الصغيرة تقى
ح
17-11-2008 | 02:40 PM
ا
17-11-2008 | 02:49 PM
الف الحمدلله على سلامتج وسلامتها..
وتتربى في عزج تقى..
وادعي لي بالولاده السهله..:)
وتتربى في عزج تقى..
وادعي لي بالولاده السهله..:)
j
17-11-2008 | 02:49 PM
ألف ألف مبرووووووك ... والله ياقرنفولة أقرأ قصتك وأصيح دخلت جووووو
الحمدلله على سلامتك وسلامة تقى والله يحفظها لك ان شاءالله
وعقبااااااااااااااااااااااال ماأكتب لكم قصة ولادتي ..
الحمدلله على سلامتك وسلامة تقى والله يحفظها لك ان شاءالله
وعقبااااااااااااااااااااااال ماأكتب لكم قصة ولادتي ..
ج
17-11-2008 | 02:49 PM
ألف مبروك حبيبتــي
حمد لله لى سلامتج وسلامة النونو الصغيره
جعلها الله من مواليد السعاده ,, والله يخليها لكم وتزفونهــا عروس
ادعي لنـــا خيووو بالولاده الميســــرة
حمد لله لى سلامتج وسلامة النونو الصغيره
جعلها الله من مواليد السعاده ,, والله يخليها لكم وتزفونهــا عروس
ادعي لنـــا خيووو بالولاده الميســــرة
آ
17-11-2008 | 03:00 PM
الحمدالله على سلامتك حبيبتي
وتتربي بعزك انشاءالله
ونااااسه اللي يولدون عندك بس مشاءالله عليكي لو محلك اطلب عمليه زي اللي قبلي
الله يحفظها لكي وتشوفيها عروس انشاءالله
وتتربي بعزك انشاءالله
ونااااسه اللي يولدون عندك بس مشاءالله عليكي لو محلك اطلب عمليه زي اللي قبلي
الله يحفظها لكي وتشوفيها عروس انشاءالله
s
17-11-2008 | 03:04 PM
alf alf alf mabrooooooooooooook
م
17-11-2008 | 03:15 PM
الف الحمدلله عالسلامة الله يجعلها من مواليد السعادة
اقرا قصتش واتخيل روحي مكانش مادري حزتها شبسوي
يلا كله يهون علشان فلذات اكبادنا
اقرا قصتش واتخيل روحي مكانش مادري حزتها شبسوي
يلا كله يهون علشان فلذات اكبادنا
ب
17-11-2008 | 03:18 PM
الحمد لله ع سلامتك يالغلا
وتتربى بعزكم وتشوفيها من الصالحات يااااااااارب
وعقبالنا بالولادة السهلة يااااااااااااارب
وتتربى بعزكم وتشوفيها من الصالحات يااااااااارب
وعقبالنا بالولادة السهلة يااااااااااااارب
م
17-11-2008 | 03:19 PM
يالله ياقرنفله يانك تعبتيني معك قعدت ادفع هههههههه اشوا اني ماربيت وانا اقرا قصتج
بس هم حسبي الله عليهم ليه يحطون معاج ناس في الغرفه يعني لازم يتلفون اعصابج قبل لا تجيبين
بس بالفعل طولتي 17 مب شوي بس الحمدالله على السلامه طلعتي بنتيجه الحمدالله والشكر هاذي تقى وجات
بس هم حسبي الله عليهم ليه يحطون معاج ناس في الغرفه يعني لازم يتلفون اعصابج قبل لا تجيبين
بس بالفعل طولتي 17 مب شوي بس الحمدالله على السلامه طلعتي بنتيجه الحمدالله والشكر هاذي تقى وجات
ر
17-11-2008 | 03:26 PM
الحمد لله على السلامه
ب
17-11-2008 | 03:32 PM
الحمدلله ع ساعة السلامة حاملة الرنفل.........
كنت انتظر قصة ولادتش صراحة..........
الله اهون ع الجميييييع............
اتخيل روحي ويش بسوي ماباقي شئ ع موعدي عاطيني 20 من هالشهر واني مو حاسه بشئ
دعواتكم لي اخوات.......
كنت انتظر قصة ولادتش صراحة..........
الله اهون ع الجميييييع............
اتخيل روحي ويش بسوي ماباقي شئ ع موعدي عاطيني 20 من هالشهر واني مو حاسه بشئ
دعواتكم لي اخوات.......
ا
17-11-2008 | 03:34 PM
قرنفوووله
تصدقين دمعت عيني يوم قريت القصه
ياربي هالكثر الام تتحمل وتتعب ,, صج الجنه تحت اقدام الامهات
الله يخلي تقى وابو تقى وتتربى في عزكم ياااارب
ادعي لي بالولاده السهله الميسره
تصدقين دمعت عيني يوم قريت القصه
ياربي هالكثر الام تتحمل وتتعب ,, صج الجنه تحت اقدام الامهات
الله يخلي تقى وابو تقى وتتربى في عزكم ياااارب
ادعي لي بالولاده السهله الميسره
م
17-11-2008 | 03:39 PM
الف الف الف مبروك والف حمد الله على سلامتك تتربى تقى فعزكم ويجعلها سبحانه من مواليد السعادة
&
17-11-2008 | 03:45 PM
الحمدلله على السلامة
وتتربى بعزكم ان شاء الله:D
وتتربى بعزكم ان شاء الله:D
ع
17-11-2008 | 03:47 PM
الحمد لله على سلامتج اختي
وذكرتيني بنفسي وايد ضليت في غرفه الولاده واشوف كل من ولد إله اني واصيح على روحي خخخخخخ
تتربى في عزكم إن شاء الله
وذكرتيني بنفسي وايد ضليت في غرفه الولاده واشوف كل من ولد إله اني واصيح على روحي خخخخخخ
تتربى في عزكم إن شاء الله
ز
17-11-2008 | 03:53 PM
مبروووووووووووووووووووووك قرنفولة وقصتك حلوة ماشاء الله والله الالام الدنيا تهون بشوفة احلى عيون بالدنيا الله يخليها لكي ويبلغك فيها من حفظة كتاب الله يااااااااااااااااااااااااااااااااااااااااارب
.
17-11-2008 | 04:06 PM
ألف ألف مبرووووووك
الحمدلله على سلامتك
وسلامة تقى والله يحفظها
لك ان شاءالله
الحمدلله على سلامتك
وسلامة تقى والله يحفظها
لك ان شاءالله
أ
17-11-2008 | 04:26 PM
ما شاء الله لا قوة إلا بالله
بوركت الموهوبة وشكرت الوهاب وبلغت أشدها ورزقت برها
ألف حمد لله على سلامتك قرنفلة انتي والبيبي ربي يجعلها من الصالحين
بوركت الموهوبة وشكرت الوهاب وبلغت أشدها ورزقت برها
ألف حمد لله على سلامتك قرنفلة انتي والبيبي ربي يجعلها من الصالحين
م
17-11-2008 | 04:30 PM
ما شاء الله
الف حمدلله على سلامة تقى و أم تقى
الله يحفظها لكم و يجعلها من الذريه الصالحه
و يثبت حملنا و يحفظ اجنتنا و يسهل علينا و يرزق كل محروم
اللهم آمين
الف حمدلله على سلامة تقى و أم تقى
الله يحفظها لكم و يجعلها من الذريه الصالحه
و يثبت حملنا و يحفظ اجنتنا و يسهل علينا و يرزق كل محروم
اللهم آمين
ت
17-11-2008 | 04:32 PM
الف الحمد الله على سلامتك وتتربى بعزكم وخليها لكم والله اني انسجمت معاك اااااااه بس متى اشوف الشريط يخلص واولد وارتاح تعبانه من الحمل وشايله هم الولاده الله يبلغكم فيها0