خواتي المصابات بتكيس المبايض .. ممكن تساعدوني بتجاربكم.. ؟

السلام عليكم ورحمة الله وبركاته ..

اولا الحمدلله رب العالمين..

انا متكيسه .. هه ما اعرف هذه الكلمه صحيحه والا لا المهم .. انا عندي اكياس في المبايض واعرف هالشيء من كم سنه .. وتعالجت فتره ووقفت ورديت اتعالج وحاليا اخذ جلوكوفاج .. وهذه بس مقدمه عشان تعرفون حالتي..

اما الموضوع .. احم انا عرسي قريب ..

ويالسه احاتي .. اول شيء الدوره الله يعزكم .. مرات تكون غريبه شوي يعني في البدايه تكون افرازات ومعاها شويه دم .. واقعد كم يوم جذي وبعدين تجيني الدوره العاديه .. يعني اطول شوي .. مستحيه من هالنقطه..


ثاني شيء خطيبي او زوجي بالاحرى ما يعرف عن موضوع التكيس.. وانا ما اقدر اقول له لا الحينه ولا في بدايه الزواج .. وما ادري شو اسوي .. لأنكم تعرفون مشكلة التبويض والحمل مع هذه الحالات .. في احتمال كبييير اني اتأخر في الحمل.. وانا لأني اعرف حالتي ما اريد انتظر كثير يعني ودي على طول ابدأ علاج .....> ما تضيع وقت اختكم ..خخخ.. يعني اقصد اريد اتابع مع دكتورتي اول بأول .. وخاصة اني مش صغيره ..

بس طبعا مستحيل انا اقول له خلنا نسير لطبيبه واحنا في بدايتنا .. ومستحيل اقول له عن حالتي ومستحيل اخفي عليه ..

ادري ما في خيار ثالث.. وانا صدق صدق محتاره واحاتي هالموضوع ..

المشكله اني خجوووووله وايد وايد وما اقدر اكلمه في هالمواضيع الحينه .. وحتى بعد الزواج.. يعني يبالي وقت ليت اتعود وجذيه .. وحتى لو صرت عادي معاه ما اقدر اتحمل الكلام والضغط اللي بيكون علي.. واعتقد اي وحده متزوجه ومتأخره عن الحمل تعرف صعوبه هالشيء.. وخاصة انه الناس ما ترحم والكلام ضروري بيوصلهم..
وانتوا تدرون اذا الوحده ما حملت وهي ما فيها شيء حكموا عليها بانها عاقر.. فما بال وحده مصابه بأكياس...؟

وبس هذا موضوعي كتبته لكم وكنت حابه اعرف من المتكيسات .. انتوا متي وكيف عرفتوا بحالتكم؟؟ وشو سويتوا ومنو خبرتوا؟ واذا في وحده عرفت قبل زواجها خبرتي خطيبج او اهله قبل الزواج والا لا؟ وكيف تصرفتي بعد الزواج؟

وكم انتظرتوا قبل ما تقرروا تروحون لطبيبة؟

وفي وحده منكن عنها اكياس وحملت من غير مشاكل او تأخير.. ؟

وبس ..


الله يوفقكم ويرزقكم بالذريه الصالحه ..