بنات البحرين بغيت مساعدتكم

اي بعد بغيت ارقام حناايات :)

بالنسبة للصالات عندج صالات الفنادق المعروفة
الخليج - عندهم اوال والمؤتمرات
الكروان بلازا- المؤتمرات
ريفيرا- فرساي
الريجنسي- الرفاع
وباقي الفنادق طبعا مثل النوفوتيل والموفمبك و غيرها ,،

الصالات الراقية غير صالات الفنادق - قاعات مرمريز 1-2-3-4 - الجميرا - زينة الافراح
وعندج الدانة في سند و الدانة 1 و 2 في المقابة .. هذي الصالات تكون شاملة البوفيه و المعجنات والمكسرات و الشاي والقهوة و العصاير على الطاولات وطبعا البطاقات و الدي جي و التصوير (عادي وفيديو) و الكوشة و السيرفس.. اسعارهم تعتمد على قائمة البوفيه اللي بتختارينها وعدد معازيمج ..

حجزنا مرمريز شهر 3 ل 500 شخص ب 1970- و الدانة 1 في مقابة شهر 8 ل 550 شخص ب 1450..

و انا اشوف ان طيران الخليج بشوية ديكورات تصير واااو ..وفيها عروض حلوة..

الصالات العادية عندج في خط البديع - البركة - الاحلام- امواج المسباح - مصلى العيد - شهرزاد- الانوار - الهدى - التفاؤل - صالة المتروك - ناريمان "المطرود سابقا" و فيه غيرها اتمنى الاخوات يفيدونج بخصوصها.. هالصالات اسعارها تتراوح مابين 300 - 450 دينار تقريبا لانها مب شاملة كل الخدمات ..

----------------------------------------------

فساتين حنة تعتمد على انتو شنو تبون .. هندي - فستان سهرة - جلابية .. للفساتين ممكن تدورون فالسعودية فالخبر في مجمع فينسيا و مجمع الجمعه اسعارها انسب من البحرين بواااجد وخياراتهم واسعة .. ولو هندي ممكن تشتري خام من المحلات جنب لاست جانس في المنامة او من اشكال وتفصلها بالستايل اللي تبيه .. بنت خالتي شرت قطعتين ساري من الرخيص بو 6 دينار لونين احمر واخضر مذهبين .. و خيطتهم كبدي فيه تطريز ذهبي في الصدر ومعاه برمودا قصيرة للركبة و فوقهم تنورة موديل اسباني اللي قصيرة من قدام وطويلة من ورى .. و لما جاء وقت يحنون رجولها شالت قطعة التنورة .. كلفها مع الخياط 27 دينار بس..

الجلابيات للصباحية عندج باندا في المحرق عنده جلابيات اشكال والوان واسعاره على حسب فيه غالي حيل وفيه المناسب - و سديم هذا انا دووم اتعامل معاه شغله دوم يكون راقي الخامة شيفون نااعم و الشغل بس في اليد و الصدر .. اسعاره مابين 35- 80 على حسب .. اوقات يسون عروض على الجلابيات بنص السعر ..

وعندج في البوكوراة اكاجو و دار انمار و نهر الفنون و غيرها محلات في شارع البوكوارة .. و بعد عندج بره البوكوارة جلابيات سهير ..

عندج كبرى قصير ناس واجد تحب شغلها .. في سند في ظهر مجمع ذي سنتر "العلوي سابقا" الاتيليه مالها في حدائق بابا..

وبعد يمدحون مهاي في المحرق بس ماجربته ..

-----------------------------------------------------------

افكار الزفة امم مدري انا افضل الزفة الكلاسيكية العادية ..

بس ولد خالتي بالسعودية بيتزوج وقاعدين نفكر له في شي لزفته ..

انا اقترحت عليهم زفة سندريلااا .. ان قبل الزفة يشغلون قصة سندلاريلا بصوت راوي مع المؤثرات الصوتية .. و وحدة تتكلم على انها سندريلاا .. و لما تجهز عربة سندريلا و تجي الخيول يحطون صوت خيل و تبدأ الزفة .. و قبل العروس يمشون كم بيبية لابسين فساتين طقم و فالظهر اجنحة كانهم جنيات و حاملين عصي فيها نجوم تبرق داخلها مصباح صغير عشان تولع .. و كم وحدة ينثرون ورد في الممر اللي بتمشي فيه العروس لحد ما توصل الكوشة و تقعد .. عقب يطلع دخااان ويختفون الجنيات ويطلع المعرس ..

---

وفيه افكار ثانية .. ان شاء الله ارجع اكتبها لج اذا الله اراد ..

---------------

الحنايات واجد .. عندج منيرة و ام شهد و ليلى الماحوزي و زينب من مدينة حمد و حليمة من كرانة و رقية وثريا و عندج رباب من باربار و الصالونات طبعا رشنا وريناز و فاتنة الخليج و البنات ما بيقصرون بيزيدونج ان شاء الله ..



اتمنى اكون افدتج و ربي يوفقكم ويتمم لكم بخير ..