مثل اليوم قبل اسبوع ولدت بالسلامة :)

حبيت اكتب لكم قصة ولادتي ان شا لله ربي يسهل على حواملنا يارب ويكتب لهم

ساعه سهلة يارب....

انا بصراحه لاني حملت بعد علاج دكتورتي اصرت اني ما انتظر لين موعد الولاده

بعد ماخلصت 38 اسبوع رحت موعد مراجعة صدمتني فيه وقالت لازم تختارين يوم

عشان تيين نولدج...!!!! بصراحه هذا كان اخر سؤال يخطر على بالي اني اختار اليوم

اللي بولد فيه... ؟!!! المهم عطتني موعد بعد 3 ايام عشا ايي يسوون لي طلق صناعي

وهذا كان يوم الجمعة الماضية بعد صلاة الجمعه تغديت انا وريلي وطلعنا والساعه 2 الظهر

انا في المستشفى اول ماوصلت عطوني غرفة وحطوا علي جهاز التخطيط لمده ساعه يمكن

بس بين مافيني الم بالمرة... المهم قالت الممرضة لازم ننتظر الدكتورة لما تيي وتفحصج

والساعه 4 يت الدكتورة وفحصتني وقالت اونه الرحم مفتوح 1 سانتي ونص بحط لج

تحميلة وبنسوي لج تخطيط لمده ساعه وتقعدين ساعتين بدون حركة فوق السرير وبعدين

تقومين تمشين في العنبر... الساعة 6 قمت ومشيت فيب العنبر لين الساعه 7 وطبعا الاسئلة

تهل من امي و ريلي كل شوي ماحسيتي بشي ؟؟ ماشي الم ؟؟ وانا بالمرة ولا احس بشي

بعدين طلع ريلي وراح ياب لنا عشا وتعشينا وقاعدين سوالف... والساعه 9 قالت امي لريلي

ليش ماتطلع انته وياها تمشون شوي ...وبعدها ريلي المينون شردني من المستشفى مع

انه ممنوع وطلعنا نمشي برع عالكورنيش بس ما كان مشي دلع لا والله كان مشي رياضة

تمينا نمشي ساعه وخلال هالساعه بديت احس بالم غريب مرتين بس كنت مومركزة عليه

لانه جسمي بعد يعورني من المشي... ما صدقت اني وصلت المستشفى وعصبت امي

وام ريلي علينا ليش طلعنا برع نمشي ..بس من اول ما وصلت بديت احس بالالم تقريبا كل

ربع ساعه وبعدين صار كل 10 دقايق.. وخلال هالوقت طبعا انا ماعرف انه هذا طلق بس كنت

احس بالم ... دخلت الممرضة وطردت ريلي قالت وقت الزيارة خلص لازم وحده بس تقعد معاي

طبعا امي وام ريلي مارضوا يروحون بس ريلي كان مجبور يطلع.. بس يحليله قال انا بطلع وبتم

تحت اذا حسيتي باي شي او دخلوج عنبر الولادة اتصلوا بي ...وريلي طلع من هني وانا بديت

احس بالوجع كل 5 دقايق وبدا يزيد ويزيد وصرت ما اتحمله ناديت السستر وقالت لي الدكتورة

يت وشافت ملفج وقالت الساعه 6 الصبح بتيي وبتعطيج تحميلة ثانية انتي ما بتربين اليوم

وقمت امشي في الغرفة وامي فديتها ماسكتني بايدي وصار الوجع ييني كل دقيقتين ومقدر

اتحمل لين الصبح.. الساعة12 ونص ام ريلي نادت الممرضه قالت لها اني خلاص بولد الوجع

ييني كل دقيقتين يت الممرضة وقالت بفحصج بعد مافحصتني طلع الرحم مفتوح 4 سانتي

وعلى طول خذوني غرفة الولادة ونادوا ريلي... وبدت رحلة العذاب الثانية... دخلت غرفة الولادة الساعه1 ونص وحطوا لي التخطيط وكان الوجع ييني كل نص دقيقة شافتني الدكتورة قالت جي بتتعبين شو رايج نعطيج ابرة شوي بتريحج بس مابتوقف الطلق بس بتحسين برقاد شوي

بعد ماعطتني الابرة شوي ارتحت بس طبعا تميت لين الساعه اربع ونص وانا الطلق شغال عندي حار بحار ..الساعه اربع ونص فحصتني القابلة قالت لي الرحم مفتوح 8 سانتي انا الحين بفتح لج الماي عشان اساعدج ومن اول مافتحت الماي والطلق ولع عندي ياربي كنت بموت وريلي مسكين ماسكني من يد وامي من يد وتميت ساعه كاملة اطلق من بعد مافتحت الماي

وبعدين بدى يطلع الراس.. وقعدت ساعه كاملة بس عشان يطلع راس بنتي والله وطلعت روحي وحسيت اني مقدر اولد بس سبحان الله ربي يعطيج وقتها من قوته وكنت اصارخ عالقابلة اباها
تقطع لي شوي عشان يطلع الراس مارضت ابدا والحمدالله ولدت الساعه 6 و11 دقيقة صباح يوم السبت الماضي واول ما حطوا لي بنتي على صدري حسيت التعب كله راح فرحت فرحه
مافرحتها من قبل وحسيت بالتعب اللي تعبته امي فيني ...الله يحفظها ويخليها لنا يارب
ومسكين ريلي طول الوقت وانا اولد يقرا علي وينفخ علي ويهديني ويمسك ايدي ولما ولدت
ماقدر يمسك دموعه تعذب وااايد وهو يشوفني جي,,, اللهم لك الحمد حمدا كثيرا طيبا مباركا فيه ..