مشكلة صارت معي

قلوووووووب 01-11-2008 17 رد 1,231 مشاهدة
ق
أخواتي العزيزات صارت معي مشكلة ما أدري هل أنا السبب فيها هل تسببت فيها بدون قصد ام اني لست مذنبة

المشكلة يا خواتي اني كنت مسافرة دورة عمل ليست طويلة فقط اسبوعين وكنت على اتصال طوال هالفترة مع زوجي واتصالاتنا كلها حب وشوق وكنت ابا ارجع بسرعة عشان اشوفه وهو نفس الشي

المهم وانا بالدرب وصلت الاربعاء بالليل متأخر اصلا متعودة اروح مثل هالدورات بس ارجع العصر او المغرب لكن هالمرة بسبب ظروف السيارة تأخرت

المهم وانا بالدرب رسلت لزوجي مسج قلت له حبيبي انا واصلة متأخر وتعبانة وفعلا كنت مرهقة بدليل من دخلت الغرفة حطيت راسي نمت من تعب السفر والشغل طول الاسبوع فكان قصدي بدل ما يأتي لي الخميس الصبح يأخرها للعصر او الجمعة مثلا يعني نص يوم او يوم المهم هو ما عجبه هالكلام قالي كيف انتي تكتبي انج مشتاقة لي ومتلهفة وطول السفر تبيني واول من وصلتي البلاد غيرتي رايج قلت له انا ما غيرت راي بس قلت ارتاح عشان اجهز نفسي عشانك يمكن انا فعلا ما كتبت له بشكل منمق وجميل بس على اساس انه بيفهم وكنت اصلا تعبانة

الحين هو زعلان ومو راضي يجيني يقولي انتظري لما انا ارتاح لاني حاليا تعبان مثل ما نتي كنتي تعبانة من الخميس لليوم وانا احاول اراضيه ابدا مو راضي يقتنع بكلامي يقولي انتي غلطانة وانتي ما تبيني وتغير كلامج بلحظة وخلاص وكل ما اتصل له يرد علي الو نعم خير فيه شي ليش متصله كلام جاف اتصلت واتصلت وطرشت مسجات لكن بدون فايدة

ياناس هل انا غلطانة هل انا السبب خبروني هل هالشي سبب في هدم بيتنا وحياتنا
K
حبيبتي انتي موغلطانه
وزوجج بعد موغلطان.....بالعكس هوتضايق لأنه مشتاقلج ومايتسحمل فراقج فتره طويله حتى لويوم واحد^_^

ماعليه حبيبتي حاولي تفهمينه وتراضينه مره ومرتين وألف...ترا الريال طفل عند زوجته وبالكلمه الحلوه يرضى وينسى كلشي

شوفي اي حد من اهلج يجي ياخذج وروحيله البيت وحاولي تراضينه وانتو وجه لوجه:)

الله يهديه ويسهل اموركم ويخليكم لبعض يااارب
ق
اختي كلمته بكل الطرق احس انه مو مقتنع ابدا اني كنت تعبانة وحتى لو جاني ما بحس بروحي الا انا نايمة من ارهاق السفر قالي عادي كنت باجي بجلس مع البنت قلت له مستحيل بخليك وبنام بعد بتقول خلتني ونامت فالافضل يكون بوقت ثاني صارلي من يوم الخميس لليوم وانا على هالحالة احاول اقنعه بدون فايده ما ادري ليش وبالاخير يقولي انتي غلطانة حتى قلت له انا غلطانة وانا سفة لكن ابدا بدون فايدة بصراحة انا بروحي مليت بالاخير قلت رضى اهلا وسهلا ما رضى كيفه شو بسوي له يعني عاد مو مذلة لهالدرجة
(
الصراحه .. له حق يزعل .. ايه نعم انتي غلطانه ..

اشلون تقولينله لاتجيني الا بعد يوم كامل .. اكيد بيستغرب وبيتضايق .. اوكي قولي تعبانه بنام الحين واشوفك باجر .. خليه من كيفه يجي اي وقت ليش تحددين وقت معين وكأنج تبين تصدينه عنج ..

عاد الحين لازم تراضينه .. انتي وشطارتج :)
ع
خليه الين يهدى واتكلمي معاه وفهميه طول ماهوا معصب حيشوفك غلط في كل شي

عاادي دي الاشياء تسير مدام هوا مشتاق لك

ارسلي لو مسجات بين فتره وفتره اتطمني عليه وقوليلو انك تحبيه وفهمي ايش كان قصدك من الرساله وانو انتي ماكتبتي الكلام صح او ماوضحتيه ومن دا الكلام

انتي ماتقدري تروحي له ؟؟ لانو بكدا حيكون قدام الامر الواقع وتقوليلو انو من كثر ماانتي مشتاقه جيتي
ق
الله كريم
w
طيب عزميه بمكان هادي وحاولي تكلمون بهدوء وحاولي تبرري موقفج
s
روحي له وهو راح يرضى

انتي غلطتي لان الرجال عقلهم صغير يزعلون بسرعه وتفكيره زي تفكير اي رجال ثاني
m
حبيبتي بس لو ماقلتيله لاتجي الابعد يوم كامل احسن جذي كسرتي ابخاطره ماعليه الدنيا تجارب ومتحان ونشالله تقدرين تنجحين فيه بذن الله الله وياج ويفرج عليج
h
دلوووووووووع و حسااااااااااااااااااااس هههههههههههههههه
مو مشكله يالغاليه تصير وايد .... انتي ما غلطتي ولا هو غلط بعد.... سوء تفاهم مب اكثر هو اكيد حس بالاحباط او يمكن طاح ويهه لانه ما توقع هالمره تكوني تعبانه ( الرجال ما يفكرون اصلا) وتوقع انها مثل كل مره واكيد كان كله حرارة وشوووووق وانتي طفيتيهم بالرساله ههههههههههههههه

مب مشكله خليه ع راحته بيرضى لا تظغطين عليه
ق
تصدقون انه للحين زعلان بس يتصل يكلم البنت وخلاص واذا هي نايمة يقول اوكي مع السلامة ومو راضي ابدا حتى انا انكسر خاطري اصلا كنت حاطة في بالي اسوي له ليلة حلوة وشاريه له ساعة روعة لكنه للاسف ما فهم اني كنت ابا اجهز علشانه انا اصلا يوم زعل بلحظتها قلت يمكن يبا يسوي لي مفاجأة ورحت اتجهزت وشريت الهدية من اول يوم وصولي وللاسف الحين بكرة بنكمل اسبوع وهو زعلان ما ادري الى وين بيوصل وكل كلامه انه انا ما احبه واني رديته واني من كلامي اني ما اريده
م
الرجال متدلع و شكله حسااااااااااااس شوقتيه كثر الرسايل الي طرشتيها له آخر شي تروحي تنامي!!! مسكين انقهر و انكسر خاطره

حبيبتي لا انتي ولا هو غلطانين بس حاولي زياده تراضية
مبين عليه موت يحبج و انتي بعد

الله يخليكم لبعض و يبعد عنكم الزعل

آآآمين
s
انا مافهمت سالفت البيت اختي يعني الان انتي في بيت زوجك وهو مو بالبيت

او انتي في بيت اهلك؟؟؟؟ عشان نساعدك اكثر
ق
اختي انا طبيعي اسكن عند اهلي ولي جناح خاص لاني عملي في منطقة اهلي وزوجي اصلا من امارة ثانية وعمله هناك يعني فقط نشوف بعض في الاجازات الرسمية خميس وجمعة او مرات ايام يفضى فيها والحين انا هنا في البيت اقصد عند اهلي وصعب اني اروح له اولا بعيد ثانيا من بيوديني لاني ما احب حد يعرف شي عن المشكلة اقصد حد من خواتي وهو للحين مو راضي يكلمني بس يتصل لبنته يكلمها وخلاص حتى انا تعبت اول كنت اتصل واعتذر واطرش مسجات الحين خلاص مليت قلت بيرضى اهلا وسهلا ما بيرضى هو حر انا ما غلطت عليه لدرجة تخليه انه يزعل كل هالزعل كأني ارتكبت جريمة او اني خنته لا سمح الله
م
هو فعلا كبّر الموضوع مش عارفه ليش

طبعا إنتي غلطتي بهالمسج اللس بعثتيها...ما كان لها داعي...كان خليتيه ييجي و بعدين قلتي له تعبانه أو كان راح يبان عليكي...لكن هذه الصدّه صعبه...و لو كان هو عملها فيكي كنتي زعلتي جدا...

لكن المشكلة إنه هو طوّلها...و مش قادرة أفهم هو إيش منتظر ؟

يعني منتظر تصالحيه أكتر ؟ ما إنتي عملتي اللي عليكي و صالحتيه

منتظر تروحي له مقر إقامته ؟ طيب هو عارف إنها صعبه...

أعذريني بس ما قدرت أفهم وجهة نظره
م
اسمحي لي أنت غلطانة و جدا كمان ..

لا أريد أن أفصل ..

لكن غبت أسبوعين .. أججتي فيهم الشوق داخل قلب زوجك لك بمكالماتك و ابتعادك وحده يكفي .. و بعد هذا نسفتي كل شيء برسالة واحدة و تخليت عن كل كلمة قلتيها ..

نصيحة لكل متزوجة .. لا تنظري إلى الأمر عندما يقع من منظورك أنت .. إنما بعين زوجك
أشياء قد ترينها تافهة و لا تستحق الزعل قد تكون عنده جريمة كبيرة لا تغتفر ..
ق
الحمدالله خواتي الوضع تصلح وصار مثل اول وأحسن سألته بعدك زعلان قالي انا ما اقدر استغنى عنج فكيف تفكري اني ما احبج والحمدالله بس فعلا تضايق من ردي باني تعبانة وقالي هو اصلا كان تعبان من الشغل لكن الحمدالله صحيح الموضو عوالزعل طول بس انتهى والحمدالله حتى اننا الحين ناويين نبني البيت اشترينا الارض بس مو كبيرة لكن مو عارفة كيف أصمم البيت اباه حلو ومميز بخليه 3 او 4 غرف بشوف بقسم الديكورات يمكن حد يساعدني بتصميم حلو وانتوا بعد همتكم معنا
N
مبرووك اختى ربنا يتمم عليكم ويهنيكم ويسعدكم ويخليكم لبعض وبالنسبه لديكورات فيه قسم بالمنتدى
قسم الديكور والاعمال اليدويه هتلاقي فيه ان شاءالله يفيدك
X