~'*¤!||!¤`تجهيزات عرايس البحرين { الــواحــد والثــــلاثــــون}*¤!||!¤*'~`

دمـعـة;7703707:
اهلين دموع الكوثر

احس ستاند الذهب حلو للخطوبة,,خاصة انه هدية من المعرس وراح تلبسه اول مرة هالليلة
بس في الزواج ماراح تلبسه,, فما له داعي وجوده

اما الورد اوكي اليوم بروح اشتري السلال

والقرآن حلوة فكرته,, يبي لي قرآن مزيّن بطريقة حلوة مثل لون فستاني

ثااااانكس (f)

فتوح الصغيره;7708565:
بسألكم
ابي ستديو يكون في مدينة عيسى أو الرفاع وين ؟؟؟
ويكون تصويرهم حلو

دمـعـة;7702234:
عندكم اقتراحات للأطفال اللي يدخلون مع العروس؟؟
شنو يحملون غير الشموع وسلة الورد

>>>لاحد يدخل ويرد ويقول لي لاتخلين اطفال او مو حلو,, ابغي بس تنصحوني شنو اخليهم يحملون ههههههه اتفلسف بعد
وإذا عندكم حتى لو أفكار جديدة او غريبة..لكن في نطاق المعقول

لاتقولون لي طفلة تسوي روحها ضايعة او سندرلا او هالافكار الغريبة اللي تضحك خخخخخخخ
ابغب شي معقول وممكن تنفيذه

فتوح الصغيره;7708780:
وين بالضبظ يصير الاستديو ؟؟؟

حلم العذارى;7704027:

°
°
°

أنا شخصياً ما أحب مسآلة يهالوه وآوادم تمشي معاج بالزفة وهالحركات

أحس إنتي وخطيبج أحلى بروحكم

بس حماتي مصرة إلا تبي تسوي يهالوه في الزفة

فـ شلون بسوي ؟!

بخلي 2 يهالوه بنات صغار

حاملين شموع مع شعر رومانسي

وبعد ما يخلص الشعر وتخلص زفة اليهالوه

بدش أنا وخطيبي بروحنا . . على زفة سبشل! ومحد ويانا

وبالنسبة لستاند الشبكة & التوزيعات وباقي الأغراض إلي تكون على المسرح

أتفقت مع الأهل إنه ينسقونها لي على المسرح قبل جيتي بنص ساعة

على أساس , زفة اليهالو ومن بعدها زفتنا

ما أبي أزعاج ولا ربكة بالصالة

وإنتي وبراحتج :)

°
°
°

وصــايــف;7704630:
دمعة
انا اتفق مع حلم العذارى

سوي مثل ما قالت عن الربكة والفوضى ويكون احلى انتوا الاثنين بس تدخلون وقبلكم سوي حركة للصغار وبامكانج تبدعين فيها

عندي اقتراح لج

شوفي عند اكسسوريز يبيعون اجنحة ملائكة خلي يلبسون ورى ظهرهم ويمكن بعد لو حبيتي تلبسيهم تاج او طوق ورد ابيض فوق راسهم وطبعا الفستان ملائكي منفوش وابيض يدخلون على صوت موسيقى حلووو ورومنسي حتى لو موسيقى عصافير

وتقدرين تخلينهم يحملون اشكال مثلا قلوب عليها وحدة اسمج ووحدة اسم زوجج والثانية مثلا بارك الله لكم او اي شئ من دعوة حلوة
وخلي من اهلج ومن اهل المعرس من برى المسرح في نفس الوقت اللي الصغار يمشون ينثرون عليهم ورد ابيض وريش ابيض
بعدين خليهم يركبون فوق عند الكوشة ويقفون بالعرض لحد ما توصلين انتي وزوجج ويروحون على جنب وتصورون كم صورة معاهم ويمشون

ان شاء الله تعجبج فكرتي لانها من تأليفي

عروس أمين;7705391:
يووووووو عجل نتلاقه هناك .... و لله واحد يشتغل ويه خطيبي رايح ماليزيا و تايلند عن طريق مكتب في التامينات ناسية اسمه .. اهو يمدحنه بجوف اسمه من عند زوجي و بتصل لش

اوووووووووووو خرفت خخخخخخ يعني برد عليش
مو مني ما عندي حواس صايرة من قعدة البيت و قله الشغل

Sm!LeY;7705861:
هلا اختي .. اني افضل انه العروس تدخل بروحها عشان يبين فستانها و كشختها و محد يغطي عليها ..

شرايج توزعين مخدات ذهبيه على المسرح في الطرفين مثلا 3 في كل جهه وقت اللي بتدخلين يقعدون عليها الاطفال مثل قعده الجواري في زمن شهريار وتخلينهم مثلا ينثرون ريش و ورد او يحركون يدهم بطريقه حلوه تعلمينهم اياها مثل الجواري ..

و تسوين مهفات ريش 2 كبار تخلين بنات شوي كبار يهفون بها ..


هالحركه سويناها في عرس و كان فيه 3 بنات شوي كبار يرقصون و عليهم لباس الجواري و مغطين وجههم بشي مثل النقاب .. و طبعا الاغنيه كانت خاصه و من ستايل الف ليله و ليله .. و طبعا الزفه كلفتنا وايد من لبس و مخدات و مهفات و اشياء ثانيه و طبعا المسرح كان من نفس الستايل ..

الدخله هذي طبعا كاانت بدون المعاريس .. و بعدها بدأت اغنيه المعاريس الخاصه زفتهم ..

فتوح الصغيره;7708565:
بسألكم
ابي ستديو يكون في مدينة عيسى أو الرفاع وين ؟؟؟
ويكون تصويرهم حلو

أم سلمان الحلو;7711856:
السلام عليكم و رحمة الله تعالى و بركاته،

أني نفسش ما أحب الأفكار الغريبة ....

ذكرتيني في عرسي .. كان عندي بنات خالاتي و بنات أخوان زوجي كلهم أحبهم و يحبوني و ما بغيت أكسر بخاطرهم لأني الصراحة ما أستسيغ فكرة وجود أطفال في العرس .. فقلت لنفسي أحسن شي أعطيهم دور في الحفلة و منها أحبسهم في مكان واحد .. فقمت سويت ليهم كلهم (10 بنات صغار بس وحدة منهم إللي هي بنت أخت صديقتي غدرت بنا و ما رضت تمشي معاهم) المهم سويت ليهم كلهم فساتين مثل فستاني .. يعني مو مثله بالضبط بس نفس اللون الأبيض و منفوخ من تحت و فيه ثلاث سيور عند كل كتف .. بس فساتينهم طبعاً ما خليت فيها شك أو غيره خليتها بسيطة و لا كانت بتكلفني و ما بتسوى عليي .. صار شكلهم يجنن و هم لابسينهم .. و بما أن باقتي كانت وردية و الورود إللي على الطاولات إخترتهم وردي و أبيض فعطيت كل وحدة في يدها وردة وحدة بس مربوطة بشريطة عادية .. و ورودهم كانت عادية (قرنفل) و لونها بعضهم أبيض و بعضهم وردي .. و الخياط عمل ليهم مع كل فستان طوق للرأس أبيض و عليه ورود بيضاء ...

في الزفة ما أحب سالفة الأوادم إللي يمشون مع المعرس و العروس حلاتها بروحهم .. فعشان جذي خليت البنات الصغار يدخلون القاعة قبلي و يوقفون على المسرح نصهم على اليمين و نصهم على اليسار .. صدق في وحدة من الأقارب ما أعرف ليش تبي تصير متعاونة بس عفست الموضوع شوي و قامت مسكت وحدة من البنات من إيدها عشان تمشيهم .. الله يهديها أني كنت ماعطتنهم التعليمات و هم ما شاء الله مشو عليها بس يالله الموضوع ما أخترب واجد و لله الحمد .. و بعد ما هم دخلو دخلت أني و زوجي في الزفة بروحنا .. و بعدين طول الحفلة خليتهم قاعدين على حافة المسرح و كنت مهددة عليهم إن ما يصير يرقصون إلا إذا قلت ليهم .. خليتهم عن خاطرهم يرقصون على أغنية وحدة بروحهم و ناديتهم بعدها و خليتهم موزعين حواليي بعضهم قاعدين على الأرض و بعهم و يايي على الكرسي و بعضهم واقفين جنبي و صورت وياهم .. الصورة صدق طلعت حلوة بشهادة الجميع ... لأنهم لابسين مثلي فكانوا مكملين ديكور المكان

تقدرين تسوين جذي بس حلاته لو عندكم عدد كبير من البنات يعني 6 إلى 10

و ما أفضل إن تعطونهم شموع أو بخور أو أي شي فيه خطورة .. يعني ممكن ورود أو عصا مثل عصا الساحرات في الرسوم المتحركة .. أو ممكن كل وحدة تحمل قفص صغير فيه عصفور واحد .. أو يحملون كرة مثل إللي يحطونهم على أشجار الكرسمس يعني إللي يلمعون و عليهم جلتر ممكن تعطين كل وحدة كرة وحدة و مربوطة بخيط أو شريطة و متدلية منه .. أو بعد إذا تحبين شفت قبل فترة عن هومسنتر شموع صغار بس في الحقيقة هم ليت بس مسوى على شكل شعلة لشمعة ممكن تاخذين من رامز الفوانيس الملونين و تحطين داخل كل واحد هذه الليت أو أي ليت عادي يشتغل على بطارية و تعطين كل وحدة واحد ... أحس بيكون عرسش حلو بإذن الله .. الله يتمم ليش على خير يا رب

صاحبة الظل الخفي;7713575:
بنات لحقوني مو عارفه شاسوي
اتصلت صديقتي تحجز عند عايشه البلوشي الا ردت عليها الخدامه وتقولها عايشه مسافرة ومابتيي الا يوم الاحد وانه حاجزتها لعرسي يوم الجمعه
سيده اتصلت على تلفونها قتلها وين عايشه قالتي عايشه في دبي قتلها متى ترجع قالتلي الجمعه قتلها انه عندي موعد يوم الجمعه قالتلي لاتخافين بتيي اهيه بتوصل يوم الجمعه وبتكون في الصالون بعد العصر
بس انه وايد احاتي اخافي ماتي وتسوي فيني دقه قولولي شاسوي

عروس أمين;7709622:
يؤ ما عجبني غريبة كنت باخذها و بعدين هونت و الحين اتصلت لام شهد بتجيني الظهر على 3

ويليييييييييييي صحصح قرب عرسش وناااااااااااااااااااسة صوري من الحين(استخفت لبنيه)

صحوبة حصلتين حناية تجي لاهلش البيت؟ لاني متوهقة

laleeta;7713593:
لا تخافين حبيبتي.. هي دايما جذي.. حتى ساعات تيي من المطار لي الصالون دايركت عشان زباينها... لا تحاتين :)

دمـعـة;7713595:
انتي اتصلتين على تلفونها وهي ردت عليش؟
حاولي تكلمينها شخصياً,, عشان تتأكدين منها

الله يوفقش ان شاء الله وتلقين رد منها

صاحبة الظل الخفي;7713647:
صج يعني مابتسوي فيني دقه
قاعده احاتي
وان شاءالله اتيي